UMI MOOTOOLLA 8 - Qullaawa Maxaafa

GONDOORU TAABOOTA QULLAAWU MINIRA EESSINI

¹ Hakkunni gedensaanni, Selemooni Kaaliiqiha Gondooru Taaboota Daawiti Kataminni Tsiyooninni haadhe abbitanno gede Israeelete gashshaanonna ga'rete roorroota baala isi noowa Yerusaalame gamba yitanno gede woshshi.

² Israeelete manni baalu Daasu Ayyaana ayirrinsannihura Itaaniimi yinannihura lamalki aganira moote Selemooniwa gamba yii.

³ Geerru baalu gamba yii yannara qeesootu Gondooru Taaboota haadhe abbite,

⁴ Qullaawu Minira eessitu. Qeesootunna Leewaawootu qolte Xaadu Dukkananna giddosi nooha qullaawa uduunne baala haadhe abbite Qullaawu Minira eessitu.

⁵ Moote Selemooninna Israeelete manni baalu Qullaawu Minira ha'ranni hee're doogote aana Taabootu albaanni, kiiro anfoonnikki ge'reewonna bootta kakkaltu.

⁶ Qeesootuno Gondooru Taaboota dukke Qullaawu Minira eessite, Qullaawa Holge kirubeeli qoolira woroonni seekkinoonni darga wortu.

⁷ Diriirtinoti kirubeeli qoolla Taabootanna iso dunkanni dawaayyicho guggushshite no.

⁸ Dawaayyu seeddaanna ikkino daafira, Qullaawu Holgira albaanni uurrino mannira uminsa gudisame leellanno. Gobbaanni noohu la"ara didandaanno. Kuni dawaayyi techo geeshsha hakkiicho no.

⁹ Israeelete manni Gibitsetenni fuli waro, Kaaliiqi ledonsa gondooro e"eenna Siina Ilaalira Muse worinore 2 bocame kinna agurranna Gondooru Taabooti giddo woliri mitturino dino.

¹⁰ Qeesootu Qullaawu Holginni fultanni heedheennanni Qullaawa Mine gomichu wo'mi.

¹¹ Gomichu giddo Kaaliiqi ayirrinye leellishanno xawaabbi wo'me noo daafira, qeesootu uurrite loosonsa loosa didandiitino.

¹² Hatte yannara Selemooni, «Kaaliiqa Magano'ya, ati, ‹Kolishshu gomichi giddo hee'reemmo› yootto.

¹³ Xa kayinni ani atera, hegerera hee'rattoha ayirrado Qullaawa Mine minoommohe» yii.

SELEMOONI MANNAHO COYI'RINO COYE

¹⁴ Moote Selemooni hakkiicho uurre noo manni widira alba hige, maassi'rannonsa gede Kaaliiqa huuccanni,

¹⁵ «Israeelete Magani Kaaliiqi galatamo! Anni'ya Daawitira eino gondooro seekke agarino. Gondooruno,

¹⁶ ‹Manna'ya Gibitsetenni fushshummohunni kayise, su'ma'ya ayirrissinanniha Qullaawa Mine minnanniha Israeelete gobba giddonni mitto katamano didoodhoommo. Xa kayinni manna'ya gashshanno gede Daawiti doodhoommo› yaannoho» yii.

¹⁷ Selemooni qole, «Anni'ya Daawiti Israeelete Magani Kaaliiqi su'makki ayirrinsanniha Qullaawa Mine minate hedino.

¹⁸ Kaaliiqi kayinni anna'ya Daawiti, ‹Su'ma'ya ayirrinsanniha Qullaawa Mine minate hedakki danchate.

¹⁹ Ikkollana beettikki minannoeta ikkinnina ati diminattoe; su'ma'ya ayirrinsanniha Qullaawa Mine ati ilootto beetti minannoe› yiino.

²⁰ «Kuneeti Kaaliiqi, coyi'rino coye wonshino. Anino anni'ya darga Israeelete moohoommo. Israeelete Magani Kaaliiqirano su'masi ayirrinsanniha Qullaawa Mine minoommo.

²¹ Gibitsetenni fushshinsa waro annuwanke ledo eino gondooro borreessinoonnita boncoonni kinna worranni Taabootira Qullaawu Mini giddo darga qixxeessoommo» yii.

SELEMOONI KAALIIQA HUUCCI'RINO HUUCCATTO

²² Hakkunni gedensaanni Selemooni Israeelete mannira albaanni uurre kakkalote dargira alba hige angasi iimira gordo qole huuccanni,

²³ «Israeelete Magano Kaaliiqa! Ati callu Maganoho. Iima gordohonna uulla baattote ate gedeehu wolu dino. Co'o yiino wodaninni doogokki hadhannorira baxillunniha gondoorokki wonshattohu ate callaati.

²⁴ Anni'ya Daawitira coyi'rootto coye disoorrootto. Yootto coyi baalu kune techo wo'mino.

²⁵ «Israeelete Magano Kaaliiqa! Anni'ya Daawitira, ‹Oosokki atente gede hajajantannorenna ane ledo sumbetenni qaaffannore ikkituro, wo'manka woyite sirchikki giddonni Israeelete moohannohu dihooganno› yootto coye wonshi!

²⁶ Xaano Israeelete Magano! Soqqamaanchikkira anni'ya Daawitira coyi'rootto coye baala wonshi!

²⁷ «Magano Kaaliiqa, halaalinta ati uullate aana hee'rattoni? Gordoho aleenni noo gordi haa'rannohekkiha, kuni baattote aana noohu ani minoommo mini maminni ikkannohe?

²⁸ Ikkirono, Kaaliiqa Magano'ya, maccakki ane soqqamaanchikki huuccatto widira qoli. Albakkiinni huucci'reemmo huuccattonna raare'ya macciishshie.

²⁹ ‹Su'ma'ya woshshinanniwaati› yoottowa kunni Mini widira hashshanna barra lai. Ani soqqamaanchikki kunni Mini widira hige huucci'reemmo yanna baalantera huuccatto'ya macciishshie.

³⁰ Alba kunni Mini widira hinge huucci'neemmo yanna baalantera, anenna mannikki huuccatto macciishshi. Gordoho noottowa heedhe macciishshite, saonkeno agurinke.

³¹ «Mitto mancho wolu aana sao assino yine kunni Qullaawu Mini giddo noo dargi kakkalonnihuwa abbineenna xaare keeraawiro,

³² iima gordoho heedhe macciishshite yaattore yii. Sao assinohu saosira qorichishamanno gede, keeraanchuno keeraa'manno gede assi.

³³ «Mannikki Israeele sao assite ate hanqisseenna diininsa qeelannonsa woyite, gaabbite ate su'ma woshshitanni eeganturo, kunni Minira dagge saonsa agurattonsa gede umonsa shollishshe huuccidhuhero,

³⁴ ati iima gordoho heedhe huuccattonsa macciishshi. Mannikki cubbono agurte galagalchite akaakkansara ootto gobba qolinsa.

³⁵ «Mannikki Israeele sao assiteenna xeena ho'lite qorichishattonsa yannara, insano saonsawiinni higge albansa kunni Mini widira qolte umonsa shollishshe huuccidhuhero,

³⁶ ati iima gordoho heedhe huuccattonsa macciishshi. Soqqamaanokkiha Israeelete cubbo agurinsa. Halaalaancho heeshsho heedhanno gede rosiisinsa. Hakkunni gedensaanni iqqa assite oottonsa baattora xeena gani.

³⁷ «Baattote aana hude woy dhibbu daanno woyite, qoleno qorru, shammenna kanchafaru, woy sixu uwanno yannara, woy manna diinu gawajjanno yannara, woy mitte goofonna dhiwanu daanno yannara huuccidhanno huuccatto macciishshinsa.

³⁸ Israeelete manni giddonni ayino lowo geeshsha yaade angasi kayise Qullaawu Mini widira hige huucci'riro,

³⁹ iima gordoho heedhe macciishshite cubbosi agurte kaa'lisi. Mannu wodanira noo hedo gudisse afoottohu ate callaati. Kunnira mittu mittunkura loosi loosisi garinni uyi.

⁴⁰ Kunni garinni akaakkansara ootto baattora heedhanno diri baalunkunni ate waajjitannore assi.

^41-42 «Wole gobba manni ate duduwonna mannakki jawaata angakkinninna wolqaataame cigilekkinni assite fushshootto gara macciishshe, magansi'raheranna huucci'rahera kunni Minira daanno yannara,

⁴³ iima gordoho heedhe huuccattosi macciishshi. Mannikki Israeele assitannonte gede, baattote aana hee'ranno manni ate egenne hajajamannohe gede huuccattonsa macciishshi. Hasidhinoreno wonshinsa. Hatte yannara, kuni ani minoommo Mini ate su'mi woshshamannowa ikkinota mannu baalu afanno.

⁴⁴ «Mannakki diininsa ledo olamara soyatto yannara, heedhuwano heedhe kawa doodhootto katami widiranna ani minoommohe Mini widira higge huuccidhanno woyite,

⁴⁵ huuccattonsanna eegamansa gordoho heedhe macciishshite qeelle uyinsa.

⁴⁶ «So'rannokkihu nookki daafira, mannikki cubbo looseenna hanqite diininsa qeelannonna qafade wole gobba xeerto woy mulira haa're ha'rannonsa gede assatto.

⁴⁷ Qafadante noo gobbara heedhe, ‹Cubbo loonsoommo; sao assinoommo; bunshoommo› yite gaabbite aagintaabburo,

⁴⁸ qafadante noowa diininsa gobbara heedhe wo'mu wodaninni halaalunninna sumbetenni galagalte aagintaabbe higge akaakkansara ootto baattowa, ati doorootto katamiwanna ani atera minoommo Mini widira higge huuccidhuro,

⁴⁹ iima gordoho noottowa heedhe huuccattonsa macciishshite mararinsa.

⁵⁰ Cubbonsanna ate aana assitino sao baala agurinsa; diininsano mararannonsa gede assi.

⁵¹ Insa ate mannaatinna iqqakkiiti; booso giira gede ittannotenni Gibitsete gobbanni fushshootto mannakkiiti.

⁵² «Ani soqqamaanchikkinna mannikki Israeele huucci'neemmo woyite alba higinke; huuccattonke macciishshinke.

⁵³ Mooticha Kaaliiqa! Akaakkanke Gibitsetenni fushshitto waro, gosa baalate giddonni Israeele doodhoottota ikkitinota soqqamaanchikki Muse widoonni qolte coyi'rootto» yii.

SELEMOONI MANNA MAASSI'RI

⁵⁴ Selemooni kakkalote darga hee're huucci yannara, guluphe hee're angasi iima qole kayisi. Gotti yee uurre,

⁵⁵ hakkiicho gamba yee noo manna Maganu maassi'ranno gede qoonqosi naggi asse maassi'ranni,

⁵⁶ «Coyi'rino garinni mannisira keere uyinohu Kaaliiqi galatamo. Soqqamaanchisi Muse widoonni qole uyinotenni dancha hexxo baalate giddonni mitto qaale nafa digatisino.

⁵⁷ Maganinke Kaaliiqi akaakkanke ledo hee'rinte gede, ninke ledono hee'ro; aye woyiteno aguroonkenke; tugoonkenke.

⁵⁸ Akaakkankera uyino hajajo, woganna wodho agadhine, isi hedino garinni hee'rate isira hajajammeemmore assonke.

⁵⁹ Maganinke Kaaliiqi Israeelete mannira mootete hasiisannore wonshate huuccatto'ya macciishshe wo'manka woyite towatonsa.

⁶⁰ Kunni garinni gobbate aana noo manni baalu Kaaliiqi callu Magano ikkinotanna iso agurranna wolu magani nookkita afanno.

⁶¹ Ki'ne mannisi techonte gede, seerasinna hajajosi ayirrisate Maganinke Kaaliiqira lowo geeshsha ammanantinoonnire ikke» yii.

QULLAAWU MINI MAASSO

⁶² Hakkunni gedensaanni, moote Selemooninna ledosi noohu Israeelete manni baalu Kaaliiqira kakkalo shiqishi.

⁶³ Selemooni 22,000 bootta, 120,000 ge'reewonna me"e mittimmate kakkalora shiqishi. Kunni garinni moote Selemooninna Israeele baalanti Kaaliiqiha Qullaawa Mine maassidhu.

⁶⁴ Hakko barranni Selemooni Qullaawu Minira albaanni mereeroho noo nafarchono Kaaliiqira baxxinoha assi. Hakkiinni aanche gudinse shilqinshanni kakkalo, gidu fushshaatenna mittimmate kakkalo cooma Kaaliiqira shiqishi. Hatto assinohu camotenni seekkinoonnihu kakkalote dargi baalanta kakkalo haa'rannokki daafiraati.

⁶⁵ Hakkiicho Qullaawa Mine Selemooninna Israeelete manni baalu 7 barra Daasu Ayyaana ayirrissu. Aliyyeenni Hamaati faronni kayise wodiidoonni Gibitsete danni geeshshinni lowo manni dayino.

⁶⁶ Ayyaana ayirrinse ka'nihunni layinki barra, moote Selemooni manna qae qaesi ha'ranno gede assi. Mannuno Selemooni maassi're, Kaaliiqi soqqamaanchisi Daawitiranna mannisira Israeelete assinohura danchu coyi baalu daafira hagiidhanni mini minisira ha'ri.