1 Reyes 16 - Tayta Diospa Wilakuynin

¹ Saymi Hananipa surin profëta Jehúta Tayta Dios nirqan Baasata wilananpaq:

² <

³ Saymi Nabatpa surin Jeroboamta ushakäsishqänöla qamta y qampita miraqkunatapis ushakäsiyäshayki.

⁴ Markacho wanuqkunataqa alqukunami mikuyanqa. Markapita juklächo wanuqkunataqa wiskurkunami y condorkunami mikuyanqa>>.

⁵ Baasa rurashqankuna y guërrakunacho vincishqankuna lapanmi qelqaraykan Israel nacionpa mandaqnin reykunapa acta libruncho.

⁶ Baasa wanuykuptinnami Tirsa markacho pampayarqan. Paypa trukannami surin Elana rey karqan.

⁷ Jeroboamno y surinno Tayta Diosta rabyanäsir jusalikushqanpita y Jeroboampa ayllunkunata wanusishqanpitami Hananipa surin profëta Jehú Tayta Dios tantiyasishqanno Baasapa y ayllunkunapa contran wilakurqan.

Israel nacioncho Ela rey kashqan

⁸ Judá nacioncho Asa ishkay chunka soqta (26) watana rey kaykaptinmi Baasapa surin Ela Tirsa markapita Israel runakunata mandar qalaykurqan. Payqa ishkay watalami mandarqan.

⁹ Elapa soldädunkunapa juk capitanninmi karqan Zimri. Paymi guërra carrëtakunata pulanta munaynincho sarararqan. Capitannin kaykarmi rey Elapa contran sharkurqan. Juk kutimi Tirsa markacho rey Ela palaciuta rikaq Arsapa wayincho upyaykarqan. Saycho pasaypa shinkash kaykaptinmi

¹⁰ Zimri chaykur wanusirqan. Nirkurmi kikinna rey kayman yaykurqan. Say päsarqan Judá nacioncho ishkay chunka qanchis (27) wata Asa rey kaykaptinmi.

¹¹ Rey karnami Zimriqa Baasapa surinkunata, ayllunkunata y amïgunkunata chipyaq wanusirqan. Manami juklaylatapis olqutaqa kachaykurqansu.

¹² Lapanta sayno wanusirqan Tayta Diospa wilakuqnin profëta Jehú wilakushqannölami.

¹³ Rey Baasapa contran Jehú sayno wilakurqan Baasa y surin Ela jusalikuyashqanpita y jusalikuyänanpaq Israel mayinkunata shakyäsiyashqanpitami. Saynöpami ïdulukunata adorar Israel runakunata kuyaq Tayta Diosta fiyupa rabyanäsiyarqan.

¹⁴ Ela imata rurashqanpis lapanmi qelqaraykan Israel nacionpa mandaqnin reykunapa acta libruncho.

Israel nacioncho Zimri rey kashqan

¹⁵ Ishkay chunka qanchis (27) wata Judá nacioncho Asa rey kaykaptinmi Tirsa markacho Zimri rey kayman yaykurqan. Isanqa rey karqan qanchis junaqlami. Say junaqkunami Israel soldädukuna Filistea nacioncho kaq Gibetón markata atacaykäyarqan.

¹⁶ Saychömi Israel soldädukuna musyayarqan rey Elata wanuykasir Zimrina paypa trukan rey kaykashqanta. Sayta musyaykur jinan hörami capitannin Omrita churayarqan rey kananpaq.

¹⁷ Sayno churayaptinmi Omriqa Gibetón markata manana atacashpan lapan Israel soldädukunawan Tirsa markatana atacaq aywayarqan.

¹⁸ Zimriqa tashqan markata atacaykäyashqanta tantiyaykurmi palaciucho kaykaq törri rurinman yaykukuykurqan. Nirkur törrita sarirkasiptinmi kikintapis nina rupar wanusirqan.

¹⁹ Sayno wanurqan Tayta Diosta rabyanäsir jusalikushqanpitami. Ïdulukunata adorayänanpaq Israel runakunata Jeroboam shakyäsishqannömi Zimripis shakyäsirqan.

²⁰ Zimri rurashqankuna y Elapa contran sharkur wanusishqanpis Israel nacionpa mandaqnin reykunapa acta librunchömi qelqaraykan.

Israel nacioncho Omri rey kashqan

²¹ Saypitanami Israel nación wakin runakuna munayarqan Ginatpa surin Tibni rey kananta y wakinnami munayarqan Omri rey kananta.

²² Saymi Omripa favornin kaqkuna pelyar vinciyarqan Ginatpa surin Tibnipa favornin kaqkunata. Tibnita wanusiyaptinmi Omrina paypa trukan rey karqan.

²³ Judá nacioncho kimsa chunka juk (31) wata Asa rey kaykaptinmi Israel nacioncho Omri rey kayman yaykurqan. Payqa chunka ishkay watami Israel runakunapa mandaqnin rey karqan. Soqta watami Tirsa markapita mandarqan.

²⁴ Saypita juk markata sharkasinanpaqmi Samaria lömata Semer runapita Omri rantirqan. Say lömapa chanintami pägarqan soqta chunka soqta (66) kïlu qellayta. Saycho markata sharkarkasirmi jiruruypa corralasirqan. Lömapa punta kaq duëñunpa jutin Semer kaptinmi say markata jutisirqan Samaria kananpaq.

²⁵ Omriqa Tayta Diosta mana cäsukurmi punta kaq reykunapitapis peor jusalikurqan.

²⁶ Nabatpa surin Jeroboam jusalikushqannömi jusalikurqan. Ïdulukunata adorayänanpaq Israel runakunata Jeroboam shakyäsishqanno paypis shakyäsirmi Tayta Diosta fiyupa rabyanäsirqan.

²⁷ Omri rurashqankuna y guërrakunacho vincishqankuna qelqaraykan Israel nacionpa mandaqnin reykunapa acta librunchömi.

²⁸ Wanuykuptinmi Samaria markaman pampayarqan.

Israel nacioncho Acab rey kashqan

²⁹ Judá nacioncho kimsa chunka puwaq (38) wata Asa rey kaykaptinmi Israel nacioncho Omripa surin Acab rey kayman yaykurqan. Paymi Israel runakunata Samaria markapita mandarqan ishkay chunka ishkay (22) wata.

³⁰ Acabqa Tayta Diosta mana cäsukurmi punta kaq reykunapitapis peor jusalikurqan.

³¹ Nabatpa surin Jeroboam jusalikushqannölami paypis jusalikurqan. Saynöpis Sidón runakunapa mandaqnin rey Et-baalpa surin Jezabelta warminpaq ashiykurmi Baal diostapis adorarqan.

³² Saymi Baalpaq templutapis altartapis Samariacho sharkasirqan.

³³ Asera diösapaqpis qeruta jawisirmi wakin kaq reykunapitapis peor Israel runakunata kuyaq Tayta Diosta rabyanäsirqan.

³⁴ Acab mandaq kaykashqan wisanmi Bet-elcho taq Hiel jutiyuq runa Jericó markata yapay alsasirqan. Cimientukunata perqayta qalaykuptinmi qechpa surin Abiram wanurqan. Marka punkuta tanasiptinnami nunush kaq surin Segubna wanurqan. Lapanpis saykuna päsarqan Nunpa surin Josué nishqannölami.