UMI SAAMUEELI 7 - Qullaawa Maxaafa

¹ Qiriyaati-Yiariimi mannino daye Kaaliiqi Taaboota gaaru aana noohuwa Aminaadaabi minira haa're massi. Beettosi Aliaazaarino Kaaliiqi Taaboota agarate baxxinoha assi.

SAAMUEELI ISRAEELE GASHSHI

² Taabootu Qiriyaati-Yiariimi lowo yanna keeshshino. Hakko hee'rino yanna lemuu diri geeshsha ikkitanno. Hatte yannara, Israeelete manni baalu lowo geeshsha dadille kaa'lote Kaaliiqiwa hige raari.

³ Saamueelino Israeelete manna baalanka, «Co'o yiino wodaninni Kaaliiqiwa higginanniha ikkiro, wole gobba magannanna Astaarooti misile giddo'nenni fushshe. Heeshsho'ne gudissine Kaaliiqira uuyye; iso calla magansidhe. Isino Filisxeemete anganni gatisanno'ne» yiinsa.

⁴ Israeeleno Ba"aalinna Astaarooti maganna giddonsanni hoolte, Kaaliiqa calla magansidhu.

⁵ Hakkunni gedensaanni Saamueeli Israeelete mannira, «Ki'nera Kaaliiqa huucceemmona, baalunku Mitsipha gamba yiiyye» yii.

⁶ Israeeleno Mitsipha gamba yite, waa hinkiilte Kaaliiqi albaanni duntu. Hakko barranni ita aga agurte, «Ninke Kaaliiqi aana sao assinoommo» yite aagintaabbu. Saamueelino hakkiicho Mitsipha Israeelete mannira coye afanni hee'ri.

⁷ Israeele Mitsipha gamba yite noota Filisxeeme affe, ontunku gashshaano olantonsa adhite Israeele qassara fultu. Israeeleno konne coye macciishshite waajjitu.

⁸ Saamueelirano, «Maganinke Kaaliiqi Filisxeemete anganni gatisannonke gede huucca agurtootinke» yitusi.

⁹ Saamueelino mitto qananni nooha ge'rechu wilii'licho haa're, gudise shilqote kakkalo asse Kaaliiqira shiqishi. Israeelete daafirano Kaaliiqa huucci. Isino huuccattosi macciishshi.

¹⁰ Saamueeli shilqote kakkalo shiqishanni hee'reenna Filisxeeme Israeele qassara shiqqi yite daggu. Ikkollana hakko barra Kaaliiqi gordoho hee're Filisxeemete lowo geeshsha beleqi. Insano garu baeennansa masse Israeelete albinni xooqqu.

¹¹ Israeele Mitsiphanni fulte xooqqanni noo Filisxeemoota Beetikaari Katamira eelaanni noo dargi geeshsha shorritanni doogga baalate shitu.

¹² Hakkunni gedensaanni Saamueeli mitto kincho haa're Mitsiphanna Sheeni katamma mereero uurrise, «Xaa geeshsha Kaaliiqi kaa'linonke» yaanni, «Abeeniezeeri» yee su'ma fushshi.

¹³ Filisxeeme kunni garinni qeelantino. Saamueeli lubbotenni hee'ri yanna baalantera, Kaaliiqi Israeelete gaaraminonsa daafira Filisxeeme diqassinonsa.

¹⁴ Filisxeeme Israeeletewiinni adhitinoti Eqirooninni kayisse Gaati geeshsha noo katamma baala Israeelete higgu. Katammate gaangaawira noo gobba baalano angansara qo'litu. Kana"aanootu ledono sumuu yite heedhino.

¹⁵ Lubbotenni noo geeshsha Saamueeli Israeele gashshino.

¹⁶ Diru dirunkunni Beeteli, Galgalanna Mitsipha towatanni Israeelete mereero hee'ranno coyeno tiranni hee'rino.

¹⁷ Hakkiinni Raama minisira higanno woyiteno, hakko noo manni coye tiranno. Raamano Kaaliiqira kakkalote darga seekkino.