1 Corintios 3 - Tayta Diospa Wilakuynin

Mana rimanakuypa kawayänanpaq nishqan

¹ Wawqi panikuna, sayno kaptinpis Espíritu Santu munashqanno mana kawayaptikimi Jesucristuta mana chaskikuq runakunatano qamkunata yachasirqä. Qamkunaqa pishi wamranölaraqmi kayarqayki.

² Mikuyta manaraq yachaq wamrata chuchulawan maman ashmashqannömi noqapis qamkunata qalaykunan kaq yachasikuykunalatarä yachasirqä. Kananyaqpis mana tantiyakuq karmi pishi wamranölaraq kaykäyanki.

³ Chikinakur y rimanakur kawayashpayki ¿manaku Jesucristuta mana chaskikuq runakunanöla kawaykäyanki?

⁴ Wakinnikishi nikäyanki: <>. Y wakinnikinashi nikäyanki: <>. Sayno niyashpayki ¿manaku Diosta mana cäsukuq runakunanöla kaykäyanki?

⁵ Sayno niyänaykipaqqa ¿pitaq Apolos? Saynöpis ¿pitaq noqa kä? Noqakunaqa Tayta Diosta sirviq runakunalami kayä. Tayta Dios churayämashqanno sirviyaptïmi Jesucristuta chaskikuyashkanki.

⁶ Muruta muruq runanömi qamkunata wilapashkä Jesucristuta chaskikuyänaykipaq. Apolusnami mururaykaqta parquq japuy Jesucristupa wilakuyninta masta tantiyasiyäshushkanki. Muruta winasimuq japuymi Tayta Dios qamkunata shumaq tantiyasiyäshushkanki Jesucristuman yärakuyänaykipaq.

⁷ Manami muruq kaqsu ni parquq kaqsu muruta winasimun, sinöqa Tayta Diosmi.

⁸ Muruq kaqpis parquq kaqpis chakra ali wayunanpaqmi aruyan. Tayta Diosnami muruq kaqtapis parquq kaqtapis aruyashqanman tupu päganqa.

⁹ Noqapis Apoluspis Tayta Diospa aruqninkunalami kaykäyä. Qamkunanami Tayta Dios aruykäsishqan chakrano kaykäyanki. Saynöpis Tayta Dios sharkaykäsishqan wayinömi kaykäyanki.

¹⁰ Tayta Dios kuyapämar churamash kaptinmi ali yachaq albañil sutashqan cimientuno arushqäkuna kaykan. Say cimientu janancho juk albañil perqata sharkasishqannömi wakin runakunapis aruyan. Isanqa shumaq tantiyakuyäsun imano aruyashqantapis.

¹¹ Manami pipis cimientu sutashna kaykaqta jitariykur juk cimientuta churanmansu. Jesucristumi cimientu kaykan.

¹² Wakin runakunaqa Tayta Dios munashqanno kawar say cimientu jananman qoriwan, qellaywan o kuyaylapaq chipipiykaq rumikunawanpis wayita sharkasishnömi kaykäyan. Wakin runakunanami isanqa Tayta Diosta mana cäsukur qeruwan, oqshawan o rämakunawanpis wayita sharkasishno kaykäyan.

¹³ Mayqanwan sharkasishqapis juiciu final junaqnami lapan arushqansipita Tayta Dios juzgamäshun. Say junaq juzgamashpansimi lapan rurashqansikunata ninawan probanqa.

¹⁴ Cimientu janancho sharkasishqansikunata nina mana ushaptinqa premiutami chaskishun.

¹⁵ Cimientu janancho sharkasishqansikunata nina ushaptinmi isanqa ima premiutapis chaskishunsu. Sayno kaptinmi wayita nina rupaptin runa qeshpir salvakushqanno noqansipis salvakushun.

¹⁶ ¿Manaku musyayanki Tayta Diospa templun kayashqaykita? ¿Manaku musyayanki Espíritu Santu qamkunacho taykashqanta?

¹⁷ Tayta Diospa templunta ushakäsiq kaqtaqa Tayta Diosmi ushakäsinqa. Qamkunaqa Tayta Diospa templun karmi santu kaykäyanki.

¹⁸ Shumaq tantiyakuyay. Wakinnikimi yarpäyanki Diosta mana chaskikuq runakunano yachaq kayashqaykita. Rasunpaypa yachaq kayta munarqa paykuna yarpäyashqanno ama yarpäyaysu.

¹⁹ Diosta mana chaskikuq runakuna yachaq kayashqanqa Tayta Diospaq manakaqlami kaykan. Palabranchöpis kaynömi qelqaraykan: <>.

²⁰ Saynöpis kaynömi qelqaraykan: <>.

²¹ Sayno nikaptinqa ama alabakuyaysu <> nir. Tantiyakuyay lapanpis qamkunapana kashqanta.

²² Saymi noqapis, Apoluspis, Cefaspis, kay pasapis, kawaypis, wanuypis, kanan tiempupis y shamuq kaq tiempupis qamkunapana lapan kaykan.

²³ Qamkunanami Jesucristupa kaykäyanki. Jesucristunami Tayta Diospa kaykan.