1 Reyes 7 - Tayta Diospa Wilakuynin

Palaciukunata Salomón sharkasishqan

¹ Saynölami wayikunatapis Salomón sharkasirqan. Say wayikunatami sharkasiyta usharqan chunka kimsa watacho.

² Juk wayinpa jutinmi karqan Líbano Munti. Say wayinpa larguynin karqan chusku chunka pisqa (45) metru, anchuyninna karqan ishkay chunka ishkay metru pulan (22.5), altuyninnami karqan chunka kimsa metru pulan (13.5). Cedrupita rurash terrädukunata chusku fïla columnakunami tuknararqan.

³ Say terrädukuna karqan chusku chunka pisqami (45). Saykunatami columnakunaman churasirqan kimsa fïlata. Saymi cada fïlacho karqan chunka pisqa terrädukuna. Nirkurmi cedru tablakunawan terrädu rurinpa entablasirqan.

⁴ Saynölami kimsa hilëra ventänakunatapis frenti frenti kananpaq rurasirqan. Cada hilërachömi kimsa ventänakuna karqan.

⁵ Lapan punkukunapis y ventänakunapis kimsa fïla frenti frenti cuadrädumi kayarqan.

⁶ Saynölami juk alartapis columnakunalawan rurasirqan. Say alarpa larguyninmi karqan ishkay chunka ishkay metru pulan (22.5) y anchuyninna karqan chunka kimsa metru pulan (13.5). Say alarpa punku yaykunanchöpis columnakunalawanmi juk alarta rurasirqan.

⁷ Saynölami demandukunata arreglananpaqpis despächunta rurasirqan. Say despächunpa paderninkunatapis intërutami cedru tablakunawan entablasirqan.

⁸ Täkunan palaciutapis despächun niraqlatami rurasirqan. Say palaciuqa patiuyuqmi karqan. Saynölami Faraónpa warmi surin tänanpaqpis palaciuta patiuyuqta sharkasiparqan.

⁹ Saykunataqa Salomón ali rumikunalawanmi sharkasirqan cimientupita hasta pader ushashqanyaq y jatun patiuyaq. Say rumikuna kamakänanpaqmi tinku tinkuykasir lapan lädunpa shumaq laqlayarqan.

¹⁰ Wayikunapa, alarpa y despächupa cimientunkunapis jatusaq ali rumikunalawan perqashqami karqan. Say rumikuna wakinqa karqan chusku metru pulan y wakinnami karqan kimsa metru pulanpita maslan.

¹¹ Lapan padertapis perqasirqan tupu tupuykur laqlash ali rumikunalawanmi. Say rumikuna jananmanmi cedru qerukunata churasirqan.

¹² Intëru kuchunta tumaypami jatun patiuta kimsa hilëra rumikunawan y juk hilëra cedru tablonkunawan corralasirqan. Say corralasishqan paderkunaqa templupa ruri kaq patiunta corralasishqan paderkunanömi karqan. Saynöpis templuman yaykuna alarpa paderninkunanömi karqan.

Hiramta Salomón minkakushqan

¹³ Rey Salomónmi Tiro markacho taq Hiramta qayasirqan arupänanpaq.

¹⁴ Hirammi karqan Neftalí trïbu viüdapa wawan. Hirampa papänin karqan Tiro markapita bronci fundiyta yachaq runami. Saymi Hiramqa broncipita imatapis shumaq ruraq. Rey Salomón qayasiptinmi pay kaqman aywaykur rurananpaq nishqankunata ushaypa ushar ruraparqan.

¹⁵ Hiramqa ishkay jatusaq columnakunatami broncipita fundirqan. Say columnakunapa larguyninmi karqan puwaq metru y tumaypa tupuptinmi karqan pisqa metru pulan.

¹⁶ Saynölami columna jananman churananpaqpis broncipita adornukunata rurarqan. Say adornukunapa altuyninmi karqan ishkay metru y juk cuartayuq.

¹⁷ Cada columnapa adornunkunaman churananpaqmi qanchis cadinakunata rurarqan. Say cadinakunaqa tukupa nawinman awashqami karqan.

¹⁸ Saynölami columnakunapa adornunkunacho warkaränanpaqpis granäda frütakunatano ishkay fïlata rurarqan.

¹⁹ Columnakuna janancho adornukunaqa liriu wayta niraqmi kayarqan. Say adornukunapa tamäñun karqan ishkay metrunömi.

²⁰ Saynöpis cada adornupa jana tumancho intëru kuchunpami ishkay pachak (200) granädakunatano ishkay fïlata rurarqan. Saykuna cadina nawpancho kar adornupa lädun anchuraqkunachömi warkararqan.

²¹ Say columnakunata templu punkuman ichirkasirmi aluq kaqlächo kaqta Hiram jutisirqan Jaquín jutin kananpaq y isuq kaqlächo kaqtana jutisirqan Boaz jutin kananpaq.

²² Columnakunapa adornunkuna karqan liriu wayta pashtaraykaqnömi. Saynömi columnakunata rurayta usharqan.

Templupa manëjunkunata rurashqan

²³ Saynöpis yakuta shuntayänanpaqmi Hiram rurarqan broncipita fundiypa lamar niyashqan jatunkaray redondu lavatoriuta. Say lavatoriupa anchuyninmi karqan chusku metru pulan. Altuyninnami karqan ishkay metru y 25 centïmetru. Kuchunta tumaypa tupuptinmi karqan chunka kimsa metru pulan (13.5).

²⁴ Lavatoriu wirpan jawanpami ishkay fïla tumaypa karqan broncipita rurash calabäzakuna. Cada pulan metruchömi chunka calabäzakuna karqan. Say calabäzakunaqa lavatoriuwan juk piëzalami karqan.

²⁵ Say lavatoriutami jamasirqan chunka ishkay broncipita rurash törukuna jananman. Kimsa törukunami rikaraykarqan inti jeqamunan kaqläpa, kimsa kaqnami inti jeqanan kaqläpa, kimsa kaqnami norti kaqläpa y kimsa kaqnami sur kaqläpa. Say törukunaqa lapanpis sikipanakushqami kayarqan. Lavatoriunami törukunapa janancho jamaraykarqan.

²⁶ Say lavatoriuqa puwaq centïmetru raktami karqan. Shiminqa liriu wayta pashtaraykaq niraqmi karqan. Say lavatoriuman yaku juntaq chusku chunka chusku waranqa (44,000) litrumi.

²⁷ Saynöpis broncipita rurarqan chunka carrëtakunata. Carrëtakunapa larguynin y anchuynin karqan ishkay metru 80 centïmetru y altuyninnami karqan juk metru 35 centïmetru.

²⁸ Say carrëtakunata rurananpaqqa marcuta ruraskir lädunkunapami travesäñukunata churarqan.

²⁹ Carrëtakunapa chuskun lädunpami leonkunata, törukunata y querubinkunata iskupluwan laqlaypa dibujarqan. Törukuna y leonkunapa janaqanpa y uraqanpami waytakunata iskupluwan laqlaypa dibujarqan.

³⁰ Cada carrëtapami broncipita rurash chusku ruëdankuna karqan. Ruëdankunapa ëjinkunapis broncipitami karqan. Carrëtakunapa chusku esquïnanchömi tïnapa chakinkuna karqan. Chakinkunachömi waytakunata laqlaypa dibujarqan.

³¹ Carrëtapa shiminpis karqan tïna mana tikwakänanpaqmi. Say shiminmi carrëtapita yarqurarqan chusku chunka pisqa (45) centïmetru. Saynöpis shimin karqan ruyrumi. Carrëtapa altuyninmi karqan soqta chunka puwaq (68) centïmetru. Shimincho tumaypami dibüjukuna karqan. Isanqa carrëtapa lädunkuna manami ruyrusu karqan, sinöqa cuadrädumi.

³² Chuskun ruëdankunaqa ëjimanmi sigurararqan. Ëjinkunaqa carrëtawan say piëzalami karqan. Cada ruëdapa altuyninmi karqan 68 centïmetru.

³³ Ruëdankunapis carrëtapa ruëdannömi ëjiyuq, äruyuq, räyuyuq y cübuyuq karqan. Lapanpis broncipita fundishqami karqan.

³⁴ Chuskun esquïnancho rinrinkunapis carrëtawan say piëzalami karqan.

³⁵ Carrëtapa janancho kaq rebëtin ishkay chunka ishkay (22) centïmetru altumi tumaypa ruyru yarqurarqan. Rebëtinpis cajonninpis say piëzalami karqan.

³⁶ Say cajonpa tablërunkunamanmi Hiramqa jäkuraqninman iskupluwan laqlaypa dibujarqan querubinkunata, leonkunata y palmakunata. Saynölami waytakunatapis tumaypa dibujarqan.

³⁷ Say chunka carrëtakunataqa say tamäñulata y say niraqlatami fundiypa rurarqan.

³⁸ Saynölami rurarqan broncipita chunka lavatoriukunatapis. Cada tïnapa tamäñunmi karqan juk metru mas puwaq chunka (80) centïmetru. Cada tïnamanmi yaykuq puwaq pachak puwaq chunka (880) litru yaku. Say lavatoriukunatami jamasirqan rurasishqan carrëtakunaman.

³⁹ Nirkurmi pisqa carrëtakunata churarqan templupa aluq kaq nawpanman y pisqa carrëtakunata churarqan templupa isuq kaq nawpanman. Lamar niyashqan jatun lavatoriutanami churarqan templupa aluq kaqläninman. Lapanpis inti jeqamunan kaqlächömi karqan.

⁴⁰ Saynölami Hiram rurarqan mankakunata, tenäzakunata y tazonkunatapis. Salomón minkakushqannölami Hiramqa Tayta Diospa templuncho kananpaq lapanta rurarqan.

⁴¹ Say rurashqankuna karqan: ishkay columnakuna, columnakunapa puntancho adornunkuna, columnakunapa cada adornuncho tukupa nawinman awash ishkay adornukuna,

⁴² say adornupita waqiraykaq chusku pachak (400) granädakuna (say granädakunata rurarqan ishkay fïla warkuränanpaqmi),

⁴³ chunka carrëtakuna, carrëtakunapaq chunka lavatoriukuna,

⁴⁴ chunka ishkay törukuna, törukuna janancho jamaränanpaq lamar niyashqan jatun lavatoriu,

⁴⁵ mankakuna, palëtakuna y tazonkunapis. Lapan saykunatami Hiramqa Tayta Diospa wayinpaq rey Salomón nishqannöla broncipita chipipiqtaraq rurarqan.

⁴⁶ Räku mituwan moldita ruraykurmi saykunata fundirqan Sucotwan Saretán markakuna tinkuqcho. Sayqa karqan Jordán mayu nawpan pampachömi.

⁴⁷ Broncipita saysika manëjukunata rurasirmi ayka broncita gastashqantapis Salomón pësasirqannasu.

⁴⁸ Saynölami Tayta Diospa templunman churayänanpaq wakin manëjukunatapis Salomón rurasirqan. Say manëjukunami karqan: qoripita altar, tanta churakuna qoripita mësakuna,

⁴⁹ Lugar Santïsimupa aluq kaq lädunman churananpaq qoripita rurash pisqa candelabrukuna, Lugar Santïsimupa isuq kaq lädunman churananpaq qoripita rurash pisqa candelabrukuna, wayta niraq adornukuna, mechërukuna, tenäzakuna,

⁵⁰ cöpakuna, mëchapa liptanta jorqunanpaq taksha alicätikuna, tazonkuna, wishlakuna, inciensu qoshnisikuna, Lugar Santïsimuman yaykuna punkupa bisagrankuna y templu punkupa bisagrankunapis. Lapan saykunaqa qoripita rurashqami karqan.

⁵¹ Tayta Diospa templunta rurasiyta ushaskirnami templupa manëjunkunata sayman churananpaq Salomón apasirqan. Say manëjukunataqa rurasirqan Tayta Diospaq taytan David churashqan qoripita y qellaypitami.