UMI SAAMUEELI 8 - Qullaawa Maxaafa

ISRAEELE MOOTE MOOHINSANSARA HASIDHU

¹ Saamueeli geedhi yannara, oososi Israeele gashshitanno gede worino.

² Bayiru beettisi Iyueeliiti; maa'nu Abiyaati. Insa Bersaabehi gashshitino.

³ Ikkollana insa anninsa doogo dihadhino; qiniite afidhara yite doogimale gede ikkitino. Nyaanyo ittanni yoono shokkishshino.

⁴ Kunnira Israeelete geerri baalunku mittowa gamba yite Raama Saamueeliwa ka'e daggu.

⁵ Insano, «Ati xa geedhootto; oosokki ate doogo dihadhino. Kunni daafira wole gosa assidhannonte gede gashshannonke moote moohisinke» yitusi.

⁶ Ikkollana, «Gashshannonke moote moohisinke» yaansa Saamueeli dihagiirsiissinosi. Kunni coyi daafira Kaaliiqa huuccino.

⁷ Kaaliiqino Saamueelira, «Moote ikkeemmonsakki gede anella mishshinota ikkinnina ate dimishshinona, yitannohere baala haa'ri.

⁸ Gibitsete baattonni fushshummonsa barrinni kayisse, ane agurte wole maganna magansidhunte gede ate aanano tenne assitanni no.

⁹ Ati kayinni yitannoheta macciishshi; mookkannonsa mootoolla assitannonsatano kulte qorophisiisinsa» yiisi.

¹⁰ Saamueelino Kaaliiqi yiinosire baala, moote moohisansara xa'misi mannira kulino.

¹¹ Qoleno, «Mookkanno'ne mootoolla togo assitanno'ne: Ooso'ne haadhe olaho qodhisiissanno. Insa giddonnino gama faradi gaare gantannore, gama faradaasine, woloota qolte faradi gaarensara albaanni doddannore assidhanno.

¹² Mito mito ontawu roorrootanna xibbu roorroota assitanno. Woloota baatto loossannorenna gide gamba assitannore, gattinoreno olu uduunnenna faradi gaarete uduunne seekkitannore assidhanno.

¹³ Seenne'ne haadhe shitto seekkannorenna sagale qishannore assidhanno.

¹⁴ Seyino seyinoha loosidhinanniha, woyine'nehanna ejersu kaashshi'ne darga haadhe ledonsa gashshaanora uyitanno.

¹⁵ Gidi'nehanna woyine'neha tonnunni mitte anga haadhe amaalaasinensaranna roorrootaho uyitanno.

¹⁶ Soqqamaasine'ne, seyinoha lalo'nenna haarre'ne adhite uminsa hornya assidhanno.

¹⁷ Ge'reewunna meu giddonnino tonnunni mitto adhitanno. Ki'ne umo'neno borojje assidhanno'ne.

¹⁸ Hakko barri iillanno woyite, baxxine doodhitinoonni moote assanno'ne beebbanni kainohunni raartinanni. Kaaliiqi kayinni hakka waro dimacciishshanno'ne» yiinsa.

¹⁹ Mannu kayinni Saamueeli yiinota macciishsha giwe, «Dee'ni, ninke moote hasi'neemmo.

²⁰ Ninkeno wole gosa gede gashshannonkehanna olu yannara albaanni ha'rannonke moote hasi'neemmo» yii.

²¹ Saamueelino mannu yiinota baala macciishshe, Kaaliiqira kuli.

²² Kaaliiqino, «Yitinota macciishshi; mooteno moohisinsa» yiisi. Hakkunni gedensaanni Saamueeli Israeelete manna, «Baalunku qae qae'ne hadhe» yiinsa.