UMI MOOTOOLLA 2 - Qullaawa Maxaafa

MOOTE DAAWITI SELEMOONIRA UYINO BIDDISHSHA

¹ Moote Daawiti reyanno yanna rakkuta beettosi Selemooni woshshe,

² «Kune ani mannu aalo ikkeemmoti yanna dagginona jawaati; manna ikki!

³ Maganikki Kaaliiqi assattora hasi'rannore baala seekkite afi. Hakkuno: Ha'ratto doogo baalate assi'rittori qinaannohe gede Kaaliiqi Muse widoonni qole uyino seeranna hajajo, woganna halaale baala agadhate.

⁴ Konne coye wonshittoro Kaaliiqi, ‹Sirchikki qorophotenni hee'riro, wo'mu wodaninninna wo'ma lubbonni ane albaanni halaalunni qaafiro, sirchikki giddonni Israeelete moohannohu dihooganno› yee kulinoe coyi wo'manno.

⁵ «Tseruya beetti Iyoaabi ane yore Israeelete olanto roorroota Neeri beetto Abeneerinna Yeteeri beetto Amaasa assinota ati afootto. Alba olu waro shitino rabbara keeru yannara beebbatenni shiinotano habbooti; tenne mundeera xa'mamannohu isootina egenni.

⁶ Heedhannohe hayyonni assate hasiisannore assi; garunni reyara worte agurtooti.

⁷ «Rodiikki Abeseloomi shorrie waro towatinoe daafira, Geleaadichu Barzilayi ooso towatinsa; ate mine ittannori ledo heedhanno gede assinsa.

⁸ «Hawate hasiisannokkihu wolu coyino no: Biiniyaami gobbara Bahuriimi Katamira hee'rannohu Geeri beetti Shimi"i Mahinayimi Katama ha'rummo yannara busha xono xoninoe. Ikkollana Yordaanoosi Wayi eela anenni xaadeenna sheemmosikki gede Kaaliiqi su'minni xaaroommo.

⁹ Ati kayinni agurtootisi; noohe hayyonni assatto gara atinni afattona; garunni reyannokki gede atinni shii» yii.

DAAWITI REYO

¹⁰ Hakkunni gedensaanni Daawiti annuwasinte gede reenna Yerusaalamete Daawiti Katama yinannihura madaarrisi.

¹¹ Daawiti Kebirooni 7 diro, Yerusaalamete 33 diro, mitteenni Israeelete 40 diro moohino.

¹² Selemoonino annisi Daawiti darga amade moohi. Gashshootisino lowo geeshsha jawaata ikki.

ADOONIYAASI REYO

¹³ Mitto barra, Adooniyaasi Selemooni amawa Bersaabehiwa mari. Iseno, «Anewa keerunkunni dayitto?» yite xa'mitusi. Isino, «Ee keerunkunnilla dayommona,

¹⁴ kayinni shiima ate ledo hasaaweemmo haja nooe» yiise. Iseno, «Maahoyyena hasaawissiyya» yitusi.

¹⁵ Adooniyaasino, «Mooha haasiissannoehu ane ikkoommotanna konne coyeno Israeele baala hedde agarte noota ati afootta. Ikkollana Kaaliiqi yiinokki daafira anera aamantanno mootimma rodii'yara uyinoonni.

¹⁶ Xa kayinni mittu huucci'reemmohe coyi noona irraawissootie» yiise. Iseno, «Mitiimmakki maati?» yite xa'mitusi.

¹⁷ Adooniyaasino, «Moote Selemooni ati yoottata giwannokkita afoommona, Suneemitte Abishaagi galte ikkitannoe gede ooena xa'mie» yiise.

¹⁸ Bersaabehino, «Maahoyye hajakki mootete kuleemmahena» yitu.

¹⁹ Iseno, Adooniyaasi haja kultara moote Selemooniwa martu. Moote Selemoonino ofollinowiinni kae umo heeshshi yee keere haa're dargisira ofollihu gedensaanni, amasirano wole ayirrinyu barcima abbineenna qiniitesiinni ofoltu.

²⁰ Iseno, «Mittu shiimu huucci'reemmahe coyi noona irraawissootie» yitusi. Mooteno, «Ama'ya di"irraawiseemmohena mitiimmakki maati?» yee xa'mise.

²¹ Iseno, «Rodiikki Adooniyaasi Abishaagi adheemmo yiinona aattosi ikka?» yitu.

²² Moote Selemoonino amasira, «Abishaagi uyinannisi gede calla mayira xa'mattae? Bayira'ya ikkino daafira gashshoote'yano eemmosi gede dixa'mattae? Qeesichu Abiyaataariranna Iyoaabirano mitore mayira xa'ma giwittansayya!» yiise.

²³ Hakkunni gedensaanni Selemooni, «Adooniyaasi konne coye hedasira reya hoogiro Kaaliiqi afoe.

²⁴ Kaaliiqi, anni'ya Daawiti barcimi aana ofoshshiishe, gashshoote'ya dhaawe Israeele gashshitannori sirchi'ya giddonni fultanno gede assino. Adooniyaasi kayinni techonni reyanno gede Heeshshote Kaaliiqi su'minni xaareemmo!» yii.

²⁵ Kunnira moote Selemooni Adooniyaasi shaanno gede Beenaya hajaji. Beenayano mare Adooniyaasi shii.

SELEMOONI ABIYAATAARI QEESIMMATENNI HOOLI

²⁶ Moote Selemooni Abiyaataari woshshe, «Techo woleteemmero ati reyatto barraatina, Wo'munkura Aliidi Kaaliiqi Taaboota anni'ya Daawiti albaanni dukke ha'rootto daafiranna wo'ma woyite isi ledo qarramoottoha ikkootto daafira, ani techo disheemmohena, ilamoottowa Anatooti qaekki ha'ri!» yiisi.

²⁷ Hakkunni gedensaanni, Kaaliiqi Seelo qeesichu Eeli mini daafira coyi'rino coyi wo'manno gede, Selemooni Abiyaataari Kaaliiqira soqqamanni noo soqqansho qeesimmannitewiinni fushshe huni.

IYOAABI SHINI

²⁸ Abeseloomi ledo ikkikkinni Adooniyaasi ledo gano ganinohu Iyoaabi konne coye macciishshe, lubbo gatisi'rara xooqe mare Qullaawu Dukkani giddo kakkallanniwa noo buudda cu'mi're eeggo ei.

²⁹ Selemooni Iyoaabi Qullaawu Dukkani giddora xooqe kakkallanniwa einota macciishshe mare shaanno gede Beenaya hajaji.

³⁰ Beenayano Qullaawu Dukkani giddora Iyoaabiwa mare, «Moote Dukkanu giddonni fulatto gede hajajinohe!» yii. Iyoaabi kayinni, «Difuleemmo! Konniicholla reemmo!» yii. Beenayano galagale mare Iyoaabi yiinore mootete kuli.

³¹ Selemooni Beenaya, «Iyoaabi yiinonte gede assite shite madaari. Hatto assite beebbaataammu mundee Iyoaabi duninotenni anenna anni'ya mine keereensinke.

³² Anni'ya Daawiti afikkinni beebbaataamo manna shiino daafira Kaaliiqi qorichishannosi. Iyoaabi isiwiinni woyyitannore beebbaataamma Israeelete olanto hajajannoha Abeneerinna Yihudu olanto hajajannoha Amaasa shiino.

³³ Konne manna shiino daafira, isira uyinanni qorichi isinna oososi aaninni kaoonke! Daawitira, minisiranna isi darga amadde mookkannorira sirchisira kayinni, hegerehu Kaaliiqi keeri ledonsa hee'ro!

³⁴ Beenayano mare Iyoaabi shii. Reeshshasino massine halallitte gobbara qaesira madaarri.

³⁵ Moote Selemooni, Iyoaabi darga Beenaya olantote roorricha asse, Abiyaataari dargano, qeesicha Saadooqi wori» yii.

SHIMI"I REYO

³⁶ Hakkunni gedensaanni moote Selemooni Shimi"i woshshiishe, «Konniicho Yerusaalamete mine mi'nite hee'ri. Kawiichinni mittowano hadhooti.

³⁷ Katamu giddonni fulte, Qedirooni Xashsho fulittoro reyattota afi. Reyokkira wolu ayino dixa'mamanno» yiisi.

³⁸ Shimi"ino qole, «Moote'ya, maahoyye danchate ani soqqamaanchikki ati mootichi'ya yootto gede ikkeemmo» yii. Yerusaalameteno lowo yanna hee'ri.

³⁹ Sasu diri gedensaanni, lamu Shimi"i soqqamaano Gaati mootewa Maika beetti Akiishiwa fulte ba'u. Shimi"irano, soqqamaanosi hakkiicho noota kulleennasi,

⁴⁰ harricho koodhe Gaati mootewa Akiishiwa ha'ri. Soqqamaanosino hakkiicho afi're minira adhe higi.

⁴¹ Selemooni Shimi"i Yerusaalametenni Gaati ha're higinota macciishshe,

⁴² Shimi"i woshshiishe, «Yerusaalametenni fulattokki gede Kaaliiqi su'minni dixaarsiisoommohe? Gibbe fulittoro kayinni reyattota dikuloommohe? Atino, yoommo gede ikkattota kuloottoe.

⁴³ Kaaliiqi su'minni xaarootto xaaronna ane hajajo wonsha mayira giwittoyya?

⁴⁴ Anni'ya Daawiti aana assootto sao baala egennootto. Assootto bunshera Kaaliiqinni qorichishannohe.

⁴⁵ Ane kayinni Kaaliiqi maassi'rannoe. Daawiti gashshootino Kaaliiqi albaanni hegerera kaajje hee'ranno» yii.

⁴⁶ Hakkunni gedensaanni Beenaya Shimi"i shaanno gede hajaji. Beenayano mare Shimi"i shii. Kunni garinni gashshootu Selemooni anga kaajje hee'ri.