UMI MOOTOOLLA 6 - Qullaawa Maxaafa

SELEMOONI QULLAAWA MINE MINA HANAFI

¹ Israeele Gibitsetenni fultuhunni 480 diri gedensaanni, Selemooni Israeelete moohihunni shoolki diro, Ziifi yinannihura layinki aganira Qullaawa Mine mina hanafi.

² Qullaawu Minino giddoyido seendille 27 qaafo, godowa 9 qaafo, hojja 27 cigileeti.

³ E'nanni waalchira noo gafo seendille, 4 qaafonna darate, godowa Qullaawu Mini ledo taalo 9 qaafo ikkitanno.

⁴ Masikoottano giddoyido hala'lite gobbayido ruukkitinote.

⁵ Qullaawu Minira aanche qullaawa darganna qullaawu holgi qooxeessira mimmitu aana gammala seekki. Qooxeessahono addi addi holge wori.

⁶ Woriidi holgi 5 cigileeti; mereerihu 2 qaafootinna darateho; aliidihu 3 qaafooti. Mittu mittunku holgi xarra alillitte shaalanni shaalanni ha'ranno. Kunnira, hi'ru dawaayyichi xarrate giddora raqqe dieino.

⁷ Qullaawa Mine minnoonni kinna, darri darga bonce seekkine abbinoonni. Kunni daafira, minni yannara meenchu, meesanete woy wolu uduunnichi qo'eessa dimacciishshinoonni.

⁸ Uullayidihu uduunne worranni dargi Qullaawu Minira wodiidoonni no. Isirano mereerihanna aliidiha xaadisanno dirimi noosi. Lamu wolu dargino hakkunnira aane no.

⁹ Selemooni kunni garinni Qullaawa Mine mine gudi. Qalchunniha giddoyido boncoonnihunni Libaanoosi daguwinni sheekkino.

¹⁰ Mittu mittunku holgi hojja 4 cigilenna darateho. Gobbaanni Qullaawu Minira aanchine minnoonnihu sasu mimmitu aani mini Qullaawu Minira sunfe daguwa haawiissine xaadinsoonniho.

¹¹ Kaaliiqi Selemoonira,

^12-13 «Woga'ya, wodho'yanna hajajo'ya baala agadhittoro, annikkira Daawitira coyi'roommo coye wonsheemmo. Manni'ya Israeelete mereero konne Qullaawu Mini giddo hee'reemmo. Insa horonta dicallachisheemmonsa» yii.

¹⁴ Kunni garinni Selemooni Qullaawa Mine mine gudi.

QULLAAWA MINE GIDDOYIDO MINNOONNI GARA

¹⁵ Qullaawu Mini xarrara giddoonni uullanni kayinse qalchu geeshsha halashshine daddarroonniha Libaanoosi daguwa haawiissine dirroonni. Uulla hoommete haqqe karroonni.

¹⁶ Qullaawu Holgi Qullaawu Minira giddo hige hulfame minamino. Kuni holgi seendille 9 qaafooti. Uullanni kayise qalchu geeshsha xanfoonnihunni Libaanoosi daguwinni seekkinoonni haqqenni bandoonniho.

¹⁷ Qullaawu Holgira albaanni noohu qullaawu dargi seendille 18 qaafooti.

¹⁸ Libaanoosi daguwi haqqe qoonchunna dartino daraaro suudinni bonce seesiinsoonnite. Giddoyidono xanfoonni daguwa dirroonni daafira xarrate kinna dileeltanno.

¹⁹ Kaaliiqi Taaboota worranniha Qullaawa Mine giddo qolle murroonni holge biifinse seekkinoonni.

²⁰ Kuni giddoyidi holgi seendille 9 qaafo, godowa 9 qaafo, hojja 9 qaafo assine gudinse aanaho fila culka xallinoonniho. Kakkalote uduunnichino bonce seekkinoonnita Libaanoosi haqqe aanaho dirroonniho.

²¹ Selemooni Qullaawu Minira giddoonni fila culka xallino. Culka xallinoonnihura giddoyidi holgira e'nanni waalchira culkunni seekkinoonni cagaage lulluqqinse sayinsoonni.

²² Qullaawa Holge noohura kakkallanni uduunnichiranna Qullaawa Mine giddo qolle murroonni holgira gudise culka xallino.

²³ Qullaawu Mini giddo hojja 9 cigile ikkitinota kirubeeli suudita 2 misile ejersu haqqinni seekkino.

^24-25 Lamunku kirubeeli mittu suudireeti. Mittu mittunkura lamu lamu qooli noonsa. Mittu mittunku qooli seendilli 5 cigilenna darate ikkanno. Mittu qoolinni kayise layinki qooli qacce geeshsha noo seendilli 10 cigile ikkanno.

²⁶ Mittu mittunku kirubeeli hojja 10 cigileeti.

²⁷ Kirubeelino Qullaawa Holge massine worranni gede assi. Diriirte nooti lamenti qoolla mimmito kissanna, wole widoonni nooti lame kayinni Minu xarra kissanno.

²⁸ Lamunku kirubeelirano aanaho culka xalli.

²⁹ Lamenka holgenna giddoyidi xarra baala kirubeelinni, saattunninna fantino daraaro suudinni boce seesiisi.

³⁰ Lamunku Qullaawu Mini holgi albiidihunniteranna giddoyidihu uulla baalate culka xalli.

³¹ Qullaawu Holgira e'nanniwa ejersu haqqita ka'anna kawa fa'namannoha 2 cufana wori. Cufannateno 5 madde worre umiido ale qolle luphi assinoonni.

³² Lamenka waalchono kirubeelinni, saattu haqqenninna fantino daraaro suudinni bonce seesiinsoonni. Waalchuwateno aanaho culka xalli.

³³ Qoleno jawu hari giddora e'nanni waalchira 2 cufana amaddannota ejersu haqqinni seekkinoonnita 4 madde afidhino xiyyo wori.

³⁴ Lamenka cufana hoommete haqqenni seekkino. Lamenka cufana waalchu ledo xaadisannoreno seekkino.

³⁵ Tini cufannano culka aanaho xallinoonni kirubeelinni, saattu haqqenninna fantino daraaro suudinni bonce seesiinsoonnite.

³⁶ Qullaawu Minira albaanni mitto nafara seekkino. Kunni nafarchi qooxeessira 3 dirimi kinchinni seekkinoonnihura kinchu huxxira umoho mitto mitto xarafaamo daguwu haqqa haawiisse wori.

³⁷ Konne Mine sanfoonnihu Selemooni moohihunni shoolki diro Ziifi yinannihura layinki aganiraati.

³⁸ Selemooni moohihunni tonaa mitikki diro, Buuli yinannihura settikki aganira, Qullaawu Mini hendoonni garinni miname goofi. Selemooni mine mine gudinohu 7 dirinniiti.