ZAKKAARIYAASI 14 - Qullaawa Maxaafa

GOOFIMARCHU OLANNA MOOTICHU DAA

¹ Kaaliiqi, «Anehu yoote barri iillino; hatte yannara, diinna'ne Yerusaalame saantanno. Jajja'neno ki'ne la'inanna beeqqitanno.

² Yerusaalame qassanno gede daga gamba asse abbeemmo; katama amaddanno; minna soqqanno; meentono amadde shollishshanno; mannu giddonni daratu qafadame ha'ranno; gatinohu kayinni katamunni difulanno» yaanno.

³ Hakkunni gedensaanni, Kaaliiqi sa'u yannara assinte gede, hattenne daga qasara ka"anno.

⁴ Hatte yannara, isi Yerusaalamete soojjaatoonni noohura Ejedhete Ilaali aana uurranno; hala'ladu lagichi Ejedhete Ilaala soojjaatinni galchimira hige ha're lamewa badanno; kunnira, daratu ilaali aliyyera, daratu ilaali qole wodiidira hige gatanno.

⁵ Ki'neno ilaala lamewa beehe Etseeli yinanniwa iillino lagichi giddoonni higgine xooqqinanni. Yihudu moote Ooziya yannara, baatto milli yitu waro, akaakka'ne xooqqu gede ikkitine xooqqinanni. Kaaliiqi Magani'ya qullaawa sokkaasinesi baala hoodete adhe daanno.

⁶ Hakka waro, qorrunna kaade horontanni diheedhanno.

⁷ Hakku barri xawaabba agurranna tunsichu dihee'rannoho; kuni ikkannohu mamooteetiro Kaaliiqi egennino.

⁸ Hakko barra, Yerusaalametenni haaru heeshshote wayi fule, taalootu Reyino Baari widira, taalootu Mediteraaniyu Baari widira hige lolahanno; arro hawado yiikkinni diro wo'ma lolahanni hee'ranno.

⁹ Hatte yannara, Kaaliiqi kalqe baalate moote ikkanno; mannu baalu isi callu Magano ikkinota egenne su'masi ayirrisanno.

¹⁰ Aliyye Geeba Kataminni kayise, Yerusaalamete wodiidi widoonni hige Remooni Katami geeshsha noo gobba taalo ikkitanno. Yerusaalame gaangaawisera noo gobbara iimaanni higge leeltanno; katamuno Biiniyaami xullichinni kayise, bashsho albi xullichi, xa maddete xullichooti yinannihu geeshsha, hattono Hanaanieeli shae huxxunnitenni kayise, mootete mini woyine huuncinanni dargi geeshsha iillitanno.

¹¹ Yerusaalamete manni, yaaddo nookkiha teese hee'ranno; kunni ka'a bao diamaddannonsa; mannuno yaaddo nookkiha keerunni hee'ranno.

¹² Yerusaalame qasara ka"anno manni aana Kaaliiqi daneessanno dhibba abbanno; lubbotenni heedheennanni manninatinsa da'muulanno; illensanna arrawinsano shamanno.

¹³ Hatte yannara, Kaaliiqi masillenna waajja soyenna, mimmitonsa shite guddanno.

¹⁴ Yihudu manni nafa Yerusaalame qasanno; gaangaawisera noo dagano jiro baalanta adhitanno; adhitanno jajjino kiiro anfoonnikki culkaati, birraatinna imaanaati.

¹⁵ Diininsa saada: Farado, gaangoota, gaalanna harre baalanta kuni bushu dhibbi gudanno.

¹⁶ Hakkunni gedensaanni, Yerusaalame qassu daga giddonni baotenni gattinori, Olantote Mootichi Kaaliiqira kumbuultaranna Daasu Ayyaana ayirrissara diru dirunkunni Yerusaalame dagganno.

¹⁷ Olantote Mooticha Kaaliiqa mootensa assidhe kumbuultara daggannokki gosara xeena diganannonsa.

¹⁸ Gibitsete mannino ayyaana ayirrisate Yerusaalame daye Kaaliiqa magansi'ra giwiro, «Yerusaalame marre Daasu Ayyaana diayirrinseemmo» yitannore, wole dagara soyi moollenni ganannonsa.

¹⁹ Gibitsete mannano ikko wolootu dagate mootoolla, Daasu Ayyaana ayirrisa gibburo, iillannonsa qorichi konneeti.

²⁰ Hatte yannara, faradu goowira qili yaanno bilbili baalu aana, «Kaaliiqira aamaminoho» yine borreessinanni. Kaaliiqi Mine nooti gafi'nanni midaancho, kakkalote dargi saane gede qullaawa ikkitanno.

²¹ Yerusaalametenna Yihudu gobbara hee'ranno midaanni baalu, Olantote Mootichi Kaaliiqira qullaawoota ikkanno. Kakkalo shiqishanno manni baalu, midaannu giddonni gama haa're kakkalote maala gafanno. Hatte yannara, Olantote Mootichi Kaaliiqi Mine ayino didadda'lanno.