UMI MOOTOOLLA 4 - Qullaawa Maxaafa

SELEMOONI SHOOMINO GASHSHAANO

¹ Selemooni Israeelete gobba baalate moohi.

² Ledosi gashshitanno gede shoominori: Saadooqi beetti Azaariyaasi qeesichaho;

³ Shiisha ooso Elihoreefinna Akiya mootete mini borreessaanooti. Ahiluudi beetti Iyosaafiixi hasaamboonni coye borreesse amadannoho.

⁴ Yoodahe beetti Beenaya olantote sooreessaati. Saadooqinna Abiyaataari qeesootaho.

⁵ Naataani beetti Azaariyaasi ga're ga'rete gashshaanora roorrichaho. Naataani beetti Zabuudi qeesichahonna mootete amaalaanchooti.

⁶ Ahishaari, mootete mini soqqamaanora roorrichaho. Abida beetti Adooniraami wolqate looso loosiisannoho.

⁷ Moote Selemooni qole 12 worada gashshitannore doori. Insa loosi gashshitino gobbanni mootetenna mootete minira sagale shiqishate. Mittu mittunku diru giddo mittu aganira ikkitanno sagale shiqishanno.

⁸ Tonaa lamunku gashshaanonna gashshitino gobba kunninni aante nooreeti. Beenihuuri: Gaaraame Efireemi gobba gashshinoho.

⁹ Beenideqeeri: Maqaatsi, Sha"alibiimi, Beetesaamisanna Elooni-Beetihanaani katamma gashshaanchooti.

¹⁰ Beeniheseedi: Arubootinna Sookohi katammanna Hefeeri gobba baalate gashshaanchooti.

¹¹ Xafaati yinannita Selemooni beetto adhinohu Beeni, Aminaadaabi Doori gobba baalate gashshaanchooti.

¹² Ahiluudi beetti Beaana: Tainaakinna Megido katamma, Beeteshaani Gobbanna Tsaritaani Katami mule noota, qoleno Iyiziraeelira wodiidoonni noo gobba, Abeeli-Mehoolanna Yoqimeaami yinanni katamma geeshsha noowa baala gashshino.

¹³ Beeni-Gebeeri: Raamooti Geleaadi yinanni katamira Minaase ga'rera ilaminohunnita Yaiiri ilama gobba, Baasaani Argobbi gobbara noota waalchuwansa camote waawannanni waawansinannita kinchu huxxuwa noota qiinshoonnita mitteenni 60 katamma gashshino.

¹⁴ Iddo beetti Ahinaadaabi, Mahinayimi yinanni katami gashshaanchooti.

¹⁵ Selemooni beetto Baasimaati adhinohu Akima"aasi Nifitaalemi gobba gashshaanchooti.

¹⁶ Hushayi beetti Beaana Aseeri Gobbanna Bealooti Katami gashshaanchooti.

¹⁷ Faaruhi beetti Iyosaafiixi Yisaakoori gobba gashshaanchooti.

¹⁸ Eela beetti Shimi"i Biiniyaami gobba gashshaanchooti.

¹⁹ Uuri beetti Gibeeri, Amooraawootu moote Sewooninna Baasaani moote Aagi amaddinota Geleaadi gobba gashshino. Kuri baalankura aliidihu mittu roorrichi no.

QINIITAAMO SELEMOONI GASHSHOOTE

²⁰ Yihudunna Israeelete manni baaru shaafi gede kiiro bati'raho. Kuni manni baalunku intannirinna anganniri xeinsakkinni wo'manka woyite qawaaxxi're hee'ri.

²¹ Selemooni Efiraaxisi Wayinni kayise, Filisxeemete gobba geeshsha, hakkiinnino sae Gibitsete danni geeshsha noo gobba baala gashshino. Tenne gobba baalantera hee'ranno manni Selemooni anga gale isi lubbotenni noo geeshsha isira gabbaranni hee'rino.

²² Selemooni minira barru barrunkunni sagalete 5,000 kiilo liiqo bullee, 10,000 liiqaabbinokki bullee,

²³ usurre maqalloonniha 10 lalonna allaalle misiinsoonniha 20 lalo, 100 ge'reewo, gaarraano, bulaa, geedimonna maali lukkuwa abbinannisi.

²⁴ Selemooni Efiraaxisi Wayira galchimaanni noo gobba baala Tifisahi Kataminni kayise Gaaza Katami geeshsha gashshino. Tini gobbano Efiraaxisi Wayira galchimaanni noo gashshoote baala amaddanno. Ollaa ikkitino gobba baalate ledo keere hee'rino.

²⁵ Selemooni yannara Daaninni Bersaabehi geeshsha noohu Yihudunna Israeelete manni yaaddo nookkiha keere hee'rino. Baalunku umi uminsahura woyinennihuranna balasete haqqe caalira caa'lite fooliishshidhanni heedhino.

²⁶ Selemooni faradi gaare goshooshanno faradira 40,000 faradu gollonna gulunfannihu 12,000 olu faradi noosi.

²⁷ Selemooniranna mootete mine hee'ranno manni baalaho hasiissanno sagale tonaa lamenka worada gashshitinori kulloonninsare xeissukkinni yinoonni aganinni wo'manka woyite abbitu.

²⁸ Qolteno mittu mittunku gashshaanchi malloonni garinni faradi gaare goshooshannohuranna wolu faradira itanno hayixenna kura shiqishshu.

SELEMOONI EGENNO

²⁹ Kaaliiqi Selemoonira lowo hayyonna wodancha, hattonni gawalo nookki egenno uyinosi.

³⁰ Selemoonira Soojjaati gosatanna Gibitsete hayyooleta roortino hayyo noosi.

³¹ Isi manna baalanka roore hayyichaati. Isi Ezirahichu Etaaninna, Mahooli ooso Hemaani, Kalikoolinna Daariai roore hayyichaati. Su'misino gashshootisira aante noo gobba baalate egennami.

³² Selemooni 3,000 lawishshanna 1,500 faarso fushshino.

³³ Selemooni Libaanoosi daguwinni kayise, kinchu qarra mu'rino ishinchi baalu daafirano coyi'rino. Qoleno saadate, ceate, goduwunni ha'ranno kalaqaminna qulxu'mu daafirano rosiisino.

³⁴ Gobba baalate heedhanno mootoolla Selemooni hayyo macciishshite yaannore macciishshanno manna isiwa soqqitu.