ZAKKAARIYAASI 6 - Qullaawa Maxaafa

ZAKKAARIYAASI 4 FARADI GAARE AFI

¹ Wole ajuujanni 4 faradi gaare 2 camote ilaalla mereerinni fultanna afummo.

² Umi faradi gaare duummaaddu faradi goshooshanna, layinkita koliddaannu faradi goshooshanni no;

³ sayikkita, waajjuullu faradi goshooshanna, shoolkita odole faradi goshooshanni no; baalunku faradi wolqaataammaho.

⁴ Anino, «Mooticha'ya tini faradi gaare mayinnite?» yee sokkaasincho xa'mummo.

⁵ Isino, «Kuri 4 bubbeeti; umonsa gobba baalate Kaaliiqira uyite heedhannori xaalla isiwiinni fulte daggino» yiie.

⁶ Koliddaannu faradi goshooshanni noo faradi gaare, aliyyera Baabilooni, waajjuullu faradi goshooshanni nooti galchimira, odole faradi goshooshanni nooti wodiidi gobba higge hadhu.

⁷ Kuni wolqaataamu faradi daye, gobba dooyyate muddamino daafira uurra giwi. Sokkaasinchuno, «Hadhine gobba dooyye!» yiinsa. Insano yiino gede assitu.

⁸ Hakkunni gedensaanni sokkaasinchu, «Aliyyera hige ha'ri faradi, Maganu Ayyaani asse yiinore assino» yee naggi yitino qoonqonni coyi'rie.

DOORROONNI GASHSHAANCHO

⁹ Kaaliiqi,

¹⁰ «Soffooniyaasi beetti Iyosiyaasi minira marte, Baabilooni gobbanni qafadotenni higginori Heldayi, Xobbiyanna Yidaiya yinanniri uyitino culkanna birra xaanni keeshshittokkinni haadhe abbi;

¹¹ insa uyitino birrinninna culkinni ayirrado ba'latto seekkite, qeesootu qarira Iyotsedeqi beetti Iyyaasura umoho wori.

¹² Hakkunni gedensaanni, Olantote Mootichi Kaaliiqi, ‹Sinaho yinanni manchi sinu gede ikke lophe aneha Qullaawa Mine galagalche minanno.

¹³ Qullaawa Mine'ya minannohunna mootimmate hasiisanno ayirrinye adhe, manna'ya gashshannohu isooti; mittu qeesichi isi barcimi mule uurranno; lamunku mitteenni sumuu yite keerunni loossanno.›

¹⁴ Ayirrado ba'lattono Qullaawa Mine'ya heedhona. Mannuno ise la"anno woyite, Heldaya, Xobbiyanna Yidaiya qaaganno; qoleno, Soffooniyaasi beetti Iyosiyaasi mageeshshi geeshsha shaqqado ikkinoro qaaganno» yiie.

¹⁵ Hatte yannara, fafowa hee'ranno manni Kaaliiqiha Qullaawa Mine galagalche mina kaa'lara daanno. Qullaawu Mini'ya minamanno yannara, ki'newa soyinoehu Olantote Mooticha Kaaliiqa ikkinota affinanni. Kuni baalunku wo'mannohu Magani'ne Kaaliiqira hajajantinirooti.