1 Corintios 14 - Tayta Diospa Wilakuynin

Mana tantiyayashqan idiömapita yäsishqan

¹ Sayno kaykaptinqa shumaq kuyanakur kawayay. Espíritu Santu habilidäta qoyäshunaykipaq Tayta Diosta manakuyay. Saypita mas manakuyay wilakuyninta wilakuyänaykipaq.

² Espíritu Santu parlasishushqayki idiömapa parlarqa manami runakunatasu parlapaykäyanki, saypa trukanqa Tayta Dioslatami. Espíritu Santu parlasishuptikipis manami pipis tantiyayäshunkisu.

³ Runakuna tantiyayashqan idiömapa wilakuyaptikimi isanqa lapan niyashqaykitapis tantiyar Tayta Dios munashqanno kawayanqa, shakyäsinakuyanqa y yanapänakuyanqa.

⁴ Runakuna mana tantiyayashqan idiömapa wilakuq kaqqa kikilanmi kushikun. Runakuna tantiyayashqan idiömapa wilakuq kaqmi isanqa Tayta Diosman yärakuqkunata shumaq yachasiyan.

⁵ Noqapitaqa alimi kanman Espíritu Santu parlasishqan idiömacho lapayki parlayaptikipis. Sayno kaptinpis mas alimi kanman runakuna tantiyayashqan idiömacho Tayta Diospa wilakuyninta wilakuyaptiki. Mana tantiyayashqan idiömacho wilakuyaptikiqa pilapis kanman tantiyasinanpaq. Sayno tantiyasiq kaptinqa alimi kanman juk idiömacho wilakuyaptikipis.

⁶ Wawqi panikuna, shumaq tantiyakuyay. Watukakuq shamur mana tantiyayashqayki idiömacho yachasiptï ¿yachakuyankimansuraq? Tantiyayashqayki idiömacho yachasiptïmi isanqa revelación kaptinpis o yachasikuy kaptinpis lapanta tantiyar shumaq yachakuyanki.

⁷ Pinkullutapis arpatapis lutala tukaptinqa manami tantiyansisu imata tukaykashqantapis.

⁸ Saynöpis cornëtata lutala tukaptinqa soldädukunapis pelyaman aywayänanpaq manami kamarikuyansu.

⁹ Saynölami kanqa mana tantiyayashqan idiömacho wilakuyaptiki. Imata niyashqaykitapis mana tantiyar manami imatapis yachakuyanqasu. Sayno wilakurqa walälami wilakuykäyanki.

¹⁰ Musyashqansinöpis kay pasachöqa askami idiömakuna kaykan. Runakuna tantiyayashqan idiömacho parlapaptinsiqa pipis tantiyanmi.

¹¹ Sayno kaptinpis mana tantiyashqä idiömacho parlapämaq runaqa juklä nación runanömi noqapaq kanqa y noqapis juklä nación runanömi paypaq kashaq.

¹² Saynölami qamkunapaqpis wilakuyaptiki kaykan. Saymi Espíritu Santu habilidäta qoyäshunaykita munarqa wawqi panikunata tantiyayashqan idiömacho shumaq yachasiyänaykipaq payta manakuyänayki.

¹³ Saynöla mana tantiyayashqan idiömacho wilakurqa Tayta Diosta manakuyay wilakushqaykita tantiyasiyänanpaq.

¹⁴ Espíritu Santu parlasimaptin mana tantiyashqä idiömacho Tayta Diosta manakur kushikurpis manami tantiyäsu imata nikashqätapis.

¹⁵ Sayno kaptinqa manami Espíritu Santu parlasimashqan idiömalachösu manakushaq, sinöqa tantiyashqä idiömachöpis manakushaqmi. Saynöpis manami Espíritu Santu parlasimashqan idiömalachösu Tayta Diosta alabashaq, sinöqa tantiyashqä idiömachöpis alabashaqmi.

¹⁶ Qamkunapis runa mana tantiyashqan idiömalacho Tayta Diosta alabayaptikiqa wakin runakuna mana tantiyar qamkunawan manami alabayta kamäpakuyanqasu.

¹⁷ Lapan shonquykiwan kushish alabayaptikipis upälalami rikaräyäshunki.

¹⁸ Runa mana tantiyashqan idiömacho parlanäpaq qamkunapita masraq Espíritu Santu yanapämaptinmi Tayta Diosta agradëcikü.

¹⁹ Sayno kaptinpis wawqi panikuna shuntakäyashqancho chunka waranqa (10,000) mana tantiyayashqan palabrakunata parlashqäpitapis mas alimi kanqa pisqa palabralatapis tantiyayashqan idiömacho parlaptï.

²⁰ Wawqi panikuna, wamrakuna mana tantiyakuypa yarpäyashqanno ama yarpäyaysu. Saypa trukanqa yäpa runakunano shumaq tantiyaykur yarpachakuyay.

²¹ Tayta Diospa leyninchöpis kaynömi qelqaraykan: <>.

²² Say nishqannölami runakuna mana tantiyayashqan idiömacho wilakuptinsi Jesucristuman mana yärakuqkuna Tayta Diospa wilakuyninta chaskikuyanqasu. Tantiyayashqan idiömacho wilakuptinsimi isanqa Jesucristuta chaskikuyanqa.

²³ Shuntakäyashqaykicho mana tantiyayashqan idiömacho lapayki parlayaptiki imanir sayno parlayashqaykita mana musyaq runa o mana criyiq runa yaykur löcuyash kaykäyashqaykitami yarpanqa.

²⁴ Tantiyayashqan idiömacho Diospa wilakuyninta wilakuyaptikimi isanqa yarpachakur jusayuq kashqanta tantiyakunqa.

²⁵ Saymi wilakuyashqayki shonqunman chaptin Tayta Dios qamkunawan kaykashqanta tantiyashpan qonqurpakuykur Tayta Diosta adoranqa.

Shuntakäyashqancho imanöpis kayänanpaq nishqan

²⁶ Sayno kaptinqa wawqi panikuna, shuntakäyashqaykicho salmukunata cantarpis, Jesucristupa wilakuyninta yachasirpis, Tayta Dios tantiyasiyäshushqaykikunata wilakurpis, runakuna mana tantiyayashqan idiömacho parlarpis y say parlashqanta tantiyasirpis lapanta rurayay yärakuq mayikikuna Tayta Dios munashqanno kawayänanpaq.

²⁷ Mana tantiyayashqan idiömakunacho parlarqa juk ishkayla trukanakuypa parlayäsun. Say parlayashqanta juk wawqina tantiyasisun.

²⁸ Pilapis tantiyasinanpaq mana kaptinqa upälakuyäsun. Parlananpa trukanqa shonqulanchöna Tayta Diosta manakuyäsun.

²⁹ Saynöla shuntakäyashqaykicho Diospa wilakuyninta juk ishkayla wilakuyäsun. Wiyaqkuna tantiyakuyäsun lutanta wilakuyashqanta o rasun kaqta wilakuyashqantapis.

³⁰ Imatapis wilakunanpaq juk wawqita Tayta Dios tantiyasiptinqa parlaykaq wawqi upälakusun jukaq wawqina parlamunanpaq.

³¹ Saynöpami lapaykipis shuyänakuypa wilakuyanki lapanpis yachakuyänanpaq.

³² Wilakuqkuna imay parlayänanpaqpis y imay upälakuyänanpaqpis tantiyayanmi.

³³ Salvashqan runakuna shuntakäyashqanchöqa Tayta Dios manami desordin kananta munansu, sinöqa lapanpis shumaq ordenädu kanantami munan.

³⁴ Shuntakäyashqaykicho warmikuna upälala kakuyäsun. Ama parlakuyäsunsu. Moisés qelqashqan leykunacho nishqannöpis runanpa munaynincho kakuyäsun.

³⁵ Imatapis musyayta munarqa wayinkunaman kutiykur runankunata tapukuyäsun. Manami alisu kaykan shuntakäyashqaykicho warmikuna parlayaptinqa.

³⁶ ¿Imanirtaq yarpaykäyanki qamkuna kaqcho Tayta Diospa palabran qalaykushqanta y qamkunalata wilayäshushqaykita?

³⁷ Tayta Diospa wilakuqninkuna y Espíritu Santu tantiyasishqan runakuna kayashqaykita yarparqa tantiyakuyankimanmi kay cartacho nishqäkuna Jesucristupa mandamientunkuna kaykashqanta.

³⁸ Kay cartacho nishqäkunata mana chaskikuq kaqtaqa Tayta Dios manami chaskinqasu.

³⁹ Sayno kaykaptinqa Tayta Diospa wilakuyninta runakuna tantiyayashqan idiömacho wilakuyay. Mana tantiyayashqan idiömacho parlayaptinpis ama michäyaysu.

⁴⁰ Isanqa shuntakäyashqaykicho Tayta Dios munashqannöla lapantapis ordenädu rurayay.