UMI MOOTOOLLA 9 - Qullaawa Maxaafa

KAALIIQI SELEMOONIRA LAYINKIMEESHSHO LEELLI

¹ Moote Selemooni Qullaawa Mine, mootete minenna hedinore baala asse gudihu gedensaanni,

² Kaaliiqi albaanni Gebaooni leellisinte gede layinkimeeshshono Selemoonira leellisi.

³ Kaaliiqi, «Huucci'rootto huuccatto macciishshoommo. Hegerera ane magansi'nannie gede minoottoha konne Mineno qullaawa assoommo. Isono wo'manka woyite seekke towateemmo.

⁴ Atino annikki Daawiti gede halaalunninna ammanamatenni soqqamittoero, seera'ya agadhittoronna hajajoommohere baala wonshittoro,

⁵ annikkira Daawitira sirchisi giddonni Israeelete moohannohu hoogannokki gede coyi'roommo coye wonshe, gashshootekki Israeelete aana dhaawe geedonniha asseemmo.

⁶ Ikkollana, ati woy oosokki ane hoode ha'ra agurtine oommo'ne seeranna hajajo wonsha gibbinironna wole maganna magansidhiniro,

⁷ Israeele oommonsa gobbanni fushshe huneemmo. Magansi'naera yee qullaawa assoommoha konne mineno agureemmo. Gobba baalate hee'ranno manni Israeele haariimanni qacifatanno.

⁸ Kuni Minino diigame duuno ikke gatanno. Muleenni hige sa"annohu baalu lae mase, ‹Kaaliiqi tenne gobbanna konne Mine togo mayira assi?› yee mimmito xa'manno.

⁹ Mannuno daware, ‹Israeelete manni akaakkansa Gibitsetenni fushshinoha Maganonsa Kaaliiqa agurino daafiraati. Qolteno Kaaliiqa agurte wole maganna magansidhino; insara kumbuultino. Kaaliiqi tenne baala ba'o abbinonsahu kunniraati› yaanno» yii.

SELEMOONI DADDALU HAJARA KIRAAMI LEDO XAADI

¹⁰ Moote Selemooni Qullaawa Minenna mootete mine 20 dirinni mine gudi.

¹¹ Xiroosi moote Kiraami Selemoonira kunni loosi baalunkura ikkanno gede lowo daguwa, hoommenna lowo culka uyinosi. Loosu baalunku goofihu gedensaanni, moote Selemooni Galiilu gobbara noota 20 shiimmaadda katamma Kiraamira uyinosi.

¹² Kiraamino Selemooni uyinosi katamma mare lai. Ikkollana uyinoonnisi katamma dihagiirsiissinosi.

¹³ Kunnira Selemooni, «Rodoo'ya! Uyittoe katamma tenneeti?» yee xa'misi. Tidhitinokkireeti yee hedino daafira mishe, hakkonne darga, Kabuuli yii. Techo geeshshano hatto yinanni.

¹⁴ Kiraami Selemoonira soyino culki 4,000 kiilo ikkanno.

SELEMOONI LOOSINOHA WOLE ADDI ADDI LOOSO

¹⁵ Selemooni Qullaawa Minenna mootete mine minannoha, Yerusaalamete huxxa huxxannohanna katamaho soojjaatoonni noo boono taashshanno manna hajaji. Qoleno Hatsoori, Megidonna Gezeeri yinanni katamma mintannosi gede assi.

¹⁶ Hakkunnira albaanni Gibitsete moote Feriooni ola fane, Gezeeri Katama giire hakkiicho heedhannore Kana"aanoota shee gudi. Hakkunni gedensaanni, beettosi Selemoonira uyi yannara Gezeeri Katama isera iqqa asse uyinose.

¹⁷ Selemooni Gezeeriha, eeliidiha Beetihorooni Katama,

¹⁸ Bailaatinna Yihudaho halallitte gobbara nooha Taamaari Katama galagalche mini.

¹⁹ Sinqe duunnannitanna faradonna faradi gaare worranni katamma mini. Selemooni assara hedinore baala assate Yerusaalamete, Libaanoosinna gashshootisi baalu giddo halchinore qixxeessi.

^20-21 Selemooni wolqate looso loossanno gede hajajinori Israeele baattonsa ragidhu waro shitukkinni agurtino Kana"aanootaati. Techo geeshsha insara borojjimmatenni soqqantannori Amooraawootaho, Hitootaho, Ferizootaho, Hiwootahonna Iyaabuusootaho.

²² Selemooni Israeelete giddonni mittono borojjimma diloosiisino. Israeelete manni roorroota, olanto, gashshaanonna gaadaannuwa ikkatenni, faradi gaare ganatenninna farado gulufatenni soqqamino.

²³ Selemooni hajajannoha addi addi looso loossannore loosiissannori 550 manni no.

²⁴ Galtesi Feriooni beetto, Daawiti Kataminni fulte Selemooni umisi minsiisinose mini mootennihura higguhu gedensaanni, isi boono taashshinanni gede assi.

²⁵ Selemooni Kaaliiqira seekkinohura kakkalote darga shilqonnitanna mittimmate kakkalo dirunni 3 hige shiqishanno. Hakkunni ledo mitteenni hixaanano giiranno. Kunni garinni Qullaawu Mini haja baala wonshi.

²⁶ Qoleno Selemooni Edoomi gobbara Duumu Baari gama Elaati Katami mule Etsiyoonigabiiri yinanniwa markabba seekki.

²⁷ Moote Kiraamino Selemooni manna kaa'litanno gede markaawe ha'risa egentinore umisi manna soyi.

²⁸ Insano markaawetenni Ofeeri yinanni gobba hadhe, 14,000 kiilo roorino culka haadhe Selemoonira abbitu.