1 Juan 4 - Tayta Diospa Wilakuynin

Lutan yachasikuqkuna imano kayashqanpis

¹ Kuyay wawqi panikuna, kay pasacho askaqmi lula profëtakuna puriykäyan. Sayno kaykaptinqa pipis <> nir chämuptin shumaqraq tantiyapäyay Tayta Diospa wilakuqnin rasunpaypa kashqanta o mana kashqantapis.

² Tayta Diospa wilakuqnin karqa Jesucristo kay pasaman shamur rasunpaypa runa kashqantami yachasin.

³ Jesucristo rasunpaypa runa kashqanta mana yachasirqa manami Tayta Diospa wilakuqninsu kaykan, sinöqa anticristumi. Anticristo shamunanpaq kashqanta musyayashqaykinölami kananqa anticristukuna kay pasacho puriykäyan.

⁴ Kuyay wamräkuna, Tayta Diospa wamrankunami kaykäyanki. Qamkunacho kaykaq Espíritu Santuqa kay pasacho kaykaq espïritupitapis mas munayyuqmi kaykan. Pay yanapäyäshuptikimi say lutan yachasikuqkunata chaskipäyankisu.

⁵ Paykunaqa Diospa wamran mana karmi yarpaylanpita yachaykäsiyan. Saymi paykunataqa Diosta mana cäsukuq runakunala chaskipäyan.

⁶ Noqakunaqa Diospa wilakuqninmi kaykäyä. Saymi wilakuyashqäta chaskikuqkuna Tayta Diosta reqiyan. Wilakuyashqäta mana chaskikuqkunaqa manami Tayta Diospa wilakuqninsu kayan. Saynöpami musyansi mayqan runa rasun kaqta yachasishqanta y mayqan runa lutanta yachasishqantapis.

Tayta Dios kuyamashqansino kuyanakunansipaq nishqan

⁷ Kuyay wawqi panikuna, Tayta Dios kuyakuq kaykaptinqa jukninsi jukninsipis kuyanakushun. Kuyanakurqa Diospa wamran karmi payta reqinsi.

⁸ Mana kuyanakurmi isanqa Diosta reqinsisu. Tayta Diosqa kuyakuqmi kaykan.

⁹ Mana ushakaq kawayta tarinansipaqmi Tayta Dios japalan Surinta kay pasaman kachamurqan. Saynöpami pasaypa kuyamashqansita musyasimashkansi.

¹⁰ Rasunpaypa kaq kuyakuyqa manami noqansi Tayta Diosta kuyashqansisu kaykan, sinöqa noqansita pay kuyamashqansimi. Jusalikushqansipita sacrificiu kananpaqmi Surin Jesucristuta kachamurqan. Saymi rasunpaypa kaq kuyakuyqa kaykan.

¹¹ Kuyay wawqi panikuna, Tayta Dios sayno kuyaykämashqaqa noqansipis kuyanakur kawashun.

¹² Tayta Diosta manami pipis rikashsu. Sayno kaptinpis kuyanakushqami noqansiwan kaykan. Saymi yanapaykämansi pay kuyakuq kashqanno noqansipis kuyakuq kanansipaq.

¹³ Espíritu Santuta chaskikush karmi Tayta Dios noqansiwan kaykashqanta y noqansipis paywan kaykashqansita musyansi.

¹⁴ Saynöpis kikïkunami rikayashkä Diospa Surin Jesucristo kay pasacho kaykaqta. Saymi wilakuyä runakunata salvananpaq Tayta Dios payta kachamushqanta.

¹⁵ Jesucristo Tayta Diospa Surin kashqanta criyir chaskiq kaqqa Tayta Dioswanmi kaykan y Tayta Diospis paywanmi kaykan.

¹⁶ Kananqa Tayta Dios kuyamashqansita musyarmi payman yärakuykansi. Tayta Diosqa kuyakuqmi kaykan. Noqansipis kuyanakurqa paywanmi kaykansi y paypis noqansiwanmi kaykan.

¹⁷ Saynöpami Tayta Dios munashqanno kuyanakunsi. Sayno kuyanakur kawar y Jesucristo kay pasacho kawashqanno kawarqa juiciu finalcho manami mansakushunsu.

¹⁸ Tayta Dios kuyamashqansita mana tantiyarmi castigamänansipaq kashqanta yarpansi. Tayta Dios kuyamashqansita tantiyarmi isanqa mana castigamänansipaq kashqanta musyar mansansisu.

¹⁹ Puntata pay kuyamashqami noqansipis [payta] kuyansi.

²⁰ Pipis <> nikar runa mayinta chikirqa lulakuykanmi. Runa mayinsita rikaykar mana kuyaykarqa ¿imanöparaq mana rikashqansi Tayta Diosta kuyashwan?

²¹ Tayta Diospa mandamientunchömi nimansi: <>.