YAIQOOBI 3 - Qullaawa Maxaafa

ARRAWO EEMADHA

¹ Roduuwa'ya! Ninke rosiisaano ikkinoommorira roore yoo agartannonketa affinoonnina, ki'ne giddonni lowo manni rosiisaano ikkoonke.

² Ninke baalunku wo'manka woyite so'neemmo; arrawosi eemadhannohu, isonoo qee'linoho; guuta manchooti.

³ Farashshu assinita ikkanno gede, afooho bixaala qanse hasi'ni widira qolle haa'ne ha'nanni.

⁴ Markaawe jawa ikkite heedhenni lowo bubbe xiibbannota ikkiturono, amadino manchi shiimu laaqi'raanchinni hasi'ri widira qole haa're ha'ranno.

⁵ Arrawuno mannimmanke giddo shiimiidi bisooti; ikkirono jajjabbu coyinni naaxxanno. Lowo dubbo shiima giira ittanno.

⁶ Arrawuno giirate gedeeti; arrawu mannimmanke giddo busha alameeti. Mannimmanke batteessanno; gaannaamete giira gede heeshshonke qaafo baala giiranno.

⁷ Baattote aani moyichinna cea, godowunni ha'rannorinna wayi giddo hee'ranno kalaqami baalu mannu assita ikkanno; miiranno.

⁸ Arrawo hajaja dandaannohu kayinni mittuno dino; shaanno harfi wo'minohonna fooliishsho nookki bushaati.

⁹ Isinni Annanke Magano galanteemmo; isinni Maganu suudinni kalaqamino manna rummeemmo.

¹⁰ Mittu afiinni galatunna rumo fultanno. Roduuwa'ya! Kuni ikka dihasiissanno.

¹¹ Mitte buicho giddonni angannihu coommannohunna qaraaranno wayi fulannoni?

¹² Roduuwa'ya! Balasete haqqicho ejersu guma laala dandiitannoni? Woy woyinete haqqicho balasete guma laala dandiitannoni? Qaraaranno wayi giddonni coommanno wayi fulannoni?

GORDUNNITANNA BAATTOTE EGENNO

¹³ Ki'ne giddo hayyichunna egennaamu ayeti? Hayyotenninna joongillunni loosinoha dancha looso heeshshosinni leellisho.

¹⁴ Dhiibbenna ufunimma wodanaho heedhu'nero kayinni naaxxitinoonte. Halaale wirtinoonte.

¹⁵ Hattoo egenno alametenni, maalunninna daawuloosiwiinni dagginote ikkinnina Maganunnita di"ikkitino.

¹⁶ Dhiibbenna ufunimma noowa cancunna bunshe baala heedhanno.

¹⁷ Gordu egenno kayinni umonni xalalate. Qolteno keere baxxannote, ga'labbittete, owaatate, sao agurtannote, danchu gumi giddo wo'minote, godowa hosanna awaawurshu nookkite.

¹⁸ Keere baxxannori, keere wixidhe keeraanchimmate guma gamba assidhanno.