UMI MOOTOOLLA 16 - Qullaawa Maxaafa

¹ Hakkunni gedensaanni Kaaliiqi Hanaani beetti himanaanchu Iyu widoonni qole Baashara kulino himani kunninni aane nooho.

² «Bukote aaninni kayise manni'yara Israeelete moote assoommohe. Ati kayinni Iyorbiaami gede cubbo loosse, manna'yano cubbu giddora eessootto. Cubbinsano ane hanqisinoe.

³ Kunnira, Iyorbiaami mine assummo gede asse atenna minekki gudeemmo.

⁴ Katamu giddo reyannoha minikki manna woshshu itanno; gobba xawoho reyannoha baala doowiru itanno» yiino.

⁵ Baasha assinohu wolu coyinna bareendetenni loosino loosi Israeelete mootoolla dhagge amadino maxaafira borreessame no.

⁶ Baasha annuwasinte gede reenna annuwasi waammawa Tiritsa madaarrisi. Beettisi Eela isi darga moohi.

⁷ Kaaliiqi himanaanchu Iyu widoonni qole Baasharanna minisi mannira konne coyi'rinohu, Iyorbiaami gede cubbo loose hanqisinosi daafira calla ikkikkinni, Iyorbiaami mini mannano co'o asse gudino daafiraati.

ISRAEELETE MOOTE EELA

⁸ Aasa Yihudaho moohihunni lemiina leelki diro Baasha beetti Eela Israeelete moohi. Tiritsa teesso assi're 2 diro gashshino.

⁹ Darate faradi gaare hajajannohu Zimiiri yinanni manchi Baashara gano gani. Mitto barra Eela Tiritsa Katamira mittu mootete mini hajajaanchi Aritsa yinannihu mine age dimbe hee'reenna,

¹⁰ Zimiiri minira e"e Eela shii. Isino Eela darga amade moohi. Kuni ikkinohu Aasa Yihudaho moohihunni lemiina lamalki dirooti.

¹¹ Zimiiri moohanni hee'renni, Baasha mini manna baala shii. Baasha ayiddenna jaallasi labballo baala gudi.

¹² Kunni garinni Kaaliiqi himanaanchu Iyu widoonni qole coyi'rinonte gede Zimiiri Baasha mini manna baala co'o asse gudi.

¹³ Kuni ikkinohu Baashanna beettisi Eela Israeelete manni tidhitinokki maganna magansi'ratenni cubbu giddora eanno gede assite, Israeelete Magano Kaaliiqa hanqissino daafiraati.

¹⁴ Eela assinohu wolu coyi baalu Israeelete mootoolla dhagge amadino maxaafi giddo borreessame no.

ISRAEELETE MOOTE ZIMIIRI

¹⁵ Aasa Yihudaho moohihunni lemiina lamalki diro Zimiiri Tiritsa Katama teesso assi're Israeelete 7 barra moohino. Hatte yannara Israeelete olanto Filisxeemenniha Gibetooni Katama doyissite amadde no.

¹⁶ Israeelete olanto Zimiiri gano gane moote Eela shiinota macciishshite, hakkawoyintenni urdete roorricha Omiiri moohisidhu.

¹⁷ Omiirinna ledosi noo olanto Gibetooni agurte hadhe Tiritsa doyissite amaddu.

¹⁸ Zimiiri katamu amadaminota afihu gedensaanni, dodanni mare mootete mine noo gollo giddora e"e mineho giira qasi. Isono giirate buwani ite shii.

¹⁹ Kuni ikkinohu, Iyorbiaami gede Kaaliiqi giwanno coye asse, Israeeleno cubbu giddora eessatenni Kaaliiqa hanqisino daafiraati.

²⁰ Zimiiri assinohu wolu coyinna ganino gano baala Israeelete mootoolla dhagge amadino maxaafi giddo borreessante no.

ISRAEELETE MOOTE OMIIRI

²¹ Hatte yannara Israeelete manni lamewa baxxe, mittu widi Ginaati beetto Tibini moohisi'rara hasi'rita, gamisu widi kayinni Omiiri baxino.

²² Ikkollana Omiiri baxi widi Tibini manna qeelino. Tibinino shineenna Omiiri moohi.

²³ Aasa Yihudaho moohihunni sajjiina mitikki diro, Omiiri Israeelete moohe 12 diro gashshi. Umiha 6 diro Tiritsa teesso assi're gashshino.

²⁴ Hakkunni gedensaanni Omiiri Shemeeri yinanni manchiwiinni Samaariyu gaara 6,000 kinchu birrinni hidhi. Gaaru aana qiisho qiishihu gedensaanni katama mini. Katamaho gaaru annira aanche su'ma, Samaariya yee fushshi.

²⁵ Omiiri albi mootoollanni roore Kaaliiqi giwannore assino.

²⁶ Umisi loosino cubbinninna Israeelete mannano tidhitinokki maganna magansi'ranno gede assatenni Iyorbiaami gede Israeelete Magano Kaaliiqa hanqisino.

²⁷ Omiiri assinohu wolu coyinna bareendete loososi baalu Israeelete mootoolla dhagge amaddino maxaaffa giddo borreessame no.

²⁸ Omiirino annuwasinte gede reenna Samaariyaho madaarroonnisi. Beettisi Akiaabino isi darga moohi.

ISRAEELETE MOOTE AKIAABI

²⁹ Aasa Yihudaho moohihunni sajjiina settikki diro, Omiiri beetti Akiaabi Israeelete moohi. Samaariya teesso assi're Israeele 22 diro gashshino.

³⁰ Akiaabi albi mootoolla baalantenni roore Kaaliiqi giwanno coye assino.

³¹ Akiaabi Iyorbiaami loosino cubbo mite yee nafa dikiirino. Hakkiinni sae Sidoona mooteta Etibeaali beetto Elzaabeeli adhe, Ba"aali magansi'rino.

³² Samaariyaho Ba"aalira galma mine, kakkalote dargano seekke masse hakkiicho worino.

³³ Meya maganota Asheera mokkollichono seekki're, Magano Kaaliiqa hanqisate albiti Israeelete mootoolla baala loossino cubbinni roorino cubbo loosino.

³⁴ Akiaabi yannara Beeteli ilaminohu Hieeli yinanni manchi Iyyaarko galagalche mini. Kaaliiqi Newe beetti Iyyaasu widoonni qole coyi'rino garinni Iyyaarkote gaata safi barra Aberooni yinannihu bayiru beettisi reyino. Huxxu waalchuwa seekki barra Seguubi yinannihu maa'nu beettisi reyino.