1 Reyes 10 - Tayta Diospa Wilakuynin

Sabá nacionpa mandaqnin warmi Salomónta tapunanpaq aywashqan

¹ Tayta Dios yanapaptin Salomón seqaypa yachaq kashqanta musyarmi Sabá nacionpa mandaqnin warmi seqaypa aja tapukuykunata tapuq aywarqan.

² Aska ashmaynin runakunawanmi Jerusalénman charqan mushkuq jachakunata, aska qorita y kuyaylapaq cuestaq rumikunata camëllukunawan chaqnash. Salomónman chaykurmi lapan yarpashqankunata tapurqan.

³ Tapuylantami Salomónqa churaypa churar lapanta contestarqan. Ima tapushqanpis paypaqqa manami ajasu karqan.

⁴ Salomón yachaq kashqanta y palaciunta rurasishqanta rikarmi Sabá nacionpa mandaqnin warmi

⁵ pasaypa admirash rikakurqan. Saynöpis admirash rikakurqan ali mikuykunata rikar, mandäsiqninkunapa cuartunkunata rikar, ashmaynin runakunata y jatirashqan mödananta rikar, cöpa sirviqninkunata rikar Tayta Diospaq sacrificiukunata templucho rupasishqanta rikar.

⁶ Saymi rey Salomónta nirqan: <

⁷ Sayno wilayämaptinpis kikï rikashqäyaq manami criyirqäsu. Kananmi isanqa tantiyakü wilayämashqanpitapis mas yachaq y mas rïcu kashqaykita.

⁸ Shumaq tantiyakuykur parlashqaykita wiyar ¡ima kushishqaraq mandäsishuqnikikuna y sirvishuqnikikuna kaykäyan!

⁹ ¡Tayta Diosniki alabash kaykuläsun kuyashushpayki Israel nacionpa mandaqnin rey kanaykipaq churashushqaykipita! Israel runakunata imaypis kuyashpanmi poquqtapis muchuqtapis ali rikanaykipaq churashushkanki>>.

¹⁰ Nirkurmi Salomónta qaraykurqan kimsa waranqa esqun pachak soqta chunka (3,960) kïlu qorita, aska perfümikunata y kuyaylapaq cuestaq aska rumikunatapis. Salomónta qaraykushqan perfümikunatanöqa manami imaypis saysika perfümita Israel nacionman apayämurqansu.

¹¹ (Saynölami rey Hirampa negociunta apaq büquikunawan Ofir partipita apayämuq aska qorita, sándalo jutiyuq ali qerukunata y kuyaylapaq cuestaq rumikunatapis.

¹² Say sándalo qerupitami rey Salomón rurasirqan Tayta Diospa templunpa balconninkunata y palaciupa balconninkunatapis. Saynöpis tukaqkuna tukayänanpaqmi rurasirqan arpakunata y salteriukunata. Manami imaypis Judáman chäsiyarqansu sándalo qeruta sayno askataqa.)

¹³ Sabá nacionpa mandaqnin warmitami rey Salomón aska qaraykunata qaraykurqan. Say jananmanmi say warmi imata manakushqantapis qaraykurqan. Nirkurnami mandaq warmiqa nacionninman ashmaynin runakunawan kutikurqan.

Salomón rïcuyashqan

¹⁴ Cada watami qorita Salomón chaskiq ishkay chunka ishkay waranqa (22,000) kïluta.

¹⁵ Say jananmanmi negociantikuna, Arabia nacionpa mandaqnin reykuna y Israel nacionpa gobernadorninkuna pägayashqan impuestutapis chaskiq.

¹⁶ Ishkay pachak (200) escüdukunatami rey Salomón qoripita rurasirqan martilluwan takaylapa. Say escüdukuna cada ünunmi soqta kïlu lasarqan.

¹⁷ Saynölami mas kimsa pachak (300) escüdukunatapis qoripita rurasirqan martilluwan takaylapa. Say escüdukunaqa cada ünunmi juk kïlu pulan lasarqan. Saykunataqa Líbano Munti jutiyuq palaciunmanmi churasirqan.

¹⁸ Saynölami trönuntapis marfilpita ruraykasir qori püruwan enchapasirqan.

¹⁹ Say trönu karqan soqta grädayuq, waqtanpa redondu y ishkay tuknakunayuqmi. Trönupa cada lädunchömi rurasishqan juk león ichiraykarqan.

²⁰ Grädakunapa nawpankunachöpis chunka ishkay rurasishqan leonkunami kayarqan. Grädakunapa jukaq kuchuncho karqan soqta leonkuna y jukaq kuchunchönami karqan soqta leonkuna. Manami mayqan nacionpa mandaqnin reypis say trönutanöqa kuyaylapaqtaqa rurasirqansu.

²¹ Rey Salomónpa cöpankunapis y Líbano Munti jutiyuq palaciucho kaykaq lapan manëjukunapis qorilapitami karqan. Say palaciuchöqa manami imapis karqansu yuraq qellaypitaqa. Qellaypita kaqtaqa Salomón rey kashqan wisan manami pipis cäsupäyaqsu.

²² Rey Salomónpa büquinkuna cada kimsa watacho rey Hirampa büquinkunawan juntu Tarsisman kutimurmi apayämuq qorita, yuraq qellayta, marfilta, mönukunata y pävu realkunatapis.

²³ Rey Salomónqa maysay nación reykunapitapis mas rïcu y mas yachaqmi karqan.

²⁴ Yachaq kananpaq Tayta Dios yanapaptinmi lapan nacionpitapis payman aywayarqan yachasishqanta wiyayänanpaq.

²⁵ Aywarmi yuraq qellaypita y qoripita rurasiyashqanta Salomónta qarayänanpaq apayaq. Saynöpis apayaq mödanakunata, armakunata, mushkuq jachakunata, cawallukunata y mulakunatapis. Cada watami imaykatapis askata Salomón chaskiq.

Cawallukunata y carrëtakunata Salomón rantishqan

²⁶ Salomón rantirqan saysika carrëtakunata y cawallukunatami. Saynöpami paypa karqan juk waranqa chusku pachak (1,400) carrëtankuna y chunka ishkay waranqa (12,000) cawallunkuna. Say cawallukunata wakinta churarqan guërra carrëtakuna kaykäyashqan cuartilkunacho kayänanpaq y wakintanami churarqan Jerusalén palaciun cercacho kayänanpaq.

²⁷ Rey Salomón shuntasishqan yuraq qellaypis shalanöraqmi Jerusaléncho saysika karqan. Saynölami cedru jachatapis Sefelacho plantasirqan hïgus jachanöraq saysika kananpaq.

²⁸ Salomón kachashqan negociantikunami Egiptupita y Ciliciapita cawallukunata rantiyämuq.

²⁹ Egiptupita rantiyämushqan juk carrëtami cuestaq soqta pachak (600) yuraq qellay y juk cawallunami cuestaq pachak pisqa chunka (150) yuraq qellay. Say cawallukunata y carrëtakunatami wakintaqa rantikuyaq heteo runakunapa mandaqnin reykunata y wakintana Siria runakunapa mandaqnin reykunata.