1 Reyes 4 - Tayta Diospa Wilakuynin

Salomónpa yanapaqninkuna pï pï kayashqanpis

¹ Salomónqa lapan Israel runakunapa mandaqnin reymi karqan.

² Paypa yanapaqninkuna kaykunami kayarqan: Sadocpa surin Azaríasmi karqan cüra.

³ Sisapa surinkuna Elihorefwan Ahíasmi kayarqan secretariun. Ahiludpa surin Josafatmi karqan Israelcho ima päsashqankunatapis qelqaq.

⁴ Joiadapa surin Benaíami karqan soldädukunapa capitannin. Sadocwan Abiatarmi kayarqan cürakuna.

⁵ Natánpa surin Azaríasmi karqan gobernadorkunapa mandaqnin. Natánpa surin Zabudmi karqan cüra y Salomónpa yäsiqnin.

⁶ Ahisarmi karqan palaciucho kaqkunata rikaq. Abdapa surin Adonirammi karqan faynacho aruqkunapa capataznin.

⁷ Intëru Israel nacionchömi Salomónpa chunka ishkay gobernadorninkuna kayarqan. Paykunami cada ünun watacho juk killa intëru rey Salomónpaq, Salomónpa ayllunkunapaq y yanapaqninkunapaq mikuyta kamaripäyaq.

⁸ Say gobernadorkunaqa kaykunami kayarqan: Ben-hurmi gobernador karqan Efraín jalqakunacho.

⁹ Ben-decarmi gobernador karqan Macazcho, Saalbimcho, Bet-semescho, Elóncho y Bet-hanáncho.

¹⁰ Ben-hesedmi gobernador karqan Arubotcho, Socucho y intëru Hefer particho.

¹¹ Ben-abinadabmi gobernador karqan intëru Dor provinciacho. Paypa warminmi karqan Salomónpa surin Tafat.

¹² Ahiludpa surin Baanami gobernador karqan Taanaccho, Meguiducho y intëru Bet-seáncho. Bet-seán karqan Saretán cercancho y Jezreelpa uraqancho. Saynöpis gobernador karqan Bet-seánpita hasta Abel-meholayaq y Jocmeam washaläninyaqmi.

¹³ Ben-gebermi gobernador karqan Galaadcho kaykaq Ramotcho. Paypa munayninchömi karqan Manaséspa surin Jair sharkasishqan markakuna. Say markakunapis Galaadchömi kayarqan. Saynömi Basáncho Argob provinciapis paypa munaynincho karqan. Saychömi soqta chunka (60) corralash jatusaq markakuna kayarqan. Say markakunaman yaykuna punkunkunapa trancankuna kayarqan broncipita rurashqami.

¹⁴ Iddupa surin Ahinadabmi gobernador karqan Mahanaimcho.

¹⁵ Ahimaasmi gobernador karqan Neftalícho. Paypa warminmi karqan Salomónpa surin Basemat.

¹⁶ Husaipa surin Baanami gobernador karqan Asercho y Alotcho.

¹⁷ Parúapa surin Josafatmi gobernador karqan Isacar particho.

¹⁸ Elapa surin Simeimi gobernador karqan Benjamín particho.

¹⁹ Uripa surin Gebermi gobernador karqan Galaad particho. Galaad partitaqa amorreo runakunapa mandaqnin rey Sehón y Basáncho rey Ogmi munaynincho unay sarararqan. Saynöpis lapan gobernadorkunapa mandaqninmi juk gobernador karqan.

Salomón rïcu y yachaq kashqan

²⁰ Judácho taq y Israelcho taq runakunaqa lamar kuchuncho aqushanöraqmi yupaytapis mana atipaypaq saysika kayarqan. Askaq kayaptinpis mikuyänanpaq y upuyänanpaq pusuy pusuymi karqan. Saynöpami lapanpis kushish kawayaq.

²¹ 21 (5.1) Salomónpa munayninchömi karqan Éufrates mayupita hasta Filistea nacionpa lindërunyaq y Egipto nacionpa lindërunyaq. Saycho taq runakuna lapanmi impuestuta pägayaq. Salomón kawashqanyaqqa lapanpis say runakuna paypa munayninchömi kayarqan.

²² 22 (5.2) Salomónpaqmi cada junaq mikuyta shuntayaq soqta waranqa soqta pachak (6,600) kïlu alinnin kaq jarinata, chunka kimsa waranqa ishkay pachak (13,200) kïlu corrienti kaq jarinata,

²³ 23 (5.3) cëbash chunka törukunata, qewalawan ashmash ishkay chunka (20) törukunata y pachak (100) uyshakunata. Saynöpis shuntayaq tukuy casta luychukunata, wera walpakunata y wera pätukunatapis.

²⁴ 24 (5.4) Éufrates mayupita inti jeqanan kaqläpa Salomón mandarqan Tifsapita hasta Gazayaqmi. Saycho taq reykunaqa lapanpis kayarqan Salomónpa munayninchömi. Saynöpami pay mandashqan kaqkunachöqa ima guërrapis karqansu.

²⁵ 25 (5.5) Salomón kawashqanyaqqa Judácho y Israelcho taq runakuna Danpita Beersebayaq kushishqami kawayarqan. Saymi üvankuna rurincho y hïgusninkuna chakincho jawkala jamapäyarqan.

²⁶ 26 (5.6) Salomónpa carrëtankunata sutaq chusku waranqa (4,000) cawallukunapaqpis ramädakuna karqanmi. Cawallukunata loqaraq soldädukunapis kayarqan chunka ishkay waranqami (12,000).

²⁷ 27 (5.7) Mana qonqaypami rey Salomónpaq y paypa mësancho mikuqkunapaqpis gobernadorkuna töcashqan killa trukanakuypa mikuyta apayaq. Saymi imapis pishiqsu.

²⁸ 28 (5.8) Saynömi turnun chämuptin carrëtata sutaq cawallukunapaq y wakin cawallukunapaqpis cebädata y punshata apayaq.

²⁹ 29 (5.9) Tayta Diosmi Salomóntaqa yachayta qorqan shumaq tantiyakuq kananpaq. Saymi aja tantiyay kaqkunatapis payqa tantiyarirqan.

³⁰ 30 (5.10) Salomónqa mas yachaqmi karqan Egiptucho taq yachaq runakunapita y inti jeqamunanlächo taq yachaq runakunapitapis.

³¹ 31 (5.11) Pïmay runapitapis mas yachaq kaptinmi Etánpis payman tinkurqansu. Etánqa Zerapita miraqmi karqan. Saynöpis mas yachaq karqan Maholpa surinkuna Hemánpita, Calcolpita y Dardapita. Pïmaypitapis mas yachaq kashqanqa maysaychöpis musyakarqanmi.

³² 32 (5.12) Kimsa waranqa (3,000) proverbiukunatami Salomón qelqarqan. Saynölami juk waranqa pisqa (1,005) poesíakunatapis qelqarqan.

³³ 33 (5.13) Paymi tukuyläya jachakuna imano kashqantapis tantiyarqan. Saymi Líbanucho kaq jatusaq cedru qerukuna y perqakunacho winamuq qewakuna imano kashqantapis ali yachasirqan. Saynölami yachasirqan tukuy casta uywakuna, pajaqkuna, pachalanpa y lätaypa puriqkuna y pescädukuna imano kashqantapis.

³⁴ 34 (5.14) Salomón selläma yachaq kashqanta musyaykurmi maysay nacionkunapitapis runakuna shayämuq parlashqanta wiyayänanpaq.