UMI SAAMUEELI 31 - Qullaawa Maxaafa

SAAOOLITANNA OOSOSI REYO

¹ Filisxeeme Gilboa Ilaali aana ola fante Israeelenniha lowo manna shitu; Israeeleno qeelante albinsanni xooqqu.

² Filisxeemootu Saaoolinna oososi duudhe shorritunsa. Shorrite iillituhu gedensaanni oososi Yoonaataani, Aminaadaabinna Melkishua shitu.

³ Saaooli noo widoonnino olu kaajjino daafira, diinu olino maxxi daye Saaooli qase lowo geeshsha madiissisi.

⁴ Saaoolino bagadosi duhannoha, «Tini Magano affinokki gosa shite godo'litannoekki gede, bisekki kounni fushshite ati shiie» yiisi. Bagadosi duhannohu kayinni lowo geeshsha waajjino daafira shaa giwi. Kunnira Saaooli umisi bisera dirme reyi.

⁵ Bagado duhannohu Saaooli reyita afe, isino umisi bisera dirme ledosi reyi.

⁶ Kunni garinni Saaoolinna sasunku oososi, ledosi noo manni baalunkunna bagadosi duhannohu mitto barra reyitino.

⁷ Yordaanoosi Wayira soojjaatoonninna Iyiziraeeli Lagichira aliyyeenni heedhanno Israeelooti, Israeelete olanto xooqqinotanna Saaoolinna oososi reyitinota affe, katammansa agurte xooqqeenna, Filisxeemootu dagge amaddu.

⁸ Layinki soodo Filisxeemootu reyitinore mulqidhara dagganno woyite, Saaoolinna sasunku oososi Gilboa Ilaalira ubbe noore affu.

⁹ Hakkunni gedensaanni Saaooli umo murte, bagadosino adhite, qeellete duduwo magannansa minenna manninsa baalaho kulanno gede manna Filisxeemete baatto baala sokku.

¹⁰ Saaooliha olu bagado Astaarooti yinanni magano mine massite wortu. Saaooli reeshsha kayinni Beeteshaani huxxi aana rarraasse agurtu.

¹¹ Geleaadi Katamira Yabiisi hee'ranno manni, Filisxeemootu Saaooli assitinota macciishshe,

¹² hakko katami bareedda baala soyenna hashsha wo'ma Beeteshaanira hadhanni galtu. Saaoolihanna oososi reeshsha huxxu aaninni dirrisse, Yabiisi abbite giirtu.

¹³ Miqqansa kayinni massite tamaarisiki haqqicho hunda madaarte, ita aga agurte 7 barra keeshshitu.