1 Corintios 4 - Tayta Diospa Wilakuynin

Wawqi panikunata yachasinanpaq apóstol Pablo munayyuq kashqan

¹ Wawqi panikuna, Tayta Diospa wilakuyninta wilakur Jesucristupa sirviqlan kayashqäta tantiyakuyay.

² Ali sirviqqa yärakuypaqmi kanman.

³ Saymi Jesucristuta mana sirvishqäta yarpäyaptikipis o wakin runakuna sayno yarpäyaptinpis lakiküsu.

⁴ Noqapa tantiyakuynïpitaqa Jesucristuta alimi sirviykä. Sayno kaptinpis manami ali sirvishqäta tantiyashqäpitasu Tayta Dios <> nimanqa, sinöqa ali sirvishqäta kikin tantiyarmi.

⁵ Sayno kaykaptinqa manaraqpis hörancho pitapis ama juzgayaysu. Señor Jesucristo kutimurnami pakaylapa rurashqansikunata y shonqulansicho yarpashqansitapis juzgamäshun. Say höraraqmi ali o mana ali sirviqnin kashqansitapis nimäshun.

⁶ Wawqi panikuna, Tayta Diospa palabrancho qelqaraykaqta cäsukuyänaykipaqmi Apoluspita y kikïpita kay cartacho nikämü. Cäsukurqa manami jukaq yachasishuqnikipa favornin sharkur jukaqpa contran sharkuyankimansu. Sayno rurarqa yachaq tukuykäyankimi.

⁷ Yachasishuqnikikunata sayno juzgayänaykipaqqa ¿pitaq kaykäyanki? Tantiyaq kayashqaykipis ¿manaku Tayta Diospita kaykan? Tayta Diospitaraqmi lapantapis chaskiyashkanki. Sayno kaykaptinqa ¿imanirtaq kikilaykikunapita tantiyaq kayashqaykita yarpar alabakuykäyanki?

⁸ Qamkuna maynami lapan munayashqaykita chaskiyashkanki ¿aw? Maynami rïcu kaykäyanki ¿aw? Noqakuna manaraq chäyämuptïpis Jesucristuwan mandaykäyashqaykitami yarpäyanki ¿aw? Mandäsiyänäpaq ¡alimi kanman rasunpaypa mandayaptiki!

⁹ Tantiyaynïpitaqa lapanpitapis mas nakayänäpaqmi apóstol kayman Tayta Dios churayämash. Imayka lutan ruraq runatanöpis noqakunata wanusiyämaytami munayäman. Sayno nakayashqätaqa lapan runakunapis angilkunapis rikaykäyämanmi.

¹⁰ Qamkunaqa Jesucristuta sirvir aläpa yachaq y tantiyaq kayashqaykitami nikäyanki. Noqakunatami isanqa Jesucristuta sirviyaptï upatano rikayäman. Qamkunaqa puëdiq kayashqaykitami nikäyanki. Noqakunatami isanqa imatapis rurayta mana puëdiqtano rikayäman. Qamkunataqa alimi rikayäshunki. Noqakunatami isanqa mana väliq runakunatano rikayäman.

¹¹ Kananyaqpis noqakunaqa mikanar, yakunar, aläsikur y maqar ushashqami puriyä. Wayiläkunapis kikïkunapaqa manami kansu.

¹² Nistäyashqäkunapaq utikäyashqäyaqmi arukuyä. Runakuna ashliyämaptinpis Tayta Diostami manakuyä bendicionninta qonanpaq. Chikiyämaptinpis mana resientikuypami puriyä.

¹³ Washäkunata rimayaptinpis ali shimiläpami parlapäyä. Kananyaqpis pasaypa mana väliqtano y manakaqtanömi rikayäman.

¹⁴ Manami qamkunata penqayman churanäpaqsu sayno nir qelqaykämü, sinöqa kuyay surïtano yäsirmi.

¹⁵ Chunka waranqa (10,000) yachasishuqnikikuna kayaptinpis Jesucristuta chaskikuyänaykipaq juklaylami puntata wilapäyäshushkanki. Say wilapäshuqnikiqa noqami kaykä. Saynöpami qamkunapa taytaykino kaykä.

¹⁶ Saymi qamkunata yäsï noqa kawashqäno qamkunapis kawayänaykipaq.

¹⁷ Qamkuna kaqcho imano kawashqätapis yarpäsiyäshunaykipaqmi Timoteuta kachamushkä. Imayka kuyay surïnömi pay kaykan. Saynöpis payqa Tayta Dios munashqannömi kawaykan. Lapan iglesiakunachöpis yachasishqänömi shumaq yachasiyäshunki.

¹⁸ Wakinnikiqa mana kutimunäpaq kaqta yarparshi seqaypa yachaq tukuykäyanki.

¹⁹ Sayno yarpäyaptikipis Tayta Dios munaptinqa watukaq shamushaqmi. Saychönami say yachaq tukuqkuna musyayämanqa. Paykunaqa mä rasunpakush Tayta Diospa munayninwan ruraykäyan o kikinpa yarpaylanpitakush parlaykäyan.

²⁰ Tayta Dios mandaykashqancho kawayqa manami yachaq tukur parlashqansisu, sinöqa pay munashqanta rurar kawashqansimi.

²¹ ¿Imano chämunätataq munayanki? ¿Rabyash chämunätaku o kushish chämunätaku?