UMI SAAMUEELI 4 - Qullaawa Maxaafa

FILISXEEME GONDOORU TAABOOTA QAFADDU

¹ Hatte yannara Israeele Filisxeeme qassara fultu. Israeele Abeeniezeeri yinanniwa gamba yituta, Filisxeeme qolte Afeeqi yinanniwa kunseentu.

² Filisxeemeno Israeelete ledo ola hanaffu. Lowo oli gedensaanni, Filisxeeme Israeele qeeltu; olu giddono 4,000 ikkitanno Israeele reyitu.

³ Olanto qaera higgu yannara Israeelete sooreeyye, «Techo Kaaliiqi Filisxeeme qeeltannonke gede mayira assi? Kaaliiqi ledonke fule diinu anganni gatisannonke gede, ha'ne isiha Gondooru Taaboota Seelonni abbino» yitu.

⁴ Hakkunni gedensaanni manna Seelora sokke, Wo'manka Dandaanno Kaaliiqiha Gondooru Taaboota abbisiissu. Hakkiicho Kaaliiqihu ayirrinyu barcimi kirubeelira aanaanni no. Lamenti Eeli ooso Afiininna Finihaasi Gondooru Taabooti ledo daggu.

⁵ Kaaliiqihu Gondooru Taabooti qacha ei yannara, Israeele hagiirrunni gobba milli assitu.

⁶ Filisxeemeno konne luulo macciishshite, «Ibiraawootu qachira noohu kuni mayi luulooti ikka?» yite mimmito xa'mitu. Kaaliiqi Taabooti qacha dayinota affu yannara,

⁷ Filisxeeme waajjite, «Magannate giddonni mittu magani qachansa dayinona ba'nummo! Togoo coyi xaade diegenninonke.

⁸ Ba'nummo! Wolqaataame Israeelete maganna anganni ayi gatisannonke? Gibitsoota halalla addi addi qoomaminni gantinoti tenne magannaati.

⁹ Filisxeeme, jawaatte! Labballimma'ne xa leelto. Hakkuyi ka'a kayinni ki'ne Ibiraawoota borojjimma gashshitininsante gede, insano ki'ne qolte hatto assitanno'ne. Labballimma'ne xa leelto; jawaattine olamme!» yitu.

¹⁰ Filisxeeme Israeelete ledo olante qeeltu. Israeeleno xooqqe mittu mittunku dukkana dukkanansa e'u. Olu lowo geeshsha bati'rino daafira, Israeelete giddonni 30,000 manni reyino.

¹¹ Maganunnihu Gondooru Taabootino qafadami; lamenti Eeli ooso Afiininna Finihaasino reyitu.

EELI REYO

¹² Hakko barra mittu Biiniyaamichi olu xawinni buuwanni Seelora kae dayi. Isino dadillesi leellishate uddanosi dare, umisira buko giggishshi're no.

¹³ Hakkiira iillanno woyite, Eeli Maganu Taabooti daafira wodanu goxa giweennasi fule doogote gama ofolle agare no. Manchu katama e"e ikkinore baala hasaaweenna mannu katama raaretenni milli assi.

¹⁴ Eelino raare macciishshe, «Tini raare mayinnite?» yee xa'mi. Duduwo haa're abbi manchi rahe daye ikkinore Eelira kuli.

¹⁵ Hatte yannara Eeli 98 diri geerchooti. Illeno jaaroorte la"a gibbe noosi.

¹⁶ Manchuno Eelira, «Oluwiinni xaalla daanni noommo. Oluwiinni gate fuloommohuno techooti» yee kulisi. Eelino, «Beetto'ya hiittootiyya?» yee xa'mi.

¹⁷ Duduwo abbino manchino, «Israeele qeelante Filisxeemete albinni xooqqino. Lowo geeshsha gawajjitinonke. Lamenti oosokki Afiininna Finihaasino reyitino. Maganunnihu Gondooru Taabootino qafadamino» yee kulisi.

¹⁸ Manchu Kaaliiqi Taabooti qafadaminota kulisita, Eeli katamu waalchira barcimaho ofollinowiinni badhe hige uwi. Geedhino daafiranna manninatisi du'mino daafira uwe haxo hiiqqame reyi. Isi Israeele 40 diro gashshino.

¹⁹ Hatte yannara beettisi Finihaasi galte godowinni no; ilano rakke no. Maganu Taabooti qafadama, ballisenna ayiddaannise reyo macciishshite hedeweelcho gamaa'mite iltu.

²⁰ Reyitara haafattanni heedheenna mulese noo meenti, «Labbaa beetto iloottana jawaati» yiise. Ise kayinni mittoreno dimacciishshitino; mittoreno didawartino.

²¹ Maganu Taabooti qafadaminohura, ballisenna ayiddaannise reyitino daafira, «Maganu ayirrinyi Israeeletewiinni ho'lino» yite qaaqqoho su'ma Ikaaboodi yite fushshitu.

²² Xaano ledde, «Maganu Taabooti qafadamino daafira Maganu ayirrinyi Israeeletewiinni ho'lino» yitu.