1 Reyes 6 - Tayta Diospa Wilakuynin

Templuta Salomón sharkasishqan

¹ Chusku wata Israel nacionpa mandaqnin rey Salomón kaykarmi Zif killacho Tayta Diospa wayinta sharkasiyta qalaykurqan. Say killaqa wata qalaykunancho ishkay kaq killami karqan. Say watawanqa Israel runakuna Egiptupita yarqayämushqan chusku pachak puwaq chunka (480) watatanami cumplirkurqan.

² Tayta Diospaq rey Salomón sharkasishqan templupa larguynin karqan ishkay chunka qanchis (27) metru. Anchuyninmi karqan esqun metru y altuyninnami karqan chunka kimsa pulan (13.5) metru.

³ Templupa anchuyninnölami alarninpa larguyninpis esqun metru karqan. Anchuyninnami karqan chusku metru pulan.

⁴ Templupa ventänankunatapis rejïllayuqtami Salomón rurasirqan.

⁵ Saynöpis templuman laqaylapami tumaypa cuartukunata rurasirqan.

⁶ Say cuartukunaqa ishkay altusyuqmi karqan. Pasa kaq cuartukunapa anchuyninmi karqan ishkay metru y ishkay chunka pisqa centïmetru. Altuscho kaq cuartukunapa anchuyninmi karqan ishkay metru y qanchis chunka centïmetru. Janan kaq altuscho kaq cuartukunapa anchuyninnami karqan kimsa metru y 15 centïmetru. Cuartukunata sharkasinanpaqmi templu waqtan perqata sharkasirqan patakkunata kachapaylapa. Say patakkunamannami churayarqan cuartukunapa terrädunkunata. Saynöpami templupa perqanta uchkusirqannasu.

⁷ Templuta sharkasiyänanpaqqa laqlashlatanami rumikunata apayämurqan. Saymi templuta sharkasiyashpan martilluwan, cincilwan ni ima herramientawanpis takayarqansu.

⁸ Pasa wayicho kaq cuartukunaman yaykuna punkumi karqan templupa aluq kaq nawpancho. Altuscho y janan kaq altuscho kaq cuartukunaman wisänanpaqmi tumaypa tumaypa escalëra wisararqan.

⁹ Templupa paderninkunata sharkarkasirnami terrädukunata churasirqan. Nirkurmi terrädu rurinpa entablasirqan cedru tablakunawan.

¹⁰ Templuman laqaypa rurasishqan cuartukunapa cada pïsupa altuynin karqan ishkay metru y ishkay chunka pisqa centïmetru. Say cuartukunaqa templuman laqararqan cedru terrädukunawanmi.

¹¹ Saymi Salomónta Tayta Dios nirqan:

¹² <

¹³ Israel runakunawan tar paykunata imaypis kacharishaqsu>>.

¹⁴ Saynömi Salomónqa templuta sharkasir usharqan.

¹⁵ Templu rurin padertapis terrädupita pasayaq cedru tablakunawanmi entablasirqan. Pïsuntanapis ciprés tablakunawanmi entablasirqan.

¹⁶ Templu rurincho Lugar Santïsimu kananpaqnami rakirqan esqun metru larguta. Say cuartupa padernintapis cedru tablawanmi entablasirqan terrädupita pasayaq.

¹⁷ Lugar Santïsimupita punkuyaq karqan chunka puwaq metrumi.

¹⁸ Lapan templu rurintami cedru tablakunawan entablasirqan. Saymi perqashqan rumikuna ichiklapis rikakarqansu. Say tablakunamanmi calabäzakunata y tukturaykaq waytakunata laqlaypa dibujasirqan.

¹⁹ Templu rurincho Lugar Santïsimuta Salomón rurasirqan sayman Tayta Diospa Pactu Babulninta churananpaqmi.

²⁰ Lugar Santïsimupa larguynin karqan esqun metru, anchuynin karqan esqun metru y altuyninpis karqan esqun metrumi. Lugar Santïsimupa padernintami intërunpa qoriwan enchapasirqan. Saynölami cedrupita rurasishqan altartapis qoriwan enchapasirqan.

²¹ Saynölami Lugar Santïsimuman yaykuna cuartupa paderninkunatapis intëruta qoriwan enchapasirqan. Lugar Santïsimuman yaykuna punkupa jukaq kuchunpita jukaq kuchunyaqmi qori cadinata watarkurqan.

²² Saynölami lapan templu rurinta y Lugar Santïsimucho kaykaq altartapis qoriwan enchapasirqan.

²³ Nirkurmi olïvu qerupita ishkay querubinkunata rurasirqan Lugar Santïsimuman ichisinanpaq. Say cada querubinkunapa altuyninmi karqan chusku metru pulan.

²⁴ Cada riprankunami kayarqan ishkay metru y ishkay chunka pisqa centïmetru. Saymi jukaq ripra puntanpita jukaq ripra puntanyaq karqan chusku metru pulan.

²⁵ Saynölami jukaq querubinpa riprankunapis chusku metru pulan karqan. Saymi ishkanpis say tamäñula y say niraqla kayarqan.

²⁶ Ishkanpapis tamäñunkuna karqan chusku metru pulanmi.

²⁷ Say ishkan querubinkunatami Lugar Santïsimu cuartuman Salomón churasirqan. Ichirkasiptinmi jukaq querubinpa ripran töparqan paderman y jukaq querubinpa ripranpis töparqan jukaq paderman. Jukaq riprankunanami Lugar Santïsimu chawpincho töpanakurqan.

²⁸ Say querubinkunatami qoriwan intërunpa Salomón enchapasirqan.

²⁹ Lugar Santïsimupa paderninkunaman y Lugar Santïsimuman yaykuna cuartupa paderninkunamanpis querubinkunata, waytakunata y palmakunatami laqlaypa dibujasirqan.

³⁰ Saynölami ishkan cuartukunapa pïsunkunatapis qoriwan intëruta enchapasirqan.

³¹ Lugar Santïsimuman yaykunan punkunkunatapis olïvu qerupitami rurasirqan. Say punkupa numbralninkuna y quiciunninkunapis pisqa esquïnayuqmi karqan.

³² Olïvu qerupita rurasishqan ishkan punkukunamanmi laqlaypa dibujasirqan querubinkunata, waytakunata y palmakunata. Saykuna jananpami qoriwan intërunpa enchapasirqan.

³³ Saynölami templu punkupa quiciunninkunatapis olïvu qerupita cuadrädu listonkunata rurasirqan.

³⁴ Templu punkupa ishkan höjankunataqa ciprés qerupitami kushpiyuqta rurasirqan.

³⁵ Say punkukunamanpis querubinkunata, waytakunata y palmakunatami laqlaypa dibujasirqan. Saykunatapis qoriwanmi enchapasirqan.

³⁶ Templupa ruri kaq patiuntapis kimsa hilëra laqlash rumikunawan y juk hilëra cedru tablonkunawanmi corralasirqan.

³⁷ Chusku watana mandaq kaykarmi Zif killacho Salomónqa Tayta Diospa templunta sharkasiyänanpaq cimientu churayta qalaykasirqan.

³⁸ Chunka juk watana rey kaykarmi Bul nishqan killacho Salomónqa Tayta Diospa templunta sharkasir usharqan. Say killa karqan watacho puwaq killa kaqmi. Templuta Salomón sharkasirqan imano sharkasinanpaqpis yarpachakushqannölami. Templu aruyta ushasirqan qanchis watachömi.