UMI SAAMUEELI 26 - Qullaawa Maxaafa

DAAWITI LAYINKIMEESHSHONO SAAOOLI SHAA MARARI

¹ Ziifi manni Saaooli noowa Gibia daye, «Kune Daawiti Yihudu halallittera Hakela Gaarira maaxame no» yee kulisi.

² Saaoolino kae Israeelete giddonni filantinore 3,000 manna adhe, Daawiti hasara Ziifi Halalla ha'ri.

³ Saaoolinna olantosi Yihudu halallittera Hakela Gaarira albaanni doogote gama kunseentu; Daawiti kayinni halalla no. Isino Saaooli faana gananni hakkiira dayinota macciishshe,

⁴ qotaano soye buuxi'ri.

⁵ Daawitino hakkiichinni kae Saaooli noowa mari. Saaoolinna olantosi roorrichi Neeri beetti Abeneeri goxxe noowano afi. Saaoolino olantosi gaangeessi're mereeroho goxe no.

⁶ Hakkunni gedensaanni Daawiti Hiticha Ahimeleekinna Tseruya iltinoha Iyoaabi rodoo Abisa, «Ki'ne giddonni ledo'ya Saaooli qacha dirrannohu ayeti?» yee xa'mi. Abisano, «Ani ledokki dirreemmo» yii.

⁷ Daawitinna Abisa hakko hashshanni ka'e Saaooli qacha hadhu. Martanno woyite kune Saaooli urdesi umaalloonni baattote aana qase goxe no. Abeneerinna olantosi kayinni iso gaangeessite goxxe no.

⁸ Abisano Daawiti, «Techo Maganu diinakki angakkira sayise uyinohena, layinki assummokkinni mitteege urdetenni baattote ledo xaadise agureemmona agari» yii.

⁹ Daawiti kayinni Abisa, «Kissooti! Kaaliiqi buurinoha shiniro, shiinoha qorichishikkinni diagurannona shitooti.

¹⁰ Heeshshote Kaaliiqi halaaleeti! Saaooli, Kaaliiqi umisi barrisi dayenna woy bagadunni reyanno gede assanno.

¹¹ Kaaliiqi buurinohura anga sa"atenni Kaaliiqi agaroe! Kayinni umaallosiinni noo urdenna wayi uduunnichosi adhine ha'no» yiisi.

¹² Daawitino Saaooli umaalloonni noota urdenna wayi uduunnicho haa'reenna ka'e hadhu. Kaaliiqi lowo goxano tugeenna takki yite goxxino daafira, tenne ikkito mittuno diafino.

¹³ Hakkunni gedensaanni Daawitinna Abisa lagicha fulte, diininsa iillannonsakkiwa gaaru birxe aana marte uurritu.

¹⁴ Daawitino alba Saaooli, olantosinna Abeneeri widira hige qoonqosi naggi asse woshshanni, «Abeneeri! Yeemmota macciishshatto?» yii. Abeneerino daware, «Cancitanni moote goxano ho'lattohu ati ayeti?» yiisi.

¹⁵ Daawitino, «Ati dijawaata manchooti? Ate geeshshihu Israeelete gobbara ayi no? Kune, mittu manchi mootichakki shaara dayino. Mootichakki moote agara mayira hoogittoyya?

¹⁶ Assootikki dancha di"ikkino; Heeshshote Kaaliiqi halaaleeti! Kaaliiqi buurinoha mooticha'ne diagartinoonnina atinna mannikki reya hasiissanno'ne. Umaallosiinni nooti mootete urdenna wayi uduunnichisi hanni hiikko no?» yii.

¹⁷ Saaooli Daawiti qaale bade egennino daafira, «Beetto'ya Daawiti, halaalinta tini ate qoonqooti?» yee xa'misi. Daawitino, «Mooticha'ya moote, ee ane qoonqooti» yee dawarisi.

¹⁸ Hakkiinni aanche Daawiti, «Mooticha'ya, ane soqqamaanchokki mayira shorrattoe? Ma assummo? Ma hunummohe?

¹⁹ Xaano moote mooticha'ya, ani soqqamaanchikki yeemmota macciishshie. Ane aana ate Kaaliiqi wore agurinoheha ikkiro, hoolannoe gede kakkalo shiqishi'reemmo. Konne coye kayinni mannu assanni nooro, Kaaliiqi doorino gobbanni fule ha're wole maganna magansi'nanni gobbara hee'reemmo gede assitinoe daafira, hakkuri Kaaliiqi albaanni rumantinore ikkito.

²⁰ Kaaliiqiwiinni fafe manni gobbara reemmo gede assitootie. Kageeshshihu Israeelete moote ane korchote geeshshiha mayira shorrattoe? Gaaru aana heeyyahe ugaanxannihu gede mayira ugaaxattoe?» yiisi.

²¹ Saaoolino, «Beetto'ya Daawiti, ani hunoommota afoommo; techo lubbo'ya gatisootto; kunni ka'a dikiseemmohena galagalte anewa higi. Ani gowwa gede ikkoommo; lowo geeshsha so'roommo» yii.

²² Daawitino daware, «Moote'ya, urdekki kune anewa noona, wedellikki giddonni mittu daye haa'ro.

²³ Kaaliiqi mittu mittunkura keeraanchimmasinna ammanamasi garinni qolannosi. Anino techo Kaaliiqi ate anga'yara sayise ee hee'reennaenni, isi buurinoha ate mittoreno diassoommo.

²⁴ Kune techo lubbokki gatisummonte gede, ane lubbono Kaaliiqi gatiso; qarru baalunkunni isi fushshoe» yiisi.

²⁵ Hakkunni gedensaanni Saaooli Daawiti, «Beetto'ya Daawiti, Kaaliiqi maassi'rohe. Ati lowo looso loosatto; assattori baaluno qinaannohe» yiisi. Daawitino doogosi ha'ri; Saaoolino minisira higi.