1 Corintios 16 - Tayta Diospa Wilakuynin

Ofrendata shuntayänanpaq nishqan

¹ Jerusaléncho kaq wawqi panikunapaq ofrendata shuntarqa Galacia provinciacho wawqi panikunata yäsishqänöla qamkunapis shuntayay.

² Semäna arur gänayashqaykipita cada domingu cada ünuyki aykalatapis churayanki. Ama noqa chämuptïraqqa shuntaykäyankisu.

³ Shuntayashqayki ofrendata Jerusalénman apayänanpaq wawqikunata akrayay. Chaykamurnami paykunapaq cartata rurashaq Jerusalénman apayaptin wawqi panikuna chaskikuyänanpaq.

⁴ Kamakaptinqa noqapis paykunawanmi aywashaq.

May maypa aywananpaq Pablo wilashqan

⁵ Qamkuna kaqman kutimur Macedonia provinciaparaqmi tumamushaq.

⁶ Chaykamurqa capazmi tamya killa päsashqanyaq qamkunawan qoyäshaq. Saypitanami wakin markakunamanpis aywanäpaq yanapäyämanki.

⁷ Manami pasädalaqa qamkunata watukayta munäsu, saypa trukanqa Tayta Dios munaptin qamkuna kaqcho täshaqraqmi.

⁸ Éfesuchömi isanqa Pentecostés fiesta chämushqanyaq täshaq.

⁹ Aska runakuna conträ sharkuyaptinpis Tayta Dios yanapaykämanmi kay markakunacho ali wilakuyninta wilakunäpaq. Sayno wilakuptïmi Jesucristuta chaskikuykäyan.

¹⁰ Wawqinsi Timoteo qamkuna kaqman chämuptin kushishla chaskikuyay. Paypis noqanömi Jesucristupa wilakuyninta wilakuykan.

¹¹ Paytaqa manakaqman ama churayaysu. Ali kutimunanpaq yanapaykuyälay. Noqakunapis kaycho kaq wawqi panikunawan payta shuyakuykäyämi.

¹² Qamkuna kaqman wakin wawqikuna shayämuptinmi Apolustapis ruwakurqä qamkunaman shamunanpaq. Sayno ruwakuykaptïpis manami shamuyta kamäpakunsu. Nirkurraqmi may shamunqa.

Carta ushanan

¹³ Imapitapis alcäbula kayay. Imano nakarpis Tayta Diosman yärakuyay. Imatapis mana mansariypa Tayta Dios munashqanno kawayay.

¹⁴ Pïmaywanpis kuyanakur shumaq kawayay.

¹⁵ Wawqi panikuna, musyayankimi Acaya provinciacho wawqinsi Estéfanas ayllunkunawan Jesucristuta puntata chaskikuyashqanta. Paykunami wawqi panikunata imachöpis yanapaykäyan.

¹⁶ Saymi qamkunata ruwakü paykunata cäsukuyänaykipaq. Saynöla lapantapis paykunano yanapäshuqnikikunata y yachasishuqnikikunata cäsukuyay.

¹⁷ Estéfanas, Fortunato y Acaico qamkuna kaqpita watukamaq chaykayämuptin lapaykita rikaqnöraqmi kushikushkä.

¹⁸ Qamkunata shakyäsishushqaykinölami noqakunatapis shakyäsiyämash. Paykunata y paykunano kaqkunata shumaq respitayanki.

¹⁹ Asia provinciacho kaykaq wawqi panikunapis qamkunapaq salüdunta apasikayämunmi. Saynöpis Aquila y Priscila y wayincho shuntakaq wawqi panikunapis qamkunapaq salüdunta apasikayämunmi.

²⁰ Lapan wawqi panikunami salüdunta apasikayämun. Jukniki juknikipis qaqlaykikunacho musanakushpayki winchinakuyälay.

²¹ Noqa Pablo kikïmi kay salüdütaqa qelqaykämü.

²² Pipis Jesucristuta mana kuyaq kaqtaqa Tayta Dios castiganqami. ¡Señor Jesucristo, juklana kutikalämuy!

²³ Señor Jesucristo yanapaykuyäläshunki imaypis ali kawayänaykipaq.

²⁴ Jesucristuman yärakuq mayï kayaptikimi lapaykikunata kuyä. [Amén.]