1 Tesalonicenses 3 - Tayta Diospa Wilakuynin

¹ Qamkuna kaqman shamuyta mana kamäpakurmi fiyupa lakikushkä. Saymi Atenas markacho kikilä kanä kaptinpis

² qamkuna kaqman wawqinsi Timoteuta kachamurqä. Musyayashqaykinöpis Timoteuqa Diospa sirviqnin karmi Jesucristupa ali wilakuyninta wilakur puriykan. Paymi yachasiyäshunki y shakyäsiyäshunki Jesucristuman yärakuyänaykipaq.

³ Sayno shakyäsiyäshuptikimi runakuna chikiyäshuptikipis lakikuyankisu. Musyayankimi Jesucristuta chaskikushqansipita runakuna nakasimänansipaq kashqanta.

⁴ Saynölami qamkunawan kaykarpis wilarqä Jesucristuman yärakushqansipita runakuna chikimänansipaq kashqanta. Say nishqänölami lapanpis päsaykan.

⁵ Saymi qamkunapaq lakikur Tayta Diosman yärakuykäyashqaykita musyanäpaq Timoteuta kachamurqä. Fiyupami lakikurqä Satanás ima sapatapis churapäyäshuptiki Jesucristuman manana yärakuyashqaykita yarpar. Sayno kaptinqa ali wilakuyta wilapashqäkunapis manakaqlapaqmi kanman karqan.

Tesalónicapita Timoteo kutishqan

⁶ Qamkuna kaqpita Timoteo kutiykamurmi wilamash Tayta Diosman shumaq yärakuykäyashqaykita y kuyanakuykäyashqaykitapis. Saynöpis wilamash noqakunapaq lakikur kutiyämunäta munaykäyashqaykitami. Saymi noqakunapis watukakuq kutimuyta yarpaykäyä.

⁷ Shumaq yärakuykäyashqaykita wilayämaptinmi nakarpis kushish kaykäyä.

⁸ Ali kaykäyashqaykita musyarmi shonqükunapis asikyarkun.

⁹ Tayta Diosninsi yanapäyäshushqaykipita fiyupa kushikur lapan shonqükunawanmi payta agradëcikuyä.

¹⁰ Saymi paqaspa junaqpa lapan shonqükunawan payta manakuykäyä qamkunaman kutiyämunäpaq. Chämurnami masta yachasiyäshayki Tayta Dios munashqanno kawayänaykipaq.

¹¹ Papäninsi Tayta Dios y Señorninsi Jesucristo kamakaykasisun qamkunaman watukakuq kutiyämunäpaq.

¹² Señor Jesucristo yanapaykuyäläshunki qamkunata kuyashqänöla kikikipura y wakin runakunawanpis kuyanakuyänaykipaq.

¹³ Saynöpis yanapaykuyäläshunki lapan shonquykikunawan yärakur pay munashqanno kawayänaykipaq. Saynöpami salvashqan runakunawan Señorninsi Jesucristo kutimuptin Papäninsi Tayta Diospa nawpancho jusaynaq kayanki.