ZAKKAARIYAASI 10 - Qullaawa Maxaafa

KAALIIQI MANNASI GATISATE UYINO HEXXO

¹ Gomicho soye xeena dirrisatenni mannaho baatto shaqqishannohu isootina, Kaaliiqi yannasira xeena aanno'ne gede huuccidhe.

² Mannu magannansanna kiilaanonsa xa'mi'ranno; afidhanno dawaro kayinni kaphohonna haafaho. Mitu mitu kaphu haaqee tirtanno; ikkollana kayinni so'risiisannonsa; mulla haafa sheshifachishshannonsa; kunnira mannu baino ge'reewi gede ikke raataawanno; allaalaanchu hooginonsahura qarramanno.

³ Kaaliiqi, «Hanqi'ya allaalaasinete aana buwino; anino hakkore bushuulle roorroota qorichisheemmo; olantote Mooticha ikkoommohu ani Kaaliiqi umi'ya hoshsha Yihudu manna seekke agareemmo; insano jawaatu olu faradi gedeere assi'reemmonsa.

⁴ Insa giddonni fulannohu mitu, dhaawate kinchi gedeeha, mitu minu mokkollichi gedeehanna mitu qole olu bagadi gedeeha ikkanno.

⁵ Yihudu manni diinnasi kade doogote sabbi ledo karsiisannoha wolqaataamo bagadaancho ikkanno; Kaaliiqi ledonsa noohura, jawaate olame faradaasine nafa gattukkinni qeele saalfachishanno.

⁶ «Ani Yihudu manna jawaata asseemmo; Israeelete mannano gatiseemmo; marareemmonsa daafira galagalche gobbansa qoleemmonsa. Ani Kaaliiqi Maganinsa huuccattonsa macciishsheemmo daafira, kunni albaanni horonta agure egennoommonsakkiri gedeere ikkitanno.

⁷ Israeelete manni jawaata olanto ikkanno; woyinete xajje aganni noo manni gede hisatanno. Oosonsano tenne qeelle qaagganni hagiidhitanno; Kaaliiqi assinore heddanna tashshi yaannonsa.

⁸ Manna'ya fiiqattotenni woshshe gamba asseemmo; gatise fushshe, kiironsa albinte gede batiseemmo.

⁹ Dagate mereero billaallisummonsarono, hakko fafo gobbara heedhe qaaggannoe. Insanna oosonsa gattanno; mitteenni gobbansa higganno.

¹⁰ Gibitsete gobbanni qoleemmonsa; Asoorinni gamba asseemmonsa. Gobbansara mannu bati'ranno daafira, Geleaadinna Libaanoosi gobbara heedhanno gede asseemmonsa.

¹¹ Qarru baari giddoonni sa'anno woyite, ani Kaaliiqi dambala heeshshi asseemmo. Diime ikkinohu Abbayi Wayi moolanno; boonaaleeyye Asoori gosa shollitanno; Gibitseno wolqa hoogganno.

¹² Ani manna'ya dhaabbachisheemmo; insano qaali'yara hajajantanni su'ma'ya ayirrissanno. Konne coyi'roommohu ani Kaaliiqaati» yaanno.