1 Pedro 4 - Tayta Diospa Wilakuynin

Mana jusalikuypa kawanansipaq yäsishqan

¹ Noqansi rayku Jesucristo kay pasacho nakash kaykaptinqa qamkunapis nakayänaykipaq kamarikush kaykäyay. Jesucristuta chaskikuyashqaykipita nakarqa jusalikuytapis manami munayankinasu.

² Sayno kawarmi lutan ruraykunaman umayki churakashnasu kawayanki, saypa trukanqa kay pasacho kawayashqaykiyaq Tayta Dios munashqannölami kawaykäyanki.

³ Nawpata wakin runakunanölami jusalikur mana penqakuypa chïnäkur waynäkur purikuyarqayki, gustapäkurmi mana alikunata rurayarqayki, upyalaman churakash kawayarqayki y ïdulukunatapis adorayarqayki. Kananqa amana sayno kawayaynasu.

⁴ Nawpata kawayashqaykino manana kawayaptikimi yanasaykikuna mana tantiyakuyashpan manakaqman churayäshunki.

⁵ Paykunaqa kawaqkunata y wanushkunata juzgaq Tayta Diostami cuentata qoyanqa.

⁶ Lapan runakunata juzgananpaq kaptinmi Jesucristupa ali wilakuyninta wilakuyarqan. Saymi chaskikuqkuna wanushna kaykarpis Tayta Diospa nawpanchöna kawaykäyan.

Yanapänakunansipaq yäsishqan

⁷ Kay pasa ushakänanpaq manami aykäpis pishinnasu. Sayno kaykaptinqa Tayta Dios munashqanno kawayänaykipaq yarpachakur imay hörapis Tayta Diosta manakuyay.

⁸ Imano karpis lapan shonquykikunawan kuyanakuyay. Rasunpaypa kuyakuq runaqa imaykata rurayaptinpis perdonanmi.

⁹ Pipis wayikiman chämuptin mana jamuraylapa posädasiyanki.

¹⁰ Tayta Diosmi kuyapäyäshushpaykimi tukuy niraq habilidäta qoyäshushkanki. Sayno kaykaptinqa habilidäta chaskiyashqaykiman tupu jukniki juknikipis yanapänakuyay. Sayno yanapänakurqa Tayta Dios munashqannömi kawaykäyanki.

¹¹ Wilakuyänaykipaq habilidäta chaskish kaykarqa Tayta Diospa wilakuyninta wilakuyay. Wakinta yanapäyänaykipaq habilidäta chaskish kaykarqa Tayta Dios yanapäyäshushqaykiman tupu yanapäyay. Saynöpami Jesucristo kayninpa Tayta Dios lapanchöpis alabash kanqa. ¡Tayta Dios imayyaqpis munayyuqmi! ¡Pay imayyaqpis alabash kaykuläsun! Amén.

Nakarpis kushish kawanansipaq yäsishqan

¹² Kuyay wawqi panikuna, imayka pruëbakunata päsarpis ama lakikuyaysu <<¿imanirtaq kayno nakaykä?>> niyashpayki.

¹³ Saypa trukanqa Jesucristo nakashqanno nakayashpayki kushikuyay. Sayno nakarpis kay pasaman chipipiykar kutimushqan junaqqa fiyupami kushikuyanki.

¹⁴ Tayta Diospa munayyuq Espïritun qamkunawan kaykaptinqa Jesucristuta chaskikuyashqaykipita ashliyäshuptikipis kushikuyay. [Ashliyäshushpaykiqa Jesucristutami manakaqman churaykäyan. Qamkunami isanqa payta alabaykäyanki.]

¹⁵ Wanusikuq kayashqaykipita, suwa kayashqaykipita, jatichi kayashqaykipita o imatapis lutankunata rurayashqaykipita nakarqa penqakuypaqmi kayanki.

¹⁶ Jesucristuta chaskikuyashqaykipita nakarqa ama penqakuyaysu. Saypa trukanqa salvayäshushqaykipita Tayta Diosta kushish alabayay.

¹⁷ Jesucristuman yärakuqkuna nakayänanpaq kaq tiempu chämushnami. Noqansicho nakaykuna qalaykuykaptinqa Tayta Diospa ali wilakuyninta mana cäsukuqkuna ¡imajinanparaq nakaykuyanqa!

¹⁸ Tayta Diosta cäsukur kawaqkunapis nakarraq salvakuykäyaptinqa Diosta mana cäsukuqkuna ¡imanöraq kayanqa!

¹⁹ Tayta Dios munashqanno kawayashqaykipita nakarpis kamamaqninsi Tayta Diospa makinman kawaynikita kachaykur alikunata imaypis rurayanki. Payqa ima päsayäshuptikipis manami qonqayäshunkisu.