UMI SAAMUEELI 20 - Qullaawa Maxaafa

YOONAATAANI DAAWITI KAA'LISI

¹ Daawitino Raamanni Neyooti qachinni xooqe Yoonaataaniwa mare, «Ma"assummo? Ma hunummo? Annikki shaaera hasannoehu ma sao asseennasiiti?» yee xa'mi.

² Yoonaataanino, «Tini horonta atera iillitoonkehe; direyattona sammi yii; anni'ya lowohano ikko shiima coye anera kulikkinni diassanno. Anera kulikkinni mittoreno diassannona, ati yaatto coyi di"ikkannoho» yee dawarisi.

³ Daawiti kayinni, «Ati baxattoeta annikki seekke egennino. Kunnira, ati afittoro dadillatto daafira konne coye afattokki gede assino. Heeshshote Kaaliiqinna ate halaali afanna, reyammora mitte qaafolla gattino» yee xaari.

⁴ Yoonaataanino Daawiti, «Hasi'rattore baala asseemmohe» yiisi.

⁵ Daawitino, «Ga'a Aganu Leellanno Ayyaana ikkino daafira, mootete ledo sagale ita hasiissannoe; ati fajjittoero kayinni oyimbarri hawarro geeshsha maaxameemmo.

⁶ Annikki lae hooge xa'miero, ‹Mininsa manni baalunku daafira diru kakkalo shiqinshanni barra ikkinohura, rahe ilamino katama Beeteliheme ha'rate duu're xa'mi'rino› yite kulisi.

⁷ ‹Maahoyye› yiiro, yaachishannoeri dihee'ranno; hanqiha ikkiro kayinni busha hede nooeta afatto.

⁸ Ati Kaaliiqi albaanni gondooro eoottoena, busha heddootie; ani hunoommoha ikkiro nafa, annikkira sayisse uyitootiena atinni shiie» yiisi.

⁹ Yoonaataanino, «Tini atera iillitoonkehe! Anni'ya busha hedinoheta afe hiitto kula hoogeemmohe?» yiisi.

¹⁰ Daawitino, «Annikki hanqe dawarannoheha ikkiro ayi kulannoeyya?» yee xa'mi.

¹¹ Yoonaataanino, «Amo, xawo ha'nona» yeenna, mimmito amadde fultu.

¹² Yoonaataani Daawitira, «Israeelete Magani Kaaliiqi afoe; anna'ya xa'me ate daafira maa hedinoro ga'a woy oyimbarra tenne yannara manna soye kuleemmohe.

¹³ Atera busha hedinoheta afe, maaxummoheronna gatatto gede assa hoogummohero, Kaaliiqi afoe. Kaaliiqi anni'ya ledo hee'rinte gede, ate ledono hee'ro.

¹⁴ Atino ani lubbotenni noommo geeshsha, shinannieta gatisate Kaaliiqi gedee shaqqado ikkie. Ani reyummoro nafa,

¹⁵ mini'ya mannirano konne shaqqille qakkootinsa. Kaaliiqi diinnakki baala baattote aaninni hunanno yannara,

¹⁶ atinna ani e'noommo gondoori soorramoonke. Konne gondooro diigittoro kayinni Kaaliiqi hanqannohe» yee Daawiti ledo layinkimeeshsho gondooro ei.

¹⁷ Yoonaataani Daawiti lubbimma baxannosi daafira galagale xaarannosi gede assi.

¹⁸ Hakkunni gedensaanni Yoonaataani, «Ga'a Aganu Leellanno Ayyaanaati. Ofollatto dargi fano ikkiro, nootto ikkita anfanni.

¹⁹ Albinni roore oyimbarra hawarro nootto ikkita anfanni daafira, albaanni maaxamittowa Etseeli yinanni kinchi mule marte agari.

²⁰ Anino alaamannohu gede kinchu widira qole 3 worbicho olloleemmo.

²¹ Hakkunni gedensaanni soqqamaancho'ya, ‹Marte worbicho abbi› yee soye, ‹Worbichu kuu"une atera kawaanni noona haadhe amo› yeemmoha ikkiro, Heeshshote Kaaliiqi halaaleeti, bushu coyi di"iillannohena fulte amo.

²² Beetto, ‹Worbichu ku'une atera ka'aanni no› yuummoro kayinni Kaaliiqi ha'risinohena ha'ri.

²³ Atinna ani e'neemmo gondoorira Kaaliiqi hegerera naqaashshenkeeti» yiisi.

²⁴ Kunnira Daawiti ha're gate maaxami. Aganu Leellanno Ayyaana ayirrinsi yannara, moote jila itara,

²⁵ albisi darga xarrate mule ofolleenna, Abeneeri isira aane ofollita, Yoonaataani qole albasiinni ofolli. Daawiti barcimi kayinni fano no.

²⁶ Saaooli, «Daawiti seeru garinni lagaawikkinni digatino» yee hedino daafira, hakko barra mittoreno dicoyi'rino.

²⁷ Layinki soodo Aganu Leellihunni layinki barrano Daawiti barcimi fano no. Hakkunni gedensaanni Saaooli beettosi Yoonaataani, «Isseyi beetti be'rono, techono mayira daa hoogino?» yee xa'mi.

²⁸ Yoonaataanino, «Daawiti Beeteliheme ha'rara fajjeemmosi gede duu're huucci'rinoe.

²⁹ Isino, ‹Mininke manni katamaho kakkalo shiqishanno daafira anino ledo hee'reemmo gede rodii'ya kulinoena ha'roni? Baxxe fajjittoero roduuwa'ya lae dayemmona ha'risie› yiinoe. Jilu giddo leella hooginohu kunniraati» yee dawarisi.

³⁰ Saaooli Yoonaataanira lowo geeshsha hanqe, «Koo, hattenni shokkashshonna haxawarra mancho beeti! Isseyi beetti ledo jaaloonte ateneenna amakki shollishattota afoommokkiha lawinohe?

³¹ Isseyi beetti lubbotenni hee'reenna moohattokkita diafoo? Reya hasiissannosina rakke haadhe abbi!» yii.

³² Yoonaataanino, «Mayira reyanno? Ma hunino?» yee annasi xa'mi.

³³ Hakkunni gedensaanni Saaooli Yoonaataani shaara amaxxo tuqqi. Yoonaataanino annisi Daawiti shaara qodhe kainota afi.

³⁴ Kunnira, jilu aaninni hanqe kai. Annisi Daawiti aana shollaataamo coye assino daafira dadille, Aganu Leellihunni layinki barra sagale di"itino.

³⁵ Layinki soodo guto shiima beetto anga adhe, dinyensa garinni Daawiti ledo xaadara kae gatira ha'ri.

³⁶ Beettono, «Dodde marte, oleemmo worbicho hasse abbi» yiisi. Beettu dodita, worbicho isira alba qole oli.

³⁷ Beettuno Yoonaataani worbicho tuginowa iillanni hee'reennanni, Yoonaataani iso woshshe, «Worbichu dialbaanni uwe no.

³⁸ Rahi! Rakke mari! Hakko uurritooti!» yee canci. Beettuno worbicho gamba asse haa're mootichisiwa higi.

³⁹ Yoonaataaninna Daawiti agurranna beettu kunni coyi ewelumma mittoreno diafino.

⁴⁰ Hakkunni gedensaanni Yoonaataani bagadosi beettoho ee, «Haadhe katama ha'ri» yiisi.

⁴¹ Beettu ha'rihu gedensaanni, Daawiti kinchoho wodiidi ragaanni maaxaminowiinni fule, Yoonaataani albaanni baattote aana guluphe 3 hige kumbuuli. Hakkunni gedensaanni sunqantanninna wi'litanni mimmito keerunni yitu. Yoonaataaninni roore Daawiti lowo geeshsha dadilli.

⁴² Yoonaataani Daawitira, « ‹Atenna ane, sirchikkinna sirchi'ya mereero Kaaliiqi hegerera naqaashshete› yine fiixoominke ba"annokki gede Kaaliiqi su'minni xaarroommona xaate keerunni ha'ri» yiisi. Daawitino kae ha'ri; Yoonaataanino katama higi.