UMI SAAMUEELI 14 - Qullaawa Maxaafa

¹ Mitto barra Saaooli beetti Yoonaataani bagadosi duhanno wedellicha, «Amo ka'aanni Filisxeemete olanto qacha sa'nona» yiisi. Konne coye kayinni annisira dikulino.

² Saaoolino Gibia qaccera Migirooni yinanni darga mitte roomaanete haqqicho hunda agare no. Ledosi 600 ikkanno manni no.

³ Qeesimmannita gagasu uddano uddi'rannohu Akiyano ledonsa no. Isino Seelo Kaaliiqi qeesichi Eeli beetti Finihaasi ilinoho. Annisi Akixoobi, Ikaaboodi rodooti. Yoonaataani ledonsa nookkita kayinni afinohu dino.

⁴ Yoonaataani Filisxeemootu olanto qacha sa"ate hedino doogora guraanninna qiniiteenni Bootseetsinna Sene yinanniri 2 ale higge luphi yitino kinna no.

⁵ Mittu kinchi Aliyyeenni Mikimaasira albaanni, layinkihu qole wodiidoonni Geebara albaanni no.

⁶ Yoonaataani bagadosi duhino wedellichira, «Kaaliiqi kaa'lannonkeha ikkannona, amo tenne maganiweelo gosa widoonni hinge sa'nona. Isilla assara hasi'rinoha ikkiro, lowohunnino shiimunnino gatisara dandaanno» yiisi.

⁷ Wedellichuno, «Anino ledokki noommona hasi'rittore assi» yiisi.

⁸ Yoonaataanino, «Hakkawoyiteetiro amo lagicha fulle Filisxeemootaho leellinona.

⁹ Insano, ‹Ki'newa dangammo geeshsha hakko agarrenke› yituro, insawa marrummokkinni hee'noommowa hee'ne agarreemmo.

¹⁰ ‹Ninkewa amme› yituro kayinni, hatto yaansa Kaaliiqi insa angankera sayise aate malaate ikkanno daafira, insawa marreemmo» yiisi.

¹¹ Lamunku xawo fultu yannara Filisxeemootu, «Kuneeti Ibiraawootu maaxantino bale giddonni fulte insanaa leellishshanni no» yitu.

¹² Hakkunni gedensaanni Filisxeemete olanto, «Kulleemmo'neri noona, ninkewa amme» yitunsa. Yoonaataanino bagadosi duhanno beetto, «Hoode'ya amo; Kaaliiqi Israeelete angara sayise uyinonsana» yiisi.

¹³ Yoonaataani bagadosi duhino wedellicha hoodete adhe, angatenninna lekkatenni shiphanni fule, Filisxeemoota waxaaxise aguri. Bagadosi duhannohuno hoodesi ha'ranni lowo manna shii.

¹⁴ Yoonaataaninna bagadosi duhinohu umi shaara mitto waaxa ikkanno darga 20 manni geeshsha shitino.

¹⁵ Hakkiicho noo Filisxeeme baala shoondartu; olu qacha agartinorinna si'ara fultinori baalu huxidhu; baattono shafantu; moggano lowo geeshsha batidhu.

FILISXEEMETE QEELAMA

¹⁶ Biiniyaami gobbara Gibia noori Saaooli agaraasine, Filisxeemete olanto billaallitinota affu.

¹⁷ Saaoolino ledosi noo manna, «Hanni olanto kiirtine xeinohu nooro la'e» yiinsa. Kiirtanno woyite, Yoonaataaninna bagadosi duhanno wedellichi dino.

¹⁸ Saaoolino, hatte yannara qeesimmatenni soqqamanni nooha Akiya woshshe, «Hanni ikkineemmore Magano xa'mineemmona efuudi haadhe abbi» yii.

¹⁹ Saaooli qeesichaho kulanni hee'reenna, Filisxeemete qachira luulu bati'ranni ha'ri. Kunnira Saaooli qeesicha, «Kaaliiqa xa'mi'rate xa yanna diuyitinonke» yiisi.

²⁰ Hakkunni gedensaanni Saaooli mannasi lassi're olaho fuli. Insano Filisxeeme ewelumma habbe mimmitonsa bisetenni doddoltanni heedheenna iillitu.

²¹ Alba mannansa agurte Filisxeemete ledo namoonte noo Ibiraawooti galagalte Saaooliwanna Yoonaataaniwa daggu.

²² Gaaraame Efireemi gobbara maaxante noo Israeele baala Filisxeeme xooqqanni noota macciishshite, dagge manninsa ledo xaadde faana gantu.

²³ Shorrite Beetiaweeni Katamira ka'aanni sayissu. Hakko barra Kaaliiqi Israeele hobbaate qolinsa.

SAAOOLI OLU UURRIKKINNI SAGALE ITANNOHA RUMI

²⁴ Saaooli, «Hawarra geeshsha diina'ya rabbisi'rummokkinni sagale itannohu rumaminoha ikko» yee afoo fulino daafira, Israeelete manni shete hosino. Hakko barra mittuno sagale afooho diwodhino.

²⁵ Olanto baalanti dubbu giddora e'e, base baalate malawo affu.

²⁶ Dubbu giddora e'anno woyite, malawu leo cocco'anni no. Ikkollana Saaooli rumo waajjitino daafira intannire mittuno afooho dimassi'rino.

²⁷ Yoonaataani kayinni annisi manna rumotenni usurinota afinokki daafira, malawu qaso angasi noo daabbinni qase haa're iti. Afooho wodhanni hee'renni jawaate wolqa assi'ri.

²⁸ Olantote giddonni mittichu, «Annikki, ‹Techo sagale itannohu baalu rumaminoha ikko!› yee xaarotenni usurino. Mannu baalunku wolqiweelinohu iseraatiwe» yiisi.

²⁹ Yoonaataanino daware, «Anni'ya hanni manna mayira qarrisi? Shiima malawo afooho wodhanni hee'renni jawaatummuta diaffini?

³⁰ Mannu diinu anganni adhinore itoommero hiitto roorannohu baino! Filisxeemeno hakkiinni roorse gudannohu gatino» yii.

³¹ Israeelete manni Filisxeeme Mikimaasinni kayise Ayalooni geeshsha shorranni hose hawarro lowo geeshsha hudi'ri.

³² Kunnira horritino ge'reewo, boottanna siitta kubbite amadde baattote aana gorrite maala mundeente ledo ittu.

³³ Hakkunni gedensaanni Saaoolira, «Kuneeti mannu maala mundeente ledo itanni Kaaliiqi aana sao assanni no» yine kullisi. Saaoolino, «Seera sa'inoonni; amme xa mitto lowo kincho gongo'mishshine abbe"e» yii.

³⁴ Qoleno, «Mannu mereero ha'rantine, mittu mittunku boottanna gereewo haa're abbe, mundee giddonni lolakkanno gede kunni kinchi aana gorre itona kulle. Maala mundeente ledo ittine Kaaliiqi aana sao assitinoonte» yii. Yinoonninte gede hakko hashsha mannu saada umi umisinni abbe hakkiicho gorri.

³⁵ Saaoolino Kaaliiqira kakkallanni darga seekki. Kaaliiqira kakkallanni darga seekkate tini isira umite.

³⁶ Saaooli mannaho, «Xaa woyite amme hawarrinse Filisxeemoota faana ganne sooda geeshsha afidhinore baala mucuqqi assine gundona; mitto manchono gatinsoonke» yii. Mannuno, «Ati seyanno yaattore baala assilla» yee dawari. Qeesichu kayinni, «Hanni balanxe Magano xa'mino» yii.

³⁷ Saaooli, «Filisxeemoota faana ganoni? Insa Israeelete angara sayisse aattoni?» yee Magano xa'mi. Maganu kayinni hakko barra dawaro diqolinosi.

³⁸ Saaoolino, «Hanni techo mannu cubbo loosinoro hanseemmona albisootu baalu kawa shiqqi yiiyye.

³⁹ Israeele hobbaate qolino Kaaliiqi halaaleeti! Beetti'ya Yoonaataani nafa cubbo loosinoha ikkiro reyo» yii. Ikkollana tenne te'enne yiinohu mittuno dino.

⁴⁰ Saaoolino Israeele baalanta, «Ki'ne hakkaanni uurre; aninna beetti'ya Yoonaataani kawaanni uurrineemmo» yii. Mannuno, «Ati seyanno yiittore assilla» yee dawarisi.

⁴¹ Hakkunni gedensaanni Saaooli, «Halaalaancho dawaro uyie» yaanni Israeelete Magano Kaaliiqa huucci'reenna, hixu isinna beettisi Yoonaataani aana uwi. Mannuno keeraawi.

⁴² Saaoolino, «Aneranna beetti'ya Yoonaataanira hixa ganne» yiinsa. Hixuno Yoonaataani aana uwi.

⁴³ Hakkunni gedensaanni Saaooli Yoonaataani, «Hanni assoottore kulie» yiisi. Yoonaataanino, «Daabbi'ya birxenni qase shiima malawo laaxoommo. Xa ani reyammora hasi'roottoni?» yiisi.

⁴⁴ Saaoolino, «Maganu afoe; halaalinta reyatto» yii.

⁴⁵ Mannu kayinni Saaoolira, «Israeelete kageeshshita jawa qeelle abbinohu Yoonaataani reya garahoni? Horonta digaraho! Techo konne assinohu Maganu kaa'leennaatina, Kaaliiqi afanna umisi dananchi tae uulla diuwanno» yii. Kunni garinni mannu Yoonaataani reyotenni wodisi.

⁴⁶ Hakkunni gedensaanni, Saaooli shorra agure higeenna Filisxeeme gobbansa hadhu.

SAAOOLI GASHSHOOTENNA MAATESI GARA

⁴⁷ Saaooli Israeelete gobbara gashshoote amadihu gedensaanni, gaangaawisira noota diinnasi baala: Moaaboota, Amoonoota, Edoomoota, Suuba mootoollanna Filisxeemoota qasi. Mariwa baala qeelle afi'ri.

⁴⁸ Bareendetenni olame Amaaleqootano qeelino. Israeeleno mulqidhannori anganni gatisino.

⁴⁹ Saaooliti labballi ooso: Yoonaataani, Ishiwiitinna Melkisaati. Seennisi, Meroobiitinna Melkooliiti.

⁵⁰ Saaooli galte Akinahoomi yinanniti Akima"aasi beettooti. Olantote hajajaanchi Abeneeri Saaooli wosiili Neeri ilinoho.

⁵¹ Saaooli anni Qiisinna Abeneeri anni Neeri Abieeli oosooti.

⁵² Saaooli gashshino diri baalunku giddo Filisxeemete ledo jawaatu oli no. Kunnira, Saaooli jawaata woy bareeda mancho afiro, haa're olantosi ledoha assi'ranno.