UMI MOOTOOLLA 5 - Qullaawa Maxaafa

SELEMOONI QULLAAWA MINE MINARA KAI

¹ Xiroosi moote Kiraami Daawiti ledo elle amade keeshshino daafira, Selemooni annisi Daawiti darga moohinota macciishshe, isiwa manna soyi.

² Moote Selemoonino Kiraamiwa,

³ «Anni'ya Daawiti, gashshootisi qarqarira heedhanno gobba diini baalu ledo olamanni hee'rinota ati egennootto. Diinasi sayise angasira aasi geeshsha, Maganisi Kaaliiqi su'ma ayirrinsanni mine mina dandiinokkitano afootto.

⁴ Xa kayinni Magani'ya Kaaliiqi raga baalaho keere uyinoe. Bala tugannoehu mittu diinino dino.

⁵ Kaaliiqi anni'yara Daawitira, ‹Ate darga moohannohu beettikki Qullaawa Mine minannoe› yee coyi'rino. Anino, magansi'nanniha Qullaawa Mine Magani'ya Kaaliiqira minate kaoommo.

⁶ «Kunnira, daguwa karanno manna Libaanoosi soyie; ane mannino haqqe ledonsa karanno gede asseemmona. Mannikkirano ati hedoottore baateemmo. Afittonte gede ane manni atehu geeshsha haqqa murranni gara diegennino» yee sokka soqqi.

⁷ Kiraamino Selemooni sokka macciishshe lowo geeshsha hagiidhe, «Dargasi amade tenne jawa gosa gashshanno gede konne egennaamo beetto Daawitira uyino Kaaliiqi galatamo!» yii.

⁸ Hakkunni gedensaanni Kiraami Selemoonira, «Soottoe sokka iillitinoe. Anino yoottoe coye baala wonshate qixxaawaho. Daguwanna hoomme qixxeesse shiqisheemmohe.

⁹ Ane manni haqqa Libaanoosinni haa're baaru eelira massanno. Gamba assite usurteenna wayi duhe ati hasi'roottowa iillishanno gede assitanno. Hakkiicho ane manni usurroonni haqqe tire mannikkira aanno. Atino mootimma'ya mine hee'ranno mannira sagale sokke halcho'ya wonshatto» yee sokka soyi.

¹⁰ Kiraamino Selemoonira ikkitanno geeshshita daguwunnitanna hoommete haqqe shiqishisi.

¹¹ Selemoonino Kiraami mannira sagalete ikkitannota 20,000 kuntaala qamadenna 400,000 litire fila ejersu zayite diru dirunkunni uyi.

¹² Kaaliiqi balaxe coyi'rino garinni Selemoonira egenno uyinosi. Kiraaminna Selemooni mimmitu ledo keere heedhu; mimmitu ledono sheemaate e'u.

¹³ Moote Selemooni Israeelete gobba baalantenni wolqate looso loossannore 30,000 manna doori.

¹⁴ Kunni mannira Adooniraami yinanni mancho roorricha asse wori. Loossannoreno tonne tonne kume asse sasewa beehe Libaanoosi soye, mitte mittenti gaamo mitto agana loosse, lame agana qaensara keeshshitanno gede assi.

¹⁵ Moote Selemooni ilaalaame gobbara kinna dartannore 80,000 mannanna darroonniha dukke abbitannore 70,000 manna wori.

¹⁶ Konne manna loosiissannore 3,300 manna qixxeessi.

¹⁷ Moote Selemooni hajajino garinni loossannori, Qullaawa Mine safate ikkitannota xuma jajjabba kinna bocce qixxeessitu.

¹⁸ Selemooninna Kiraami ogeeyye qoleno Bibiloosi Katami manni Qullaawa Mine minate ikkitanno kinnanna haqqe baala qixxeessi.