ZAKKAARIYAASI 8 - Qullaawa Maxaafa

YERUSAALAME ALBI GEDEETA IKKITANNO GEDE KAALIIQI UYINO HEXXO

¹ Olantote Mootichi Kaaliiqi Zakkaariyaasira,

² «Mannisera nooe baxilli daafira, Yerusaalame kaa'lammora hasi'reemmo; diinnasera hanqeemmo gede assinoehuno isera nooe baxilleeti. Ani Olantote Mootichi Kaaliiqaati.

³ Ani qullaawa katama'ya Yerusaalame galagale hige hakko hee'reemmo; ammanamino manni hee'ranno katamaati yineenna egenname hee'ranno; Mini'ya noowi Tsiyooni Ilaali, qullaawa ilaalaati yineenna egenname hee'ranno» yii.

⁴ Olantote Mootichi Kaaliiqi lede, «Bordunni ha'ranno geerri galagale katamu gudumaalira yaaddo nookkiha songanno.

⁵ Qoleno, oosonna seennu doogga baalate wo'mite godo'litanno» yaanno.

⁶ Olantote Mootichi Kaaliiqi, «Kuni, qafadotenni gate higara noo mannira dandaamannokkiha lawansara dandaanno; anera kayinni dandaamannokkiha di"ikkino.

⁷ Ani manna'ya qafadame hee'ranno gobbanni soojjaatinninna galchiminni qole abbeemmo.

⁸ Abbe Yerusaalamete heedhanno gede asseemmonsa; insa manna'ya ikkitanno; anino Maganonsa ikkeemmo; taalotenninna halaalunni Maganonsa ikkeemmo» yaanno.

⁹ Olantote Mootichi Kaaliiqi, «Qullaawu Maganu Mine layinkimeeshsho minate sanfanni yannara, himanaano coyidhinore macciishshitiniri baalunku jawaatte! Waajjitinoonte!

¹⁰ Hatte yannara albaanni, mannu mereero gibbonna yekkeerama batidhanno gede assoommohura, diinu waajjishiishshinni kainohunni ayino keere hee'rara didandiino; woxu hoonginni kainohunnino, manna kirunni loosiisi'ranna saadano kiraho aa didandiinoonni.

¹¹ Xa kayinni, qafadotenni gatte higgannorira alba assummo gede diasseemmo.

¹² Gidensa keerunni wixidhanno; woyinensano lowo laalo amaddanno; lowo xeeni hee'ranno daafira, baatto lowo gide uyitanno; gatino manni'yara konne baala atoote eemmonsa.

¹³ Ki'ne Yihudunna Israeelete manna, kunni albaanni wole daga mimmitonsa, ‹Yihudunna Israeelete iillitino rumo amaddo'ne› yitanni runtanno. Xa kayinni ani gatiseemmo'ne daafira, galagalte mimmitonsa, ‹Yihudahonna Israeelete iillitino maasso iillito'ne› yitanni maassidhanno. Kunnira, jawaatte! Waajjitinoonte» yaanno.

¹⁴ Olantote Mootichi Kaaliiqi, «Akaakka'ne hanqissue yannara, insara hedoommo bao abboommo ikkinnina, murte'ya diaguroommo.

¹⁵ Xa kayinni, Yerusaalametenna Yihudu manna maassi'rammora murci'roommo; kunnira, waajjitinoonte!

¹⁶ Ki'ne assa hasiisanno'ne coyi, mimmiti'nera halaale coyidhe; yoote songowa keere abbate taalo coyidhe.

¹⁷ Mimmiti'nera busha heddinoonte; kaphunni xaartine naqqassinoonte; ani kapho, halaale dawisanna beebba giweemmo» yaanno.

¹⁸ Olantote Mootichi Kaaliiqi ane Zakkaariyaasira lede,

¹⁹ «Ki'ne Yihudu manni, shoolkiha ontikkiha, lamalkihanna tonnikki agana agartine qatuntine huuccidhinanni barri, jilunnihanna hagiirrunniha ikkanno'ne; ki'nella kayinni halaalenna keeraanchimma baxxe» yiie.

²⁰ Olantote Mootichi Kaaliiqi, «Wole gosaranna addi addi katammara hee'ranno manni Yerusaalame higanno yanna dagganno.

²¹ Mittu kataminni dagginori wolu kataminni dagginore, ‹Olantote Mootichi Kaaliiqira kumbuulatenna atoote aannonke gede iso huucci'rate amme hakkiichira ha'nona› yitanno.

²² Kunni garinni Olantote Mootichira Kaaliiqira kumbuultaranna isi atoote adhate huuccidhara lowo manninna wolqaataame gosa Yerusaalame dagganno.

²³ Hakka waro, tonnu wole gobba manni mittu Yihudichiwa mare, uddanosi handaara amade, ‹Maganu ki'ne ledo noota macciishshinoommona, ninkeno ledo'ne ha'noni?› yite xa'midhanno» yii.