UMI MOOTOOLLA 17 - Qullaawa Maxaafa

EELIYAASI MOOLLE DAGGANNOTA HIMANI

¹ Geleaadi gobbara Tishibi yinanniwa ilaminohu himanaanchu Eeliyaasi Akiaabira, «Soqqameemmosihu Israeelete Magani Kaaliiqi afanna, ani coyi'reenna ikka geeshsha 2 woy 3 diri geeshsha baattote aana loju woy xeenu dihee'ranno» yiisi.

² Hakkunni gedensaanni Kaaliiqi Eeliyaasira,

³ «Kawiichinni ka'e soojjaatira hadhe, Yordaanoosi Wayira soojjaatoonni Keriiti Xashshi mule marte maaxami.

⁴ Waano hakko xashshinni agatto. Haraqeeyyeno sagale abbitannohe gede hajajoommo» yiisi.

⁵ Eeliyaasino Kaaliiqi hajajinosi garinni ha're Keriiti Xashshi mule keeshshi.

⁶ Haraqeeyye soodonna hawarro timanna maala abitannasi, waano xashshunni adhe aganni hee'ri.

⁷ Xeena gana agurino daafira shiima yanna gedensaanni xashshuno mooli.

EELIYAASINNA SERAPHITA HEEDHANNO GUNNITTE

⁸ Hakkunni gedensaanni Kaaliiqi Eeliyaasira,

⁹ «Xaate kawiinni ka'e Sidoona mule Seraphita Katamira marte hee'ri. Kuneeti sagale towattannoheta mitte gunnitte mancho hajajoommohena» yiisi.

¹⁰ Isino kae Seraphita ha'ri. Katamu huxxi waalcho iillanno woyite mancho haqqe hiiqqidhanni noota afe, «Eeggatena ballo ageemmo waa abbie!» yii.

¹¹ Waa abbitasira hadhanni heedheenna woshshe, «Eeggatena shiima timano anga haadhe abbie» yee ku'li.

¹² Iseno, «Maganikki Kaaliiqi afanna, mitto hoowo ikkitanno bulleenna maaqqete giddo noota hilicci zayite agurranna wole sagale dinoe. Hattenne noota aneneetenna qaaqqi'yara tima ga'nammara xigiro xinqi'ranni noomma. Hattino ninkera jeefote sagaleeti. Hakkunni gedensaanni reyankeeti» yitusi.

¹³ Eeliyaasino qole, «Waajjitootina marte timakki ga'ni. Balaxxe kayinni anera mitto shiima tima gante haadhe abbie; gatinoha ateneetenna qaaqqikkira ga'ni.

¹⁴ Israeelete Magani Kaaliiqi, ‹Ani Kaaliiqi baattote xeena ganammo geeshsha bullee gambayichunni, zayiteno maaqqete giddonni digooffanno› yiino» yiise.

¹⁵ Iseno hadhe Eeliyaasi yiinose gede assitu. Kunni garinni Eeliyaasira, iseneetenna minise manni baalunkura lowo yannara ikkitanno sagale afidhu.

¹⁶ Kaaliiqi Eeliyaasi widoonni qole coyi'rinonte gede, bullee gambayichunni zayiteno maaqqete giddonni digooffino.

¹⁷ Shiima yanna gedensaanni hattenne gunnittera qaaqqu dhiwaminose. Dhibbuno bati'reenna qaaqqu reyi.

¹⁸ Iseno Eeliyaasi, «Maganu mancho! Togo mayira assittoe? Kawiira dayottohu Maganoho cubbo'ya qaagiissite qaaqqo'ya shiishiishattoraatini?» yitusi.

¹⁹ Eeliyaasi qole, «Qaaqqokki anewa abbi» yiise. Qaaqqo angasenni haa're isi galannowa minu aana minnoonni minira masse daallasisi aana goxisi.

²⁰ Hakkunni gedensaanni Eeliyaasi qoonqosi naggi asse, «Kaaliiqa Magano'ya! Tenne galte afidhinokki manchora konne qarra mayira abbitto? Shooshanqetenni towattanni nooetera, qaaqqose hanni mayira shiitto?» yii.

²¹ Qaaqqu aana 3 hige gombisame, «Kaaliiqa Magano'ya! Eeggakkiitina kunni qaaqqi lubbo darga qoli» yee huucci.

²² Kaaliiqino Eeliyaasi huuccatto macciishshi. Qaaqqohono lubbo darga higgeenna reyotenni gati.

²³ Hakkunni gedensaanni Eeliyaasi qaaqqo dirrise masse amate ee, «Kune lai; qaaqqikki reyotenni gatino!» yiise.

²⁴ Iseno, «Ati Maganu mancho ikkoottotanna Kaaliiqino ate afiira coyi'rannota xa afoomma» yitu.