1 Corintios 10 - Tayta Diospa Wilakuynin

Ïdulukunata mana adorayänanpaq yachasishqan

¹ Wawqi panikuna, musyayankimi unay yärakuq mayinsikunata ima päsashqantapis. Paykunaqa pukutay rurilantami aywayarqan y Puka Lamartapis päsayarqanmi.

² Moisésta qatirar pukutay rurinpa aywash karmi y lamarpa päsash karmi lapanpis bautizakushno rikakuyarqan.

³ Tayta Dios kamaripashqan mikuytapis lapanmi mikuyarqan.

⁴ Tayta Dios qaqapita pashtasimushqan yakutapis lapanmi upuyarqan. Say qaqaqa Jesucristumi karqan. Israel runakuna aywayashqanpami Jesucristupis aywarqan.

⁵ Sayno kaptinpis Tayta Diosta askaqmi cäsukuyarqansu. Saymi paykunaqa sunyaq jirkacho wanur mashtarpaykar quëdayarqan.

⁶ Lapan saykuna päsarqan noqansi tantiyakur paykunano mana jusalikunansipaqmi.

⁷ Sayno kaykaptinqa ïdulukunata ama adorashunsu. Israel runakuna ïdulukunata adorayashqanpita Tayta Diospa palabrancho kaynömi qelqaraykan: <>.

⁸ Saynöpis fornicación jusata ama jusalikushunsu. Israel runakuna sayno kawayashqanpitami Tayta Dios juk junaqlacho ishkay chunka kimsa waranqa (23,000) runakunata ushakäsirqan.

⁹ Saynöpis Señor Jesucristuta kikinsi munashqansita rurasiyta ama kamashunsu. Wakin Israel runakuna Diosta sayno rurasiyta munayaptinmi culebrawan picasiypa Tayta Dios wanusirqan.

¹⁰ Saynöpis descontentu ama kashunsu. Israel runakuna descontentu kayaptinmi wanusikuq ángel paykunata ushakäsirqan.

¹¹ Unay Israel runakunata sayno päsashqankuna Tayta Diospa palabrancho qelqaraykan noqansi ultimu tiempucho kawaqkuna tantiyakunansipaqmi.

¹² Sayno kaykaptinqa mana jusalikuq kayashqaykita yarpaykäyashqaykicho cuidädu jusalikuyankiman.

¹³ Lapan pruëba päsayäshushqayki wakin runakunatapis päsanmi. Pruëbaman churayäshushpaykipis Tayta Dios manami kachaykushunkisu. Saymi pruëbata awantar jusalikuyman mana ishkiyänaykipaq imaypis yanapäyäshunki.

¹⁴ Kuyay wawqi panikuna, sayno kaykaptinqa ïdulukunata ama adorayaysu.

¹⁵ Tantiyakuq runakuna karqa nikashqä rasunpaypa kashqanta tantiyakuyay.

¹⁶ Noqansi Santa Cënapaq shuntakar bendición cöpapita upushpansi ¿manaku yarpansi Jesucristo noqansi rayku yawarninta jichashqanta? Saynöpis tantata pakipänakushpansi ¿manaku yarpansi Tayta Dios salvamänansipaq Jesucristo cruzcho wanushqanta?

¹⁷ Santa Cënacho juk tantalata askaq mikuykarpis juk cuerpulami kaykansi.

¹⁸ Israel runakunapa cürankunapis Tayta Diosta adorakuyänan altarcho pishtayashqan aysata mikur ¿manaku Tayta Dioswan juklaylano kaykäyan?

¹⁹ Shumaq tantiyakushun. Ïdulukunaqa manami kawansu. Ïdulukunapaq altarman churayashqan aysapis kashqan aysalami.

²⁰ Sayno kaptinpis ïdulukunapaq churayashqan aysaqa manami Tayta Diospaqsu kaykan, sinöqa supaykunapaqmi. Noqa manami munäsu supaykunapaq kaqkunata mikuyänaykita.

²¹ Qamkuna Santa Cënacho vïnuta upuykar supaykunapaq jichapäyashqan vïnutaqa manami upuyankimansu. Saynöpis Santa Cënacho tantata mikuykar supaykunapaq churayashqan mikuytaqa manami mikuyankimansu.

²² ¿Tayta Diosta rabyanäsiytaku munaykäyanki? ¿Noqansi paypita mas munayyuqku kansi?

Tayta Dios alabash kananpaq imatapis ruranansipaq nishqan

²³ Munayashqaykita rurayänaykipaq librina kaykäyashqaykita nirpis manami lapantasu rurayankiman. Saynöpis manami lapan rurayashqaykikunasu wawqi panikuna ali kawayänanpaq yanapan.

²⁴ Kikilansi ali kawanansipaqqa ama yarpachakushunsu. Saypa trukanqa wakinkunapis ali kawayänanpaq yarpachakushun.

²⁵ Mercäducho aysata rantirqa ïdulukunapaq pishtayashqanta o mana pishtayashqantapis mana tapupaylapa rantiyay. Rantirpis ama yarpachakuyaysu.

²⁶ Tayta Diospa palabranchöpis nikan: <>.

²⁷ Saynöpis Tayta Diosman mana yärakuq runa mikuyänaykipaq qayasiyäshuptiki mana tapupaylapa lapan qarashushqaykita mikuyay.

²⁸ Isanqa pipis <> nishuptiki say wilashuqniki runata respitar ama mikuyaysu.

²⁹ Manami kikikikuna raykusu mana mikuyänaykipaq nikä, sinöqa wilashuqniki runa lutanta mana yarpänanpaqmi. Sayno niptï capaz wakinniki kayno niyankiman: <

³⁰ Tayta Diosta agradëcikuskir mikuptïqa manami pipis jamuräyämanmansu>>.

³¹ Sayno niyaptikipis noqa nï: Mikurpis, upurpis y imata rurarpis Tayta Dios alabash kananpaq rurayanki.

³² Sayno kaykaptinqa Israel runa kaptinpis, mana Israel runa kaptinpis, Diosman yärakuq mayiki kaptinpis rurayashqaykita rikar qepaman kutikuyänan kaptinqa say rurayashqaykita amana rurayankinasu.

³³ Noqapis manami kikiläpaqsu ali kawayta munaykä, saypa trukanqa lapanchöpis runa mayï ali kawananpaq y saynöpa askaq salvakuyänantami munaykä.