YOHAANNISI 7 - Qullaawa Maxaafa

YESUUSI DAASU AYYAANA AYIRRINSANNIWA HA'RANNO GEDE XA'MINI

¹ Hakkunni gedensaanni Yesuusi Galiilaho ha'ramanni keeshshi. Ayihude shitasira hasidhanno daafira, Yihudu giddo ha'rama dihasi'rino.

² Hatte yannara Ayihudete Daasu Ayyaana ayirrinsanni yanna iillite no.

³ Kunnira Yesuusi roduuwi dagge, «Rosaanokki leellishatto maalale la'anno gede, kawiinni ka'e Yihudu gobba ha'ri!

⁴ Mannu afasira hasi'rannohu, looso maaxame diloosanno. Ati konne coye baala assatto woyite, mannu atere afa hasiissanno» yitu.

⁵ Hatto yitinohu insa uminsa iso ammantinokkihuraati.

⁶ Yesuusi, «Ane yanna xaara di"iillitino; ki'nera yanna baala injiitinote.

⁷ Alame ki'ne digibbanno'ne; ane kayinni loosise busha ikkinota coyi'reemmo daafira gibbannoe.

⁸ Ki'ne ayyaana ayirrinsanniwa hadhe. Ani kayinni yanna'ya iillitinokki daafira diha'reemmo» yiinsa.

⁹ Hatto yee isi Galiilaho gati.

YESUUSI DAASU AYYAANA AYIRRINSANNIWA HA'RI

¹⁰ Ikkollana, roduuwisi ayyaana ayirrinsanniwa hadhuta, isino mannu afannokki gede ikke hakkiira mari.

¹¹ Ayyaana ayirrinsanniwa Ayihudete gashshaano, «Isi hiikko no?» yitanni hassu.

¹² Mannuno isire kayise hashaashamanna mitu mitu, «Isi dancha manchooti» yii. Wolootu kayinni, «Dee'ni, isi manna so'risiisanno» yitu.

¹³ Ikkollana Ayihudete gashshaano waajjitino daafira, ayino isire xawo fushshe coyi'rinohu dino.

¹⁴ Ayyaana ayirrinsanni mereero iilline hee'neenna Yesuusi Qullaawa Mine mare rosiisa hanafi.

¹⁵ Ayihudete gashshaano, «Kuni manchi rosiinsisikkinni konne baala hiitto ikke afa dandii?» yite dhaggeeffattu.

¹⁶ Kunnira Yesuusi, «Ane rosi, soyinoehu Anni'yawiinniiti ikkinnina anewiinni di"ikkino.

¹⁷ Soyinoehu hedo wonsha hasi'rannohu, kuni rosi Maganunnihoronna ani umi'yanni coyi'reemmohoro afanno.

¹⁸ Umisinni coyi'rannohu umisi ayirrinye hasi'ranno; soyinosihu ayirrinyira yee loosannohu kayinni halaalaanchoho; kaphuno dinosi.

¹⁹ Muse Seera diuyino'ne? Giddo'ne kayinni hakkonne seera wonshannohu mittuno dino. Ki'ne ane shitinara mayira hasidhinanni?» yee qolinsa.

²⁰ Mannu, «Giddokki durriisu no; shaahera hasi'rannohu ayeti?» yii.

²¹ Yesuusi qole, «Ani mitte maalale loosoommo; ki'ne baalunku dhagge assidhinanni.

²² Muse ki'nera barcimate seera uyino'ne. Kuni seeri annuwatewiinni dayinoho ikkinnina Museha di"ikkino; ki'ne manna Fooliishshote Barra barcimshiishshinanni.

²³ Muse widoonni qolle uyinoonni Seeri ba"annokki gede mannu Fooliishshote Barra barcimannoha ikkiro, ani Fooliishshote Barra mannu manninate gudise hursa'yara mayira hanqitinanniyya?

²⁴ Halaalu yoo yiiyye ikkinnina manna alba la'ine coyidhinoonte!» yiinsa.

KIRISTOOSI DAAFIRA KA'INO XA'MO

²⁵ Yerusaalamete manni giddonni mitu mitu, «Shitara hasidhanno manchi konne di"ikkino?

²⁶ Kune isi xawoho coyi'ranno; insa mittoreno diyitinosi. Kuni manchi Kiristoosa ikkinota roorrootu affino ikka?

²⁷ Kuni manchi maminni dayinoro ninke anfoommo; Kiristoosi maminni daannoro afinonku dino» yitu.

²⁸ Kunnira Yesuusi Qullaawa Mine qaalesi naggi asse, «Ane egentinoonnie; maminni dayommorono affinoonni; ikkollana, ani umi'ya roorrenni didayommo. Soyinoehu halaalaanchoho; ki'ne diegentinoonnisi.

²⁹ Ani kayinni isiwiinni dayommohuranna isi soyinoeha ikkoommo daafira egennoommosi» yii.

³⁰ Hakka woyite amaddasira hasidhu; ikkollana, yannasi iillitinokki daafira ayino angatenni diamadinosi.

³¹ Lowo manni iso ammani. Qoleno, «Kiristoosi dayiro kuni manchi loosino dhaggenni roore loosa ikka?» yii.

YESUUSA AMADDARA SONKOONNI GAADDO

³² Farisootu, mannu Yesuusire hashaashamanna macciishshitu. Kunnira qeesootu roorrootinna Farisootu Yesuusa amaddanno gede gaaddo sokku.

³³ Hatte yannara Yesuusi, «Ki'ne ledo shiima yannalla keeshsheemmo; hakkunni gedensaanni soyinoehuwa ha'reemmo.

³⁴ Ki'ne hasidhinannie; kayinnilla diafidhinannie. Ani noommowa ki'ne daggine diaffinanni» yiinsa.

³⁵ Kunnira Ayihudete roorrooti insa insanaawa, «Kuni manchi ninke anfeemmokkiwa hiikka ha'raraati ikka? Giriikootu gobba giddo billaallite noo Ayihudewa mare insa rosiisaraati ikka?

³⁶ ‹Ki'ne hasidhinannie; kayinnilla diafidhinannie. Ani noommowa ki'ne dagginara didandiitinanni› yaasi ma yaate?» yitu.

HEESHSHO AANNO WAA

³⁷ Ayyaana ayirrinsannihu gumulotenna lowo geeshsha ayirradu barrinni, Yesuusi uurre qoonqosi naggi asse, «Waa goo'rinohu hee'riro anewa daye ago.

³⁸ Qullaawu Maxaafi yaannonte gede, ane ammaninohu giddonni heeshsho aanno wayi buicho fultanno» yii.

³⁹ Yesuusi konne coye coyi'rinohu iso ammantinori adhitannohu Qullaawu Ayyaani daafiraati. Yesuusi hatte yannara ayirrinyunniwa einokki daafira, Qullaawu Ayyaani ammanaasinenniwa didayino.

MANNU MEREERO KALAQAMINO BABBADOOSHSHE

⁴⁰ Konne coye macciishshi yannara gamu manni, «Halaalintanni kuni manchi himanaanchoho» yii.

⁴¹ Gamu kayinni, «Kuni Kiristoosaati» yii. Wolootu qolte, «Kiristoosi fulannohu Galiilunniitini?

⁴² Kiristoosi Daawiti sirchi giddo ilamannotanna Beetelihemetenni Daawiti kataminni fulannota Qullaawu Maxaafi dikulanno?» yitu.

⁴³ Kunnira isinni kainohunni mannu mereero babbadooshshu kalaqami.

⁴⁴ Mitu mitu amaddasira hasidhino; ikkollana, ayino angatenni diamadinosi.

AYIHUDETE ROORROOTI AMMANA GIBBU

⁴⁵ Hakkunni gedensaanni agaraasine qeesootu roorrootiwanna Farisootunniwa marteenna, «Iso haadhine abba mayira gibbini?» yitunsa.

⁴⁶ Agaraasineno, «Kuni manchi coyi'ranno garinni ayino coyi're diegennino» yitu.

⁴⁷ Farisootu kayinni, «Ki'neno sodhinini?

⁴⁸ Xaa geeshsha gashshaanotenna Farisootu giddonni iso ammaninohu nooni?

⁴⁹ Muse Seera egenninokkihu kuni manni rumaminoho» yitu.

⁵⁰ Kunni albaanni Yesuusiwa marihu Farisootu giddonni mittu Niqoodimoosi,

⁵¹ «Seerinke garinni mittu manchi ku'lannorenna assinore anfikkinni yoo yinannini?» yiinsa.

⁵² Insa qolte, «Atino Galiilunni dayottoho? Galiilunni himanaanchu fulannokkita Qullaawa Maxaaffa giddo buuxxe lai» yitu.

⁵³ Hakkunni gedensaanni baalunku qae qaensa hadhu.