2 Corintios 11 - Tayta Diospa Wilakuynin

Apóstol tukuqkunata mana chaskipäyänanpaq nishqan

¹ Löcu kashqäta conträ runakuna niyaptinpis mana rabyakuylapa wiyayämay. Yapaymi nï: Wiyayämay.

² Tayta Diosnömi qamkunapaq fiyupa lakikü. Jipash surinta manaraq olqu reqiqta runaman entregayta munashqannömi qamkunatapis Jesucristuman entregayta munaykä.

³ Isanqa lakikü Evata Satanás engañashqanno qamkunatapis lutan yachasikuqkuna engañayäshunaykipaq kaqtami. Majasakänanpaq parlakushqan maqtalapaq jipash kashqannömi qamkunapis Jesucristulapaq kaykäyanki.

⁴ Sayno kaykaptinqa ¿imanirtaq chaskikuykäyanki lutan yachasikuqkuna <> niyäshuptiki y <> niyäshuptiki y <> niyäshuptiki?

⁵ Say lutan yachasikuqkuna <> niyäshuptikipis noqa paykunapita mas rasunpa kaq apostolmi kaykä.

⁶ Runakunapa nawpancho shumaq parlayta mana yacharpis musyämi imapita parlashqätapis. Sayno karmi Tayta Diospa wilakuyninta tukuynöpa qamkunata wilapashkä.

⁷ Tayta Diospa wilakuyninta wilapashpä qamkunapita qellayta mana chaskir ¿lutantasuraq rurashkä? Chaskinäpa trukanqa gastükunapaq arushkämi. Sayno arushkä Jesucristupa wilakuyninta chaskikur salvakuyänayki raykumi.

⁸ Qamkunata sirvinäpaq wakin wawqi panikunanami gastükunapaq yanapäyämash.

⁹ Lakikuyänaykita mana munarmi pishïpakurpis qamkunata manakuyashkäsu. Saypa trukanqa Macedoniapita kaq wawqikunami nistäyashqäpaq apayämurqan. Nawpapita pasa gastükunapaq umaykikunata mana nanäsishqänölami imaypis umaykikunata nanäsishaqsu.

¹⁰ Tayta Dios musyanmi rasun kaqlata nikashqäta. Jesucristupa ali wilakuyninta mana manakuylapa wilakunäpaq manami intëru Acaya provinciacho pipis michämanmansu.

¹¹ Gastükunapaq yanapäyämänaykita mana munaptï capazchir qamkunata manakaqman churayashqäta yarpäyanki. ¡Manami saynösu! ¡Tayta Dios musyanmi qamkunata kuyashqäta!

¹² Qamkunata kuyarpis Tayta Diospa wilakuyninta wilakur gastükunapaq manami imaypis manakuyäshaykisu. Saynöpami say lutan yachasikuqkuna noqakunano apóstol kayashqanta yarpäyanqasu.

¹³ Paykuna manami Jesucristupa apostolninsu kaykäyan, sinöqa apóstol tukurmi runakunata engañar puriykäyan.

¹⁴ Sayno puriyashqan manami espantaypaqsu kaykan. Kikin Satanáspis ali ángel tukurmi purin.

¹⁵ Ali ángel tukur Satanás purishqannömi paykunapis Satanáspa sirviqninkuna kayashpan Diospa sirviqnin tukular puriykäyan. Sayno kayashqanpita Tayta Diosmi juzgar castiganqa.

Pablo nakashqankuna

¹⁶ Yapaymi nï: Löcu kashqäta ama pipis yarpäsunsu. Sayno kaptinpis löcuno ichikla alabakushqäta kanan wiyayämay.

¹⁷ Señor Jesucristo sayno mana alabakuptinpis tantiyarkuyänaykipaq löcunöpis alabakushaq.

¹⁸ Lutan yachasikuqkuna alabakuykäyaptinqa ¿imanirtaq noqapis mana alabakümansu?

¹⁹ Qamkuna nikäyanki shumaq yachaq kayashqaykitami. Rasunpaypa yachaq karqa ¿imanirtaq lutan yachasikuqkuna alabakur niyäshushqaykita kushishla chaskikuyanki?

²⁰ Qamkuna upälakuyankimi munayashqanta rurasiyäshuptikipis, qellaynikita ushapäyäshuptikipis, engañayäshuptikipis, mana runatano rikayäshuptikipis y laqyayäshuptikipis.

²¹ Saynöpis nikäyan paykunano mana kashpä munayniynaqla kashqätami. ¡Achyä pë, paykunano mana kar penqaküchir! Paykuna alabakuyashqannölami noqapis alabaküman. Isanqa paykunano alabakur löcunömi parlaykä.

²² Paykuna hebreo casta kayashqannölami noqapis hebreo casta kaykä. Paykuna Israel runa kayashqannölami noqapis Israel runa kaykä. Paykuna Abrahampa ayllun kayashqannölami noqapis Abrahampa ayllun kaykä.

²³ Paykuna Jesucristupa sirviqnin kayashqanta niyaptinpis noqa masraqmi Jesucristuta sirvï. (Kayno parlarmi löcuno parlaykä.) Maysaychöpis paykunapita masmi wilakushkä. Wilakushqäpita carcilchöpis mas aska kutimi wichqarashkä. Autoridäkunapis yaparir yaparirmi astayämash. Aska kutimi conträkunapis wanusimayta munayash.

²⁴ Israel runakunapa autoridäninkuna pisqa kutimi kimsa chunka esqun (39) maki fiyupa astayämash.

²⁵ Kimsa kutimi Roma soldädukuna fiyupa wiruyämash. Juk kutimi runakuna samqar ichiklapa wanusiyämashsu. Kimsa kutimi aywaykäyashqä büquipis talpukash. Juk paqas juk junaqmi qeruta makalakushla lamarcho aynashkä.

²⁶ Diospa wilakuyninta wilakurmi maysaypapis purishkä. Aska kutimi mayupis cäsi apamash. Suwakunapa makinpitapis qeshpirqä. Israel runakunapis y mana Israel runakunapis wanusiyämaytami munayämash. Markachöpis, sunyaq jirkachöpis y lamarchöpis ichiklapami wanushkäsu. Jesucristuman janan shonqula yärakuqkunapis wanusiyämaytami munayämash.

²⁷ Mayman charpis aja aruykunachömi arushkä. Aska kutimi yarpachakur punuytapis tarishkäsu. Mikanarmi yakunarmi purishkä. Mödanä llapshala kaptin aläsikushkämi.

²⁸ Say jananmanpis waran waranmi maysaycho kaykaq wawqi panikunapaq yarpachakü.

²⁹ Juk wawqi o juk pani nakaptinqa fiyupami lakikü. Pitapis jusalikasiptinqa jusalikasiq runapaq fiyupami rabyä.

³⁰ Alabakunäta munayaptikiqa munayniynaq kashqäpitami alabakushaq.

³¹ Señor Jesucristupa Papänin Tayta Diosmi musyan rasun kaqlata parlaykashqäta. Pay imaypis alabash kaykuläsun.

³² Damascuchömi rey Aretaspa gobernadornin soldädukunata churarqan marka punkupa yarquptï prësu sariyämänanpaq.

³³ Saymi wawqikuna canastaman winarkamar marka murälla jananpa uräsiyämarqan. Saynöpami Tayta Dios yanapämarqan qeshpinäpaq.