1 Juan 2 - Tayta Diospa Wilakuynin

¹ Kuyay wamräkuna, kay cartata cartakaykämü mana jusalikuyänaykipaqmi. Jusalikush imashqaqa Tayta Diospa nawpancho favorninsi sharkunanpaq abogädunsi kaykanmi. Say abogädunsiqa alilata ruraq Jesucristumi.

² Paymi sacrificiu kash jusansikunata Tayta Dios perdonamänansipaq. Manami noqalansi perdonash kanansipaqsu wanurqan, sinöqa maysaychöpis runakuna perdonash kayänanpaqmi.

³ Tayta Diosta reqishqansita musyansi mandamientunkunata cumplirmi.

⁴ Mayqansipis Tayta Diosta reqishqansita nikarpis mandamientunkunata mana cäsukurqa manami rasun kaqtasu parlansi, sinöqa lulakuykansimi.

⁵ Mandamientunkunata cumplirmi isanqa Tayta Diosta rasunpaypa kuyansi. Saynöpami musyansi Tayta Diospa makincho kashqansita.

⁶ Pipis Tayta Diospa makincho kaykashqanta nirqa Jesucristo kawashqanno kawasun.

Mushuq mandamientu

⁷ Kuyay wamräkuna, jukniki juknikipis kuyanakuyanki. Kay mandamientu manami mushuq mandamientusu kaykan, saypa trukanqa unaypita pasa musyashqansi mandamientumi. Say mandamientuta maynami musyayanki.

⁸ Mushuq mana kaptinpis kananqa musyayanki Jesucristo kuyamashqansino kuyanakuyänaykipaq kashqantami. Saymi say mandamientu mushuq kaykan. Jesucristo kuyakuq kashqannömi qamkunapis kuyanakuykäyanki. Sayno kuyanakurmi sakaypita aksiman yarquq japuy kaykäyanki.

⁹ Pï runapis <> nikar runa mayinta chikirqa sakäpakushlaraqmi kaykan.

¹⁰ Runa mayinta kuyarmi isanqa aksicho kaykaqno kaykan. Sayno kawaptinqa pïmaypis payta rikakur alimi kawayanqa.

¹¹ Runa mayinta chikiq kaqqa sakäpakushnömi kaykan. Qapra runa maypa aywashqantapis mana tantiyashqannömi Tayta Dios munashqanno kawananpaqpis tantiyansu.

Imanir Juan cartakushqan

¹² Kuyay wamrakuna, qamkunapaq cartakaykämü Jesucristo noqansi rayku wanushqanpita perdonash kayaptikimi.

¹³ Taytakuna, qamkunapaq cartakaykämü qalaykunanpita pasa kawaq Jesucristuta reqish kayaptikimi. Maqtakuna y jipashkuna, qamkunapaq cartakaykämü Satanásta vincish kayaptikimi.

¹⁴ Kuyay wamrakuna, qamkunapaq cartakaykämü Tayta Diosta reqish kayaptikimi. Taytakuna, qamkunapaq cartakaykämü qalaykunanpita pasa kawaq Jesucristuta reqish kayaptikimi. Maqtakuna jipashkuna, qamkunapaq cartakaykämü kalpayuq kayashqaykipitami y Diospa wilakuyninta cäsukuyashpayki Satanásta vincish kayaptikimi.

Diosta mana cäsukuq runakuna kawayashqanno mana kawanansipaq nishqan

¹⁵ Diosta mana cäsukuq runakunanöqa ama kawayaysu. Paykunano kawarqa Tayta Diosta manami kuyaykäyankisu.

¹⁶ Diosta mana cäsukuq runakunaqa shonqunkuna munashqanno lutantami ruraykäyan, imatapis rikashqantami munapaykäyan y lapanpitapis mas ali rikash kaytami munaykäyan. Paykunano kawarqa manami Tayta Dios munashqannösu kawaykäyanki, sinöqa jusasapa runakunanömi.

¹⁷ Kay pasapis y runakuna munapäyashqanpis ushakanqami. Tayta Dios munashqanno kawaq runakunami isanqa mana ushakaq kawayta tariyanqa.

Anticristukuna yuriyämunanpaq nishqan

¹⁸ Kuyay wamräkuna, ultimu tiempuchönami kaykansi. Anticristo shamunanpaq kashqanta musyayashqaykinöpis kananqa aska anticristukunami yuriyämush. Saynöpami musyansi ultimu tiempuchöna kaykashqansita.

¹⁹ Say runakunaqa nawpata noqansiwan shuntakäyash karpis kananqa manami shuntakäyämunnasu. Paykuna manami Jesucristuta rasunpaypasu chaskikuyash. Jesucristuta rasunpaypa chaskikush karqa noqansiwanmi shuntaraykäyanman karqan. Noqansipita yarqush kaptinmi musyansi Jesucristuta mana chaskikuyashqanta.

²⁰ Qamkunamanqa Jesucristumi Espíritu Santuta kachamush. Saymi tantiyayanki mayqan yachasikuykuna ali kashqanta y mayqan mana ali kashqantapis.

²¹ Saynöpis tantiyayanki lulakuqkuna Tayta Diospa wilakuyninta wilakuyänanpa trukanqa lutanta yachaykäsiyashqanta. Rasun kaq yachasikuyta tantiyayashqaykita musyarmi cartakaykämü.

²² Say lulakuqkunaqa yachaykäsiyan <> nirmi. Sayno yachasiqkunaqa anticristumi kaykäyan. Paykunaqa Tayta Diostapis Jesucristutapis ñëgayanmi.

²³ Jesucristo Tayta Diospa Surin kashqanta pipis ñëgarqa Tayta Diostapis ñëganmi. <> nirqa Tayta Diostapis chaskikunmi.

²⁴ Sayno kaykaptinqa Jesucristupa wilakuyninta yachakuyashqaykita ama qonqäyaysu. Mana qonqarqa Tayta Diospa y Surin Jesucristupa makinchömi kawaykäyanki.

²⁵ Paymi promitimashkansi gloriacho imayyaqpis kawanansipaq.

²⁶ Kay cartata cartakaykämü lutan yachasikuqkunata mana chaskipäyänaykipaqmi.

²⁷ Jesucristupita chaskiyashqayki Espíritu Santu qamkunawanmi kaykan. Paymi rasun kaqlata lapantapis tantiyaykäsiyäshunki. Manami imaypis lulapäyäshunkisu. Sayno kaykaptinqa lutan yachasikuykunata ama chaskiyaysu. Espíritu Santu tantiyasiyäshushqaykinöla Jesucristuman yärakur imaypis kawayay.

²⁸ Kuyay wamräkuna, Jesucristupa makincho imaypis kawayay. Sayno kawarmi Jesucristo kutimuptin mana mansariypa y mana penqakuypa nawpancho kayankipaq.

²⁹ Musyansimi Jesucristo imaypis alilata ruraq kashqanta. Saymi pipis alilata rurarqa Tayta Diospa wamran kaykan.