1 Corintios 2 - Tayta Diospa Wilakuynin

Jesucristo cruzcho wanushqanta Pablo wilakushqan

¹ Wawqi panikuna, qamkuna kaqman shamur manami yachaq runakuna parlayashqannösu ni paykuna yarpäyashqannösu Tayta Diospa wilakuyninta yachasirqä.

² Sayno yachasinäpa trukanqa Jesucristo noqansi rayku cruzcho wanushlantami yachasirqä.

³ Qamkunaman chämur mana tantiyasinäpaq kashqanta yarparmi fiyupa lakikurqä.

⁴ Yachaq runakuna parlayashqanno y yarpäyashqanno yachasinäpa trukanqa Espíritu Santupa munayninwanmi yachasirqä.

⁵ Tayta Diospa munayninwan yachasiptï manami runakuna yachaq kayninmansu yärakuykäyanki, sinöqa Tayta Diosmanmi.

Tayta Dios yarpashqankunata Espíritu Santu tantiyasishqan

⁶ Yachaq runakuna yarpäyashqanno mana yachasirpis Tayta Diospa wilakuyninta shumaq tantiyakurmi payman yärakuqkunata yachasï. Tayta Diospa wilakuyninqa manami yachaq runakuna ni munayyuq runakuna yarpäyashqannösu kaykan. Say runakunaqa ushakaqlami kaykäyan.

⁷ Diospa yachayninta yachasiyashqäqa runakuna mana musyayashqanmi kaykan. Say yachaynintami imapis manaraq kaptin Tayta Dios churarqan gloriacho kushish kawanansipaq.

⁸ Kay pasacho mandaqkunaqa manami mayqanpis sayta tantiyayarqansu. Tantiyarqa manami munayyuq Señor Jesucristuta cruzcho wanusiyanmansu karqan.

⁹ Mana tantiyayashqantami Tayta Diospa palabranchöpis kayno qelqaraykan: <>.

¹⁰ Say kamarishqantaqa Espíritu Santuwanmi Tayta Dios musyasimashkansi. Espíritu Santu lapanta musyarmi Tayta Dios yarpashqankunatapis musyan.

¹¹ Runa imata yarpashqanta shonqun musyashqannömi Espíritu Santupis Tayta Dios imata yarpashqantapis musyaykan.

¹² Noqansiqa manami kay mundupa espïrituntasu chaskishkansi, saypa trukanqa Tayta Dios kachamushqan Espíritu Santutami. Saynöpami musyansi Tayta Dios salvamashqansita.

¹³ Qamkunataqa manami runakunapita yachakushqätasu wilapaykä, saypa trukanqa Espíritu Santu tantiyasimashqantami. Saymi Espíritu Santuta chaskikush kayaptiki paypa yarpayninkunata tantiyaykäsï.

¹⁴ Espíritu Santuta mana chaskikuqkunaqa paypa yarpayninkunata manami chaskiyansu. Paykunapaqqa upa yarpaylami kaykan. Espíritu Santu mana tantiyasiptinmi tantiyayta kamäpakuyansu.

¹⁵ Espíritu Santuta chaskikuqkunami isanqa yachasishqankuna ali kashqanta tantiyar chaskikuyan. Imanir chaskikuyashqantapis wakinqa manami tantiyayansu.

¹⁶ Tayta Diospa palabranchöpis kaynömi qelqaraykan: <> Noqansipa yarpayninsimi isanqa Jesucristupa yarpayninno kaykan.