1 Corintios 13 - Tayta Diospa Wilakuynin

Imano kuyanakunansipaq tantiyasishqan

¹ Kay pasacho lapan idiömakunata parlarpis y angilkunapa idiömanta parlarpis kuyakuynï mana kaptinqa platïlluta lutala tukashqan chinchinyaqnölami parlashqäkuna kaykan.

² Profëta karpis, Tayta Dios yarpashqanta musyarpis y pïmay runapita mas yacharpis kuyakuynï mana kaptinqa manami imapaqpis välïsu. Tayta Diosman yärakur jirka witikunanpaq niptï witikuptinpis kuyakuynï mana kaptinqa manami imapaqpis välïsu.

³ Muchuqkunata lapan imaykäkunata rakiparpis y Diosman yärakushqäpita rupasiyämaptinpis kuyakuynï mana kaptinqa manami imapaqpis välïsu.

⁴ Kuyakuq karqa ima kaptinpis pacienciakunsimi y pïmaytapis alimi rikansi. Saynöpis runa mayinsita manami chikinsisu, manami alabakunsisu, manami pitapis manakaqman churansisu,

⁵ manami manakaqkunata parlansisu, manami munashlansita rurayänanpaq obligansisu, manami rabyanansisu y pitapis manami nanaparansisu.

⁶ Mana alikunata ruraptin kushikunansipa trukanqa alikunata ruraptinmi kushikunsi.

⁷ Kuyakuq karqa ima kaptinpis perdonansimi. Imaypis criyinsimi, imaypis shuyaransimi y lapantapis awantakunsimi.

⁸ Profëtakuna wilakuyashqanpis ushakanqami. Mana yachashqan idiömacho parlayashqankunapis ushakanqami. Yachaq kaypis ushakanqami. Kuyanakuymi isanqa imaypis ushakanqasu.

⁹ Manami lapantasu musyansi. Manami lapantasu wilakunsi.

¹⁰ Sayno karpis Jesucristo kutimuptinqa kanan musyashqansikunata ni wilakushqansikunatapis mananami nistäshunnasu.

¹¹ Noqapis wamra karqa wamranölami parlarqä, wamranölami yarpachakurqä y wamranölami tantiyarqä. Awkinyarnaqa mananami wamranönasu parlä ni yarpä.

¹² Saynöpis kananqa makwa espëjuwan rikakuqnöpis shumaqqa manaraqmi tantiyansiraqsu. Kay pasapita aywakurmi isanqa kikin Tayta Dioswanna tinkushun. Saymi kanan ichiklata musyarpis say junaqqa pay reqimashqansino noqansipis payta reqishun.

¹³ Kananqa yärakur, shuyakur y kuyanakurmi kawaykansi. Lapanpitapis mas aliqa kaykan kuyanakushqansimi.