YOHAANNISI 21 - Qullaawa Maxaafa

YESUUSI LAMALA ROSAANOSIRA LEELLI

¹ Hakkunni gedensaanni Yesuusi xaano rosaanosira Xibiriyadoosi Baari mule leelli. Leellinohu,

² Simiooni Pheexiroosira, Didimoosi yinannihura Toomaasira, Qaana Galiilunnihura Naatinaeelira, Zebidewoosi oosoranna wole lame rosaanoraati.

³ Simiooni Pheexiroosi, «Ani qulxu'me woshshaaxxammora ha'reemmo» yiinsa. Insano, «Ate ledo ha'neemmo» yitu. Fulte marte yowolo e'u. Ikkollana hakko hashsha mitte qulxu'me nafa diamaddino.

⁴ Soodo guto Yesuusi baaru gama uurre no. Rosaanosi kayinni Yesuusa ikkinota diaffino.

⁵ Yesuusino, «Ooso, mitiri qulxu'mu noo'neni?» yiinsa. Insano, «Mitturino dinonke» yitu.

⁶ Isi qole, «Afidhinannina, woshshaado'ne yowolote qiniiteenni tugge» yiinsa. Insano woshshaado baaru giddora tuggu. Woshshaado lowo qulxu'me amaddino daafira giddonni goshooshshe fushsha hooggu.

⁷ Hatte yannara Yesuusi baxannosi rosaanchi Pheexiroosira, «Mootichahowe!» yii. Simiooni Pheexiroosi, «Mootichahowe!» yiita macciishshe, loosoho yee uddano fushshi're noo daafira, hakkawoyintenni uddano uddi're baaru giddora kubbe ei.

⁸ Wole rosaano kayinni baaru gaminni 100 qaafo faffe noo daafira, qulxu'mu wo'mino woshshaado goshooshidhanni yowolotenni daggu.

⁹ Yowolote aaninni dirritu woyite, qulxu'michu aanaho nooha maashshi yiino kashilchonna shiima tima affu.

¹⁰ Yesuusino, «Xa amaddini qulxu'mi giddonni shiima haadhine abbe!» yii.

¹¹ Simiooni Pheexiroosino yowolo gidde jajjabba 153 qulxu'me amaddino woshshaado goshooshe fushshi. Hakkeeshshi qulxu'me amadde heedhenni woshshaado didadhantino.

¹² Hakkunni gedensaanni Yesuusi, «Daggine shoo'me!» yiinsa. Mooticha ikkinota baalunku affino daafira, rosaanosi giddonni mittuno ugge, «Ati ayeti?» yee xa'minosihu dino.

¹³ Yesuusi daye tima haa're uyinsa; qulxu'meno haa're uyinsa.

¹⁴ Yesuusi reyotenni kaihu gedensaanni rosaanosira leellanna tini sayikkite.

YESUUSINNA PHEEXIROOSI

¹⁵ Shoo'mite ka'uhu gedensaanni, Yesuusi Simiooni Pheexiroosi, «Yoona beetto Simiooni, kuri baxxannoehunni roorsite baxattoeni?» yiisi. Pheexiroosino, «Eewa Mooticha'ya, baxeemmoheta atinni afootto» yiisi. Yesuusino, «Wilii'le'ya towati!» yiisi.

¹⁶ Layinkimeeshshono, «Yoona beetto Simiooni, baxattoeni?» yiisi. Isino, «Eewa Mooticha'ya, baxeemmoheta atinni afootto» yii. Yesuusino, «Goodanna'ya agari!» yiisi.

¹⁷ Sayikkimeeshshono, «Yoona beetto Simiooni, baxattoeni?» yii. Sayikkimeeshsho, «Baxattoeni?» yiino daafira Pheexiroosi dadille, «Mooticha'ya, ati wo'manka coye egennootto; ani baxeemmohetano afootto» yii. Yesuusino, «Ge'reewo'ya allaali!

¹⁸ Halaale yeemmohena, ati aju nootto yannara angakkinni qodhite hasi'rittowa ha'rootto. Geedhittoro kayinni angakki diriirsidheenna wolu manni qodhisiisannohe. Hasi'roottokkiwano haa're massannohe» yiisi.

¹⁹ Hatto yiinosihu, Pheexiroosi ma gari reyonni Magano ayirrisannoro kulanniiti. Hakkunni gedensaanni Yesuusi Pheexiroosi, «Hoode'ya amo!» yii.

YESUUSANNA ISI BAXANNO ROSAANCHO

²⁰ Pheexiroosi caaqqi yee la"anno woyite Yesuusi baxannosi rosaanchi hoodesi daanna afi. Kuni rosaanchi hurbaate ittu yannara Yesuusiwa goowa shiqqi asse, «Mooticha, sayise aannohehu ayeti?» yee xa'miho.

²¹ Pheexiroosi iso lae, «Mooticha, kuni manchi hiikkannoyya?» yee Yesuusa xa'mi.

²² Yesuusino, «Ani daammo geeshsha hee'riro atera mayi xiwihe? Ati hoode'ya amo!» yii.

²³ Kunni daafira roduuwu mereero, «Kuni rosaanchi direyanno» yinanni hasaawi bati'ri. Ikkollana Yesuusi, «Ani daammo geeshsha hee'riro atera mayi xiwihe?» yiinota ikkinnina, «Direyanno» diyiino.

²⁴ Kunnira, konne coye farci'rinohunna borreessinohu konne rosaanchooti. Isi farci'rinorino halaale ikkinota egenninoommo.

²⁵ Yesuusi assinohu wolu lowo coyi no. Ani hedeemmo gede ikkiro kayinni, isi assino coye baala mitto mittonka borreessinoommero, borreessinoonni maxaaffa gobba baala dibayidhanno.