1 Pedro 2 - Tayta Diospa Wilakuynin

¹ Jesucristupa wilakuyninta chaskikushna kaykarqa jusalikuyta kachariyayna. Ama lulakuyaysu, ama ali tukuyaysu, ama chikinakuyaysu ni wilachipis kayaysu.

² Iti wamra chuchunashqanno qamkunapis Tayta Diospa palabranta imaypis yachakuyay. Saynöpami imayka wamra winar tantiyakushqanno Tayta Dios munashqanno kawayänaykipaq tantiyakuyanki. Saypaqmi Tayta Dios salvayäshushkanki.

³ Sayno yachakuyänaykipaqmi Tayta Dios kuyakuq kashqanta tantiyayashkankina.

Cimientucho alinnin rumino Jesucristo kashqan

⁴ Jesucristuta runakuna manakaqman churayaptinpis cimientucho alinnin rumino kananpaqmi Tayta Dios churash. Sayno kaykaptinqa Jesucristuman yärakuyay.

⁵ Qamkunapis rumino kayaptikimi Tayta Dios churaykäyäshunki templun kayänaykipaq y payta sirviq santu cürakuna kayänaykipaqpis. Saymi altarman churash sacrificiuno kashpansi lapan shonquykikunawan payta sirviyänayki. Jesucristupa yanapayninwan sirvirmi Tayta Diospa shonqunpaqno kayankipaq.

⁶ Jesucristupaqmi Tayta Diospa palabranpis kayno nikan: <>.

⁷ Yärakuqkunapaqqa Jesucristo seqaypa kushikuypaqmi kaykan. Mana yärakuqkunapaqmi isanqa Tayta Diospa palabrancho kayno qelqaraykan: < nir jitariyashqanmi wayi esquïnan cimientuchöna churaraykan>>.

⁸ Mastapis kaynömi nikan: <>. Jesucristuman mana yärakuqkunaqa Tayta Diospa palabranta mana cäsukurmi say rumicho takakaqno kaykäyan. Sayno kayänanpaqmi destinash kayarqan.

⁹ Qamkunami isanqa kaykäyanki Tayta Dios akrashqan runakuna, payta sirviq cürakuna, kuyashqan santa nación runakuna y paypa makincho kaykaq runakuna. Paymi sakäpakushno kawaykäyaptiki aksinman jorquyäshushkanki kuyakuq kashqanta pïmaytapis wilapäyänaykipaq.

¹⁰ Nawpataqa manami Diospa wamransu kayarqayki. Kananmi isanqa wamrankunana kaykäyanki. Nawpataqa manami kuyapäyäshurqaykisu. Kananmi isanqa kuyapäyäshushkankina.

Tayta Dios munashqanno kawanansipaq nishqan

¹¹ Kuyay wawqi panikuna, kay pasacho qorpanöla kayaptikimi qamkunata ruwakü lutan yarpashqaykikunata mana rurayänaykipaq. Say yarpaykunaqa contraykikunami kaykan.

¹² Jesucristuta mana chaskikuqkunawan ali kawayay. Ali kawayashqaykita rikarmi manakaqkunata kanan jitapäyäshushpaykipis Jesucristo kutimunan junaq Tayta Diosta alabayanqa.

Autoridäkunata cäsukunansipaq yäsishqan

¹³ Señor Jesucristuta pipis manakaqman mana churananpaq lapan mandayäshuqnikikunata cäsukuyay nación mandaq rey kaptinpis

¹⁴ y autoridäkuna kayaptinpis. Autoridäkunatami rey churash mana ali ruraqkunata castigayänanpaq y ali ruraqkunapa favornin sharkuyänanpaq.

¹⁵ Tayta Dios munan alilata rurar kawayänaykitami. Sayno kawayaptikiqa Diosta mana cäsukuq runakuna manami washaykita rimayanqanasu.

¹⁶ Munayashqaykino kawayänaykipaq librimi kaykäyanki. Librina karpis ama jusalikuyankisu. Saypa trukanqa Tayta Diosta sirvir pay munashqannöla kawayanki.

¹⁷ Lapan runakunatapis respitayanki. Yärakuq mayikikunawan kuyanakuyanki. Tayta Diosta mansapakuyanki. Reytapis respitayanki.

Patronninta cäsukuyänanpaq yäsishqan

¹⁸ Ashmaykuna, patronniki ali runa kaptinpis o yaqa kaptinpis respitar cäsukuyanki.

¹⁹ Tayta Dios munashqanno kawayashqaykipita jusayuqtano nakasiyäshuptikipis ama jaqayäyaysu. Mana jaqayaypa kawarqa alitami ruraykäyanki.

²⁰ Lutanta rurayashqaykipita nakarqa ¿ima alitataq ruraykäyanki? Alikunata rurayashqaykipita nakarmi isanqa Tayta Diospa shonqunpaqno kawaykäyanki.

²¹ Sayno nakayänaykipaqmi Tayta Dios qayayäshushkanki. Jesucristo noqansi rayku nakash kaptinmi tantiyakunsi pay nakashqanno noqansipis nakanansipaq kashqanta.

²² Pay manami jusalikurqansu ni pitapis lulaparqansu.

²³ Runakuna ashliyaptinpis upälakurqanmi. Nakasiyaptinpis manami juraparqansu. Saypa trukanqa pitapis mana jananpaypa juzgaq Tayta Diospa makinmanmi kachaykurqan.

²⁴ Jesucristo cruzcho nakarmi noqansipa jusansipita wanurqan. Sayno wanurqan noqansipis jusalikuypaq wanur Tayta Dios munashqanno kawanansipaqmi. Yawarninta jicharmi aliyäsimashkansi.

²⁵ Nawpataqa oqrakash uyshanömi karqansi. Kananmi isanqa Jesucristupa makinchöna kaykansi. Paymi misimaqninsi y ali rikamaqninsi kaykan.