1 Corintios 12 - Tayta Diospa Wilakuynin

Espíritu Santu habilidäta qomashqansi

¹ Wawqi panikuna, Espíritu Santu habilidäta qomashqansipitami musyasiyta munaykä.

² Musyayashqaykinöpis Jesucristuta manaraq chaskikur mana tantiyakuyashpaykimi ïdulukunata adorar kawayarqayki.

³ Saymi shumaq tantiyakuyänaykita munä. Espíritu Santuta chaskikush kaykarnaqa manami pipis <> ninsu. Saynölami Espíritu Santuta manaraq chaskikurqa <> niyta kamäpakunsu.

⁴ Espíritu Santupita jukno jukno habilidäta chaskikushqapis payqa juklaylami kaykan.

⁵ Saynölami Señor Jesucristuta jukno jukno sirvishqapis payqa juklayla kaykan.

⁶ Yanapämaqninsi Tayta Diosta sirvishqansi jukno jukno kaptinpis payqa juklaylami kaykan.

⁷ Cada ünunsimi Espíritu Santupita habilidäta chaskinsi jukninsi jukninsipis yanapänakunansipaq.

⁸ Wakinninsimi habilidäta chaskinsi shumaq tantiyakuykur wakinta tantiyasinansipaq. Wakinninsimi habilidäta chaskinsi yachakuykur wakin kaqtapis yachasinansipaq.

⁹ Wakinninsimi habilidäta chaskinsi Tayta Diosman shumaq yärakunansipaq. Wakinninsimi habilidäta chaskinsi qeshyaqkunata aliyäsinansipaq.

¹⁰ Wakinninsimi habilidäta chaskinsi milagrukunata ruranansipaq. Wakinninsimi habilidäta chaskinsi Tayta Diospa wilakuyninta wilakunansipaq. Wakinninsimi habilidäta chaskinsi pipis lutanta o rasun kaqta yachaykäsishqantapis tantiyakunansipaq. Wakinninsimi habilidäta chaskinsi mana yachashqansi idiömakunacho parlanansipaq. Wakinninsinami habilidäta chaskinsi say parlayashqanta wawqi panikunata tantiyasinansipaq.

¹¹ Jukno jukno habilidäta chaskiptinsipis Espíritu Santu juklaylami kaykan. Paymi kikin munashqanno cada ünunsita habilidäta kamaripämansi.

Jesucristupa cuerpun kashqansi

¹² Cuerpunsicho umansi, rikransi y chankansi kaptinpis juk cuerpulami kaykansi. Saynölami noqansipis Jesucristuwan juk cuerpula kaykansi.

¹³ Saymi Israel runa kashqapis y mana Israel runa kashqapis, ashmay kashqapis y mana ashmay kashqapis bautizakuptinsi lapansita Espíritu Santu churamashkansi paypa cuerpun kanansipaq. Say cuerpula kashqami lapansita Tayta Dios Espíritu Santuta qomashkansi.

¹⁴ Cuerpuqa manami umalasu ni rikralasu ni chankalasu kaykan, sinöqa aska partiraqmi tananakush kaykan.

¹⁵ Chakipis <> nirpis manami cuerpupitaqa yarqunsu.

¹⁶ Saynölami rinripis <> nirpis manami cuerpupitaqa yarqunsu.

¹⁷ Cuerpunsi nawila kaptinqa ¿imawanraq wiyashwan? Saynöpis cuerpunsi rinrila kaptinqa ¿imawanraq mushkuytapis mayashwan?

¹⁸ Isanqa Tayta Diosmi cuerpunsikunacho cada partikunata kamakäsish pay munashqannöla kayänanpaq.

¹⁹ Intëru cuerpucho juk partila kaptinqa manami cuerpusu kanman.

²⁰ Saymi aska parti karpis rasunpaypaqa juk cuerpula kaykan.

²¹ Manami nawinsipis makinsita ninmansu: <>. Umansipis chakinsita manami ninmansu: <>.

²² Saypa trukanqa cuerpunsicho mas pishi töpay kaq partikunatami mas nistansi.

²³ Cuerpunsicho mana rikasikushqansi partikunatapis ¿manaku mödanawan shumaq sapansi?

²⁴ Alayri rikakaq partikunataqa manami sapansisu. Cuerpunsicho mana rikasikunansipaq kaq partikunata sayno mas cuidanansipaqmi Tayta Dios kamakäsish.

²⁵ Sayno kamakäsiptinmi cuerpunsicho kaq partikuna chikinakuyansu, sinöqa jukninpis jukninpis yanapänakuyanmi.

²⁶ Cuerpunsicho juk parti nanaptinqa lapan cuerpunsimi lakikun. Cuerpunsicho juk parti ali rikash kaptinqa lapan partimi kushikuyan.

²⁷ Qamkunaqa Jesucristupa cuerpunmi kayanki. Cada ünuykikunami saycho juk parti kayanki.

²⁸ Saymi iglesiacho Tayta Dios puntata churash apostolkuna kayänanpaq, saypita profëtakuna kayänanpaq y saypita yachasiqkuna kayänanpaq. Saynöpis wakinta churash milagrukunata rurayänanpaq, wakinta churash qeshyaqkunata aliyäsiyänanpaq, wakinta churash muchuqkunata yanapäyänanpaq, wakinta churash imatapis ali kamakäsiq kayänanpaq y wakintanami churash mana tantiyayashqan idiömakunacho parlayänanpaq.

²⁹ Manami lapansu apóstol, ni profëta ni yachasikuq kaykäyan. Manami lapansu milagrukunata rurayan,

³⁰ ni qeshyaqkunata aliyäsiyan ni mana yachayashqan idiömakunacho parlayan. Say idiömakunacho parlayashqantapis manami lapansu tantiyasiyan.

³¹ Sayno kaykaptinqa Tayta Diospita mas alinnin habilidäta chaskiyänaykipaq yarpachakuyay. Kananqa mas alinnin kaqta tantiyasiyäshayki.