1 Corintios 7 - Tayta Diospa Wilakuynin

Majayuqkunapaq yachasikuy

¹ Kanan tantiyasiyäshayki cartakayämushqaykicho tapuyämashqaykipita. Alimi kanman warmiwan runa mana kakuptin.

² Sayno kaptinpis jukwan jukwan mana kakuyänanpaq cada ünun majayuq kayäsun.

³ Runanta warmin cuerpunta ama michäsunsu. Saynöla warminta runanpis cuerpunta ama michäsunsu.

⁴ Majasakaptinnaqa warmipa cuerpun manami kikinpanasu, sinöqa runanpanami. Y runanpa cuerpunpis manami kikinpanasu, sinöqa warminpanami.

⁵ Sayno kaykaptinqa majaykiwan cuerpuykita ama michänakuyaysu. Wakinkunaqa majanwan wilanakuyan Tayta Diosta manakuyänan junaqkuna päsashqanyaq awantakuyänanpaqmi. Sayno wilanakurqa wilanakuyashqayki junaqyaqla awantakuyanki. Wilanakuyashqayki junaq cumpliskiptin isanqa majaykiwan yapay kakuyanki. Sayno mana rurayaptikiqa Satanásmi mayqaykitapis jusaman ishkisiyäshunki.

⁶ Manami majaykiwan pununaykita micharsu sayno nikä, sinöqa wakinkuna sayno rurayta munayaptinmi.

⁷ Noqapa yarpaynïpitaqa mas alimi kanman lapaykipis noqano majaynaqla kakuyaptiki. Imano kaptinpis Tayta Diosmi kamakäsin wakinninsi majayuq kanansipaq y wakinninsina majaynaq kanansipaq.

⁸ Majaynaqkunata y viüdakunataqa noqa yäsï noqano majaynaqla täkuyänanpaqmi.

⁹ Majaynaq täkuyta mana kamäpakur imarqa majasakäkuyäsun. Chïnäkur o waynäkur kawayänanpa trukanqa majasakäkuyashqan mas alimi kaykan.

¹⁰ Majayuqkunapaq Señor Jesucristo kaynömi nirqan: <>.

¹¹ Saymi runanpita rakikar imarqa mana yapapakuylapa täkunan. Majayuq kayta munarqa runanwanmi amistakunan. Saynölami runa kaqpis warminpita rakikänansu.

¹² Mayqan wawqipa warminpis rakikayta mana munaptinqa Jesucristuman mana yärakuptinpis warminpita ama rakikäsunsu. Saypita Señor Jesucristo mana yachasish kaptinpis mana rakikänanpaqmi sayno nï.

¹³ Saynöla mayqan panipa runanpis rakikayta mana munaptinqa Jesucristuman mana yärakuptinpis runanpita ama rakikäsunsu.

¹⁴ Ama yarpäyaysu Jesucristuman majayki mana yärakuq kaptin paywan täyashqayki mana ali kashqanta. Jesucristuman warmi yärakuptinqa runanwan tashqan alimi kaykan. Saynölami Jesucristuman runa yärakuptin warminwan tashqan ali kaykan. Sayno mana kaptinqa wamrankunata Tayta Dios manami yanapanmansu. Isanqa wamrankunata kuyaparmi Tayta Dios yanapaykan.

¹⁵ Jesucristuman mana yärakuq warmi o runa rakikayta munarqa rakikäkusun. Rakikaptinqa majan librinami kaykan. Tayta Dios manami munansu majayuqkuna mana ali kawayänanta.

¹⁶ Wawqikuna, tantiyakuyay. Mana rakikaptikiqa capazchir warmiki tantiyakur salvakunqa. Panikuna, qamkunapis tantiyakuyay. Mana rakikaptikiqa capazchir runayki tantiyakur salvakunqa.

Señalakush o mana señalakush karpis, ashmay o libri karpis Tayta Diosta sirviyänanpaq nishqan

¹⁷ Maysaychöpis wawqi panikunata kayno nirmi tantiyaykäsï: Salvayäshunaykipaq Tayta Dios qayayäshuptiki señalakush o mana señalakush karpis, ashmay o libri karpis Tayta Diosta sirviyay.

¹⁸ Cuerpuykikuna señalakushta qayayäshush kaptikiqa señalakushla kakuyay. Cuerpuykikuna mana señalakushta qayayäshush kaptikiqa ama señalakuyaysu.

¹⁹ Señalakush kayashqayki y mana señalakush kayashqaykipis Tayta Diospaq iwal-lami kaykan. Pay munan imano karpis mandamientunkunata cäsukur kawayänaykitami.

²⁰ Salvayäshunaykipaq Tayta Dios qayayäshuptiki señalakush o mana señalakush kayashqaykinöla kakuyay.

²¹ Ashmay kaykaqta qayayäshuptikipis ama lakikuyaysu. Sayno kaptinpis ashmay kaykäyashqaykipita pilapis jorquyäshuptiki alimi kanman.

²² Jesucristo kayninpa Tayta Dios qayayäshuptiki ashmay kash karpis Jesucristuman yärakur librinönami kaykäyanki. Saynölami Tayta Dios qayayäshuptiki libri kash karpis Jesucristuta sirviyänaykipaq paypa ashmaynin kaykäyanki.

²³ Tayta Diosmi salvayäshushpayki rantiyäshushkanki. Sayno kaykaptinqa señalakuyänaykipaq niyäshuptiki o ashmay kayashqaykipita yarqukuyänaykipaq niyäshuptiki ama cäsuyaysu. Cäsurqa paykunapa ashmayninno rikakuyanki.

²⁴ Wawqi panikuna, sayno kaykaptinqa señalakush o mana señalakush karpis, ashmay o libri karpis Tayta Diosta sirviyay.

Majayuq o japala täkuyänanpaq yachasishqan

²⁵ Kananqa japala kaqkunapaq tantiyasiyäshayki. Paykunapaqqa Señor Jesucristo manami imatapis parlakushsu. Sayno kaptinpis Tayta Dios kuyapämar yachayta qoykämaptinqa yäsishqäkunata chaskikuyänaykimi.

²⁶ Kanan wisan aläpa nakaykuna kaptin noqapa tantiyaynïpitaqa majaynaq kaqkunaqa japala täkuyanman.

²⁷ Majayuq karqa majaykipita ama rakikäyaysu. Japala karqa warmita ama ashiyaysu.

²⁸ Sayno kaptinpis warmita ashir manami jusalikuykäyankisu. Saynölami jipashpis majasakarqa jusalikuykansu. Isanqa majayuq rikakur kanan wisan aläpa nakaykuna kaptin masraqmi nakayanqa. Sayno kananta manami munäsu.

²⁹ Wawqi panikuna, walkalanami kay pasa ushakänanpaq pishin. Sayno kaykaptinqa majayuq karpis japala kayashqanno kawayäsun.

³⁰ Lakish kaykarpis mana lakish kaykaqno kawayäsun. Kushish kaykarpis mana kushish kaykaqno kawayäsun. Imata rantirpis saykunaman ama atiënikuyäsunsu.

³¹ Imaykayuq karpis saykunaman uman churakash ama kayäsunsu. Kay rikaykashqansi pasa ushakänanpaqnami kaykan.

³² Manami munäsu yarpachakular kawayänaykita. Warmiynaq runakunaqa Señor Jesucristo munashqanta rurayänanpaqmi mas yarpachakuyan.

³³ Warmiyuqkunami isanqa warminwan ali kawayänanpaq mas yarpachakuyan.

³⁴ Sayno karqa warminta ali rikayänanpaqraq y Jesucristuta sirviyänanpaqraqmi yarpachakuyan. Saynölami viüdakunapis y jipashkunapis Señor Jesucristo munashqanno lapanchöpis santu kawayänanpaq yarpachakuyan. Runayuq warmikunami isanqa runanwan ali kawayänanpaq mas yarpachakuyan.

³⁵ Sayta nï manami majayuq kayänaykita micharsu, sinöqa majayuq kayänaykipaq o majaynaq kayänaykipaqpis shumaq yarpachakuyänaykita munarmi. Saynöpis munaykä shumaq kawar Señor Jesucristuta lapan shonquykikunawan sirviyänaykitami.

³⁶ Pï runapa warmi surinpis runayuq kananpaq edäninchöna kaptin y runayuq kayta munaptinqa majasakäsisun. Majasakäsirqa manami jusalikuyansu.

³⁷ Sayno kaptinpis majasakäsiyta mana munarqa ama majasakäsisunsu. Isanqa manami pipis majasakäsinanpaq o mana majasakäsinanpaqpis obliganmansu.

³⁸ Saymi surinta majasakäsir alita ruraykan. Sayno kaptinpis mana majasakäsir mas alitami ruraykan.

³⁹ Runayuq warmi runan kawashqanyaqqa [ley nishqannöla] runalanwanmi tanman. Runan wanukuptinmi isanqa librina kaykan jukwan majasakänanpaq. Sayno kaptinpis Jesucristuta mana chaskikuq runawanqa ama majasakanmansu.

⁴⁰ Majasakänanpaq libri kaptinpis noqapa yarpaynïpitaqa viüda mananami yapapakunmannasu. Sayno nikä noqapis Espíritu Santuta chaskikush karmi.