UMI SAAMUEELI 23 - Qullaawa Maxaafa

DAAWITI QEILA KATAMA GATISI

¹ Mitto barra, «Kune Filisxeemootu Qeila ola fante, ayiddummete noo gide gudhitanni no» yine Daawitira kullisi.

² Daawitino, «Kore Filisxeemoota mare qasoni?» yee Kaaliiqa xa'mi. Kaaliiqino, «Eena marte qasse, Qeila gatisi» yee dawarisi.

³ Daawiti ledo noo manni kayinni, «Konne Yihudu baattora hee'ne nafa waajjinanni hee'noommo. Filisxeeme qansammora Qeila ha'ra roore waajjishshannote!» yii.

⁴ Daawiti galagale Kaaliiqa xa'mi. Kaaliiqino, «Filisxeeme angakkira sayise eemmohena Qeila dirri» yiisi.

⁵ Daawitinna ledosi manni Qeila hadhe, Filisxeeme qassu. Lowo manna shite saadansano horritu. Kunni garinni Daawiti Qeila manna gatisi.

⁶ Ahimeleeki beetti Abiyaataari Qeila Daawitiwa bai yannara, qeesootu Kaaliiqa xa'mite dawaro afidhannoha Efuudi yinanni uduunnicho adhe ha'rino.

SAAOOLI DAAWITI SHAARA HASI

⁷ Saaooli Daawiti Qeila ha'rinota macciishshe, «Kinchunni huxxine cufannanna waawanna worroonni katama easi woshshaadote giddora ea ikkitinohura, Maganu iso anga'yara sayise uyinoe» yii.

⁸ Kunnira Saaooli Qeila dirrite Daawitinna mannasi gaangeessitanno gede, olantosi baala woshshi.

⁹ Daawitno Saaooli busha hedinosita afe, qeesicha Abiyaataari, «Hanni Kaaliiqa xa'mi'neemmona Efuudi haadhe amo!» yiisi.

¹⁰ Hakkunni gedensaanni Daawiti, «Israeelete Magano Kaaliiqa, Saaooli Qeila daye anenni kainohunni katama hunara hedinota seekke macciishshoommo.

¹¹ Qeila manni isira sayise aae ikka? Yininte gede Saaoolino daaraati ikka? Israeelete Magano Kaaliiqa, konne coye kulattoe gede huucci'reemmohe» yii. Kaaliiqino, «Ee daanno» yee dawari.

¹² Daawiti, «Qeila manni anenna manna'ya Saaoolira sayise aanke ikka?» yee lede xa'mi. Kaaliiqino, «Ee sayise aanno'ne» yee qolisi.

¹³ Kunnira Daawitinna 600 ikkanno manni Qeilanni fulte hadhe basetenni base sa'anni keeshshitu. Saaooli, Daawiti Qeilanni fule ha'rinota macciishshe hedinore aguri.

DAAWITI HA'RE GAARAAME GOBBARA MAAXAMI

¹⁴ Daawiti Ziifi Halallittera noo gaarira godu giddo mare maaxami. Saaooli wo'manka woyite Daawiti hasa diagurino. Maganu kayinni Daawiti angasira sayise diuyino.

¹⁵ Daawiti Ziifi Halalla Horeeshi yinanni darga hee're, Saaooli shaasira dayinota afi'ri.

¹⁶ Saaooli beetti Yoonaataani Daawiti noowa Horeeshi mare, Magano seekke addaxxanno gede kulanni,

¹⁷ «Waajjitooti; anni'ya Saaooli ate dishaannohena, Israeelete moohatto. Anino atera layinkiha ikkeemmo; tenneno anni'ya seekke egennino» yee jawaachishisi.

¹⁸ Lamunku Kaaliiqi albaanni mimmitoho ledde gondooro e'u. Hakkunni gedensaanni Yoonaataani minisira ha'ri. Daawiti kayinni hakkiicho Horeeshinni gatino.

¹⁹ Ziifi hee'ranno manni Gibia Saaooliwa mare, «Kune Daawiti gobbankera Yesemoonira wodiidoonni Hakela Gaari aana Horeeshi godira maaxame no.

²⁰ Moote, iso ninke amande uyineemmohena, ati hasi'ritto yannara amo» yiisi.

²¹ Saaoolino, «Ane daafira xissiisi'ra'nera Kaaliiqi maassi'ro'ne.

²² Isi lowo geeshsha xagaraamo ikkinota kulloonniena, hanni xa noowa afinohu hee'riro leddine buuxxe.

²³ Maaxamanno darguwa affinihu gedensaanni rakkine amme; anino ledo'ne ha'reemmo. Isi hakkolla hee'riro, Yihudu gobba baalate mariwano mare digatanno» yii.

²⁴ Ziifi Katami mannino alba ikke gobbansa ha'ri. Hatte yannara Daawitinna mannisi Yesemoonira wodiidoonni Areba nootera Maooni Halallittera no.

²⁵ Saaoolinna olantosi Daawiti hassara fulte hadhu. Daawitino konne coye macciishshe, Maooni Halalla kinna batidhino gaarira mare maaxami. Saaoolino konne coye macciishshe, Daawiti hasanni mare Maooni Halalla iilli.

²⁶ Saaoolinna mannisi ilaalaho mitto ragaanni heedheenna, Daawitinna ledosi manni kayinni wole ragaanni no. Saaoolinna olantosi gaangeessite amaddansara gamba yiteenna, Daawitinna mannisi insawiinni gate fulate muddantu.

²⁷ Hakko mereero mittu sokkaanchi Saaooliwa daye, «Filisxeeme gobba qassanni noona rakke iilli!» yiisi.

²⁸ Saaoolino Daawiti shorra agure, Filisxeemete ledo olamara ha'ri. Kunninni kainohunni hakkonne darga, «Babbaxxate Gaara» yinanni.

²⁹ Daawitino hakkiinni ale hige fule Ayini-Gaadi goddara maaxami.