UMI SAAMUEELI 1 - Qullaawa Maxaafa

SAAMUEELI ILAMA

¹ Gaaraame Efireemi gobbara Raama Katamira Efireemi ga're giddo Hiliqaana yinannihu mittu manchi no. Hiliqaana Yirohaamiho, Yirohaami Eliyuho, Eliyu Tohuho, Tohu Tsuufiho.

² Hiliqaanara Haannanna Finaana yinanniri lamu meenti noosi. Finaanara ooso noosena Haanna kayinni ila diafidhino.

³ Kuni manchi Wo'manka Dandaanno Kaaliiqa magansi'raranna isira kakkalo shiqishi'rara diru dirunkunni hee'ranno kataminni kae Seelo katama ha'ranno. Hakkiicho lamunku Eeli ooso Afiininna Finihaasi Kaaliiqira qeesimmatenni soqqantanno.

⁴ Hiliqaana Seelora ha're kakkalo shiqishanno yanna iillitanno woyite, galtesi Finaanara, seennunna labballi oososi baalate iillannonsaha maalu beehacho aannonsa.

⁵ Haanna kayinni roorse baxannosehuranna Kaaliiqi ila uyinosekki daafira, lame anga asse aannose.

⁶ Kaaliiqi ila uyinosekki daafira ginase qussitanni caacceessituse.

⁷ Kaaliiqi minira hadhanno yanna baalantera, ginase kunni coyinni diru dirunku marro marro higge caacceessitannase wi'litanni ita hooggu.

⁸ Ayiddaannise Hiliqaanano, «Haanna, mayira wi'latta? Mayira ita giwatta? Wodanikki mayira dadillanno? Tonne oosonni ani dirooreemmohe?» yiise.

⁹ Mitto barra Seelo ittuhunna agguhu gedensaanni Haanna ka'e uurritu. Qeesichu Eeli Kaaliiqi Mini Qullaawaho waalchu mule ofolle hee'reenna,

¹⁰ Haanna hururante wi'litanni Kaaliiqa huuccidhu.

¹¹ Iseno, «Wo'manka Dandaatto Kaaliiqa, ane borojjichokki qarra la'e hawittoekkinni qaagge labbaa beetto uyittoero, hee'ranno diro baala iso qole atera eemma; umisi dananchono horonta dimeendanni» yite xa'nitu.

¹² Haanna uurrissukkinni Kaaliiqa huuccidhanni keeshshiteenna Eeli afoose la"anno woyite,

¹³ qoonqose leeltukkinni suume calla milli assitanni wodanunni huuccidhanni noo daafira Eelira dimbitinoha lawinosi.

¹⁴ Kunnira, «Tini dimbakki aanikkinni mamoote ho'litanno? Dimbakki agurte garaho higi» yiise.

¹⁵ Haannano, «Mooticha'ya, diiwedimboomma; ani dadillaame manchootiwe! Wodani'yata Kaaliiqira ku'lanni noommata ikkinnina dimbisannore diagoomma.

¹⁶ Kageeshshi yanna qarri'yanninna yaaddo'yanni kainohunni huucci'ranni noommana, shota mancho gede assite kiirtootie» yitusi.

¹⁷ Eelino, «Israeelete Magani huucci'roottare oohena, keerunni ha'ri» yiise.

¹⁸ Iseno, «Mooticha'ya, wo'manka woyite ane danchatennilla qaagie» yitusi. Hakkiinni ka'e hadhe sagaleno ittu. Hakkunni gedensaanni albisera dadillu dileellino.

¹⁹ Layinki soodo Hiliqaananna minisi manni gute kae, Kaaliiqa magansi'rihu gedensaanni Raama mininsara ha'ri. Hiliqaana Haanna ledo gali; Kaaliiqino huuccattose macciishsheenna,

²⁰ godobbe labbaa qaaqqo iltu. Iseno, «Kaaliiqa huucci're afi'roommaho» yitanni su'ma Saamueeli yite fushshitusi.

HAANNA SAAMUEELI KAALIIQIRA UYITU

²¹ Layinki diro Hiliqaananna minisi manni Kaaliiqira diru kakkalo kakkalaranna xano uyi'rara Seelora ha'ri yannara,

²² Haanna kayinni mine gattino. Iseno ayiddaannisera, «Qaaqqu unuuna agurihu gedensaanni haa're Kaaliiqi Minira masseemma. Lubbotenni noo geeshshano hakkiicho hee'ranno» yitusi.

²³ Ayiddaannise Hiliqaanano, «Ati seyanno yiittare assi; qaaqqu unuuna agura geeshsha agari. Kaaliiqi yoottarella wonshohe» yiise. Haannano qaaqqo unuuna hoolta geeshsha mine keeshshitu.

²⁴ Saamueeli unuuna aguri yannara, qaaqqo ikkiro nafa Seelora Kaaliiqi Minira haadhe hadhinosi. Iso haadhe hadhu woyite, sasu diri middicha, tonne kiilo bulleenna mitte maaqqe wo'mitannota woyinete xajje haadhe massitino.

²⁵ Insano middicha gorrituhu gedensaanni qaaqqo Eeliwa shiqishshu.

²⁶ Haannano Eelira, «Mooticha'ya, konniicho albakkiinni uurre Kaaliiqa huucci'rummata qaagatto? Hatti mancho aneetiwe.

²⁷ Konne qaaqqo aaerawe huucci'roomma. Kaaliiqino huucci'roommaha uyinoe.

²⁸ Anino iso qole Kaaliiqira eemma. Lubbotenni noo geeshsha Kaaliiqiha ikkanno» yitu. Insano hakkiicho Kaaliiqa magansidhu.