1 Corintios 5 - Tayta Diospa Wilakuynin

Madrastanwan punuq runata qarquyänanpaq Pablo yäsishqan

¹ Qamkunacho juk runa madrastanwan taykashqantami musyashkä. Paywan tarqa pasaypa penqakuypaq fornicación jusatami jusalikuykan. Sayno runataqa Jesucristuta mana chaskikuq runakunapis seqaypami jamuräyan.

² Sayno kaykaptinqa ¿imanirtaq penqakuyankisu? Penqakuyänaykipa trukan kushikuykäyankimi. Say niraq runataqa ¿imanirtaq shuntakäyashqaykipita qarquyankisu?

³ Qamkuna kaqcho mana kaykarpis nawpaykicho kaykaq japuymi kaykä. Saymi say runataqa mayna juzgashkä.

⁴ Señor Jesucristupa jutincho shuntakäyaptiki noqapis qamkunawan kaykaq japuymi kaykäshaq y munayyuq Jesucristupis qamkunawanmi kaykanqa.

⁵ Sayno kaykaptinqa say runata Satanáspa munayninman kachapaykuyay. Saycho nakar jusanta kachariptinraqmi Señor Jesucristo kutimur salvanqa.

⁶ Say runata mana qarqurqa alabakurpis mana alitami ruraykäyanki. ¿Manaku musyayanki say jusaqa walka levadürala mäsata jakasishqanno kashqanta?

⁷ Sayno kaykaptinqa qamkunacho kaykaq levadürata jitariqno say runata qarquyay. Saynöpami mushuq mäsapita rurash levadüraynaq tantano kayankipaq. Pascua carnishno Jesucristo [noqansi rayku] wanusish kaptinmi rasunpaypa levadüraynaq tantano kayanki.

⁸ Sayno kaykaptinqa Pascua fiestata rurar levadürata jitariqno jusalikuykunata y mana ali ruraykunata kacharishun. Sayno kacharir Tayta Diospa wilakuynin nishqanman tupu kawashun.

⁹ Puntata cartakamushqächöpis maynami nishkä fornicación jusata jusalikuq runakunawan mana shuntakäyänaykipaq.

¹⁰ Manami lapan sayno kawaq runakunapita witikuyänaykipaqsu sayno nikä. Saynöpis manami lapan wachakash runakunapita, suwakunapita y ïdulukunaman yärakuq runakunapita witikuyänaykipaqsu nikä. Paykunawan mana shuntakarqa ¿mayparaq aywayankiman?

¹¹ Sayno kaptinpis wakin runakunaqa <> nikarmi fornicación jusacho kayan, imapaqpis wachakash kayan, ïdulukunaman yärakuyan, runapa washanta rimayan, borrächu kayan y suwakuyan. Paykunawan mana shuntakäyänaykipaqmi nikä. Paykunawanqa mikuyänalaykipaqpis ama shuntakäyaysu.

¹² Noqansi manami munayyuqsu kansi Jesucristuman mana yärakuqkunata juzganansipaq. Jesucristuta chaskikuq mayinsikuna jusalikuyaptinmi isanqa juzganansipaq y corriginansipaqpis munayyuq kaykansi.

¹³ Jesucristuta mana chaskikuq runakunataqa kikin Diosmi juzganqa. Jesucristuta chaskikuq mayikikunata corrigiyänaykipaq munayyuq kaykarqa madrastanwan kakuq runataqa qarquyay. Saynöpami mana ali ruraykuna qamkunacho kanqasu.