UMI SAAMUEELI 30 - Qullaawa Maxaafa

DAAWITI AMAALEQOOTA GUDI

¹ Daawitinna mannisi sayikki barra Tsiqilaagi iillitu. Martanno woyite Amaaleqootu wodiidi gobbanna Tsiqilaagi horrite no. Katamano giirte,

² meentonna hakko nooha aja akkala baala qafadde haadhe hadhino. Qafaddinoha haadhe hadhinota ikkinnina, mittono dishitino.

³ Daawitinna mannisi Tsiqilaagi iillitanni heedhenni, katamu giiraminota, meentinsa, oosonsanna seenninsa qafadaminota affe,

⁴ qaale fushshi'ra hoogga geeshsha raarte wi'litu.

⁵ Lamenti Daawiti meenti Iyizireelitte Akinahoominna alba Qermeloosichu Naabaali adhinoti galtesi Abigiyano qafadante no.

⁶ Mannu oosonsanna seenninsa daafira giiraminohura Daawiti shaara ma'linota Daawiti macciishshe lowo geeshsha yaadi. Daawiti kayinni Maganisi Kaaliiqinni jawaati.

⁷ Hakkunni gedensaanni Daawiti Ahimeleeki beetto qeesicha Abiyaataari, «Assa hasiissannonkere Kaaliiqa xa'mineemmona amo» yiisi. Abiyaataarino Maganu yaannore afate Efuudi haa're shiqishi.

⁸ Daawiti, «Konne horrinke diina hordofoni? Iillammo ikka?» yee Kaaliiqa xa'mi. Kaaliiqino, «Ee, iillite qafadaminoha manna'ne baala gatisse qolattona hordofi» yee dawarisi.

^9-10 Daawitinna ledosi noori 600 manni Boosoori Xashshiwa ka'e daggu. 200 manni lowo geeshsha daafurino daafira, xashsho widoonni difulino. Daawitinna 400 manni kayinni hordoffanni hadhu.

¹¹ Daawiti ledo noo manni halallitte gobbara mitto Gibitsicha affe haadhe Daawitiwa abbitu. Hakkunni gedensaanni waanna sagale,

¹² mooshshinoonniha balasete qeeqqanna 2 mooshshinoonnita woyinete laalo uyitusi. Sase barra wo'ma mittoreno afooho wodhinokki daafira, tenne sagale itanni hee'renni lubbo qo'li.

¹³ Daawitino, «Ati ayeho? Maminni dayitto?» yee xa'misi. Isino, «Ani Gibitsichaho; ikkollana mittu Amaaleqichira borojjimma soqqameemmo. Sasu barri albaanni dhiwamoommo daafira mootichi'ya hune ha'rinoe.

¹⁴ Hakkuyira albaanni Yihudaho wodiidoonni noota Keritootu gobbanna Kaaleebi ga're horrine Tsiqilaagino giirroommo» yee kulisi.

¹⁵ Daawitino, «Hakkuri horrituri noowa massattoe?» yee xa'misi. Beettuno, «Shaattoekki gedenna mootichi'yara sayisse aattoekki gede Maganu su'minni xaarittoero noowa masseemmohe» yee dawarisi.

¹⁶ Hakkunni gedensaanni beettu Daawiti haa're horrituri noowa massi. Marte iillitanno woyite horrituri gudhite hadhinori daafira hagiidhite base basete farsha yite ittanninna agganni qeexaa'litanni no.

¹⁷ Daawitino, hatte hawarronni kayise layinki hawarro geeshsha diinasi qasi. Gaala guluffe xooqqinore 400 wedella agurranna, mittu nafa gatikkinni gudi.

¹⁸ Amaaleqootu adhitinoha baala anganni kari; lamenka meentosino qo'li.

¹⁹ Aju akkali gatikkinni ooso, seennenna Amaaleqootu adhite hadhinore baalanka mitturino gatikkinni qoli.

²⁰ Hakkiinnino sae Daawiti ge'reewo, me"enna lalo baala qoli. Ledosi noo mannino, «Kuni Daawiti horrooti» yaanni saada albaanni qole gananni ha'ri.

²¹ Hakkunni gedensaanni Daawiti, lowo geeshsha daafurino daafira Boosoori Xashshiwa gatinohuwa 200 manniwa kae dayi. Insano Daawitinna ledosi noore shiqqe haadhunsa. Daawitino insa seekke keere haa'rinsa.

²² Daawiti ledo noori giddonni mitu mitu bushunna garimalu manni kayinni, «Ledonke gaaddinokki daafira qo'linoommo saada insara dibeenkeemmo; meentonsanna oosonsa calla adhite hadho» yitu.

²³ Daawiti qole, «Roduuwa'ya, agarinonkehunna horrinonke diina angankera sayise uyinohu Kaaliiqaati. Isi uyinonkerira ki'ne togo assa dihasiissanno'ne.

²⁴ Yitinannire ayino dimacciishshanno'ne. Olaho hadhe dagginorinna uduunne agarte gattinori baalunku iillanno qeecha taalo beeqqitanno» yiinsa.

²⁵ Daawiti hakko barrinni kayise, kuni coyi Israeelete wodho ikkanno gede assi.

²⁶ Daawiti Tsiqilaagi dayi yannara, baxillaasinesi ikkitinorira Yihudu geerrira, «Kaaliiqi baarigaarra anganni haa'noonni afanshaati» yee adhe dayinori aaninni beehe soyinsa.

²⁷ Konne afansha, Beeteli, wodiidi Raamootinna Yatiiri noo mannira,

²⁸ Aroeeri, Sifimooti, Eshitemoanna

²⁹ Rakaali hattono Yirahime"eelootunna Qenaawootu katammara heedhannorira,

³⁰ Hermaho, Boriashaani, Ataaki,

³¹ Kebirooni mannira, qoleno Daawitinna ledosi manni hee'rino gobbara noorira baalaho soyinonsa.