UMI MOOTOOLLA 12 - Qullaawa Maxaafa

ALIYYE ISRAEELE ROOBIAAMI GIBBU

¹ Mitto barra Roobiaami Sekeemi ha'ri. Hakkiicho aliyye Israeele manni iso moohisara gamba yee agare no.

² Selemooni waajje Gibitsete maaxame hee're Naabaaxi beetti Iyorbiaami konne duduwo macciishshi.

³ Aliyye Israeeleno manna sokke Iyorbiaami abbisiissu. Mannuno Iyorbiaami ledo mitteenni Roobiaamiwa mare,

⁴ «Annikki Selemooni lowo duha duhisiise gadadisinonke. Xa ati kayinni konne duha aaninni shaashshittonkero atera soqqammeemmohe» yitusi.

⁵ Roobiaamino, «Maahoyye qoleemmo'nena, 3 barri gedensaanni galagaltine higge» yiinsa. Mannuno fule ha'ri.

⁶ Hakkunni gedensaanni moote Roobiaami annisira Selemoonira mala uyitanno geerra gamba asse, «Kunni mannira mayee dawaro?» yee mala xa'mi'ri.

⁷ Geerruno, «Techo kunni mannira danchu garinni soqqamittonsaronna xa'midhino garinni qolittonsaro, insano wo'manka woyite ammanamatenni soqqantannohe» yiisi.

⁸ Roobiaami kayinni geerru mala mishe darawosi ikkitinoriwa, xa kayinni mala uyitannosi wedelliwa mare,

⁹ «Ki'ne uyitinannie mali maati? Duha shaashshammonsara xa'mi'ranno mannira mayee qolo?» yee xa'minsa.

¹⁰ Insano dawarte, « ‹Annikki Selemooni lowo duha duhisiisinonke; xa kayinni ati konne duha shaashshinke› yee qarra kalaqi mannira, ‹Anehu shiimiidi angichi du'mille anni'ya hallo rooranno!

¹¹ Anni'ya lowo duha duhisiise gadadisino'ne. Ani kayinni hakkiinni saino duha duhisiiseemmo'ne. Anni'ya halangetenni ganino'ne. Ani kayinni haffarraame lichenni gananni shetiseemmo'ne!› yiinsa» yitusi.

¹² Sasu barri gedensaanni, Iyorbiaaminna mannu baalu Roobiaami uyinonsa dinye garinni galagalte isiwa daggu.

¹³ Moote Roobiaami geerru kultinosi mala facci asse agure mannaho kaajjado qolo qoli.

¹⁴ Darawosi uyitinosi mali garinni, «Anni'ya lowo duha duhisiisino'ne. Ani kayinni hakkiinni saino duha duhisiiseemmo'ne. Anni'ya halangetenni ganino'ne. Ani kayinni haffarraame lichenni ganeemmo'ne!» yiinsa.

¹⁵ Kuni coyi ikkinohuno, Kaaliiqi Seelonni dayino himanaanchi Akiya widoonni qole Naabaaxi beettira Iyorbiaamira coyi'rino coyi wo'manno gedeeti. Moote Roobiaami mannu yiinota macciishsha giwinohuno kunniraati.

¹⁶ Israeelete manni baalu Roobiaami coyensa haa'ra giwinota afihu gedensaanni, «Daawitinna sirchisi ho'lonke! Insa ninkera ma"assite egentinonke? Israeele, qae qaekki higi! Roobiaamino woyyannosire ma'lo!» yee lallawi. Insano qae qaensa higgu.

¹⁷ Roobiaamino Yihudaho hee'ranno manni callaho moohi.

¹⁸ Hakkunni gedensaanni Roobiaami wolqate looso loosiisannoha Adooniraami Israeelete manniwa soyi. Israeele kayinni iso kinnatenni gante shitu. Roobiaami rahe faradi gaare gidde Yerusaalame xooqi.

¹⁹ Hatte yannanni kayise techo geeshsha aliyye Israeele Daawiti gibbino gedeenni heedhanno.

²⁰ Israeele baalanti Iyorbiaami Gibitsetenni galagale higinota macciishshite songonniwa woshshite abbite moohissusi. Daawiti minira ammanante gattinoti Yihudu ga're callate.

SHEMAIYA ROOBIAAMI QOROPHISIISI

²¹ Roobiaami Yerusaalame iillihu gedensaanni, Israeelete ga're baala qase qo'lara hedino daafira, Yihudunninna Biiniyaami ga'renni 180,000 olanto woshshe mittowa gamba assi.

²² Ikkollana Maganu himanaanchu Shemaiyara,

²³ «Roobiaamira Yihudunna Biiniyaami ga're baalantera:

²⁴ Ani Kaaliiqi, ‹Roduuwi'ne Israeelete aana bala tugginoonte; baalunku mini mini'nera higge; konne coye assoommohu aneeti› yiino yite kulinsa» yiisi. Insano Kaaliiqi yiino coye macciishshite mini mininsara higgu.

IYORBIAAMI KAALIIQIWIINNI WIRRI YII

²⁵ Israeelete moote Iyorbiaami gaaraamete Efireemi gobbara nooha Sekeemi Katama qiisho assi're shiima yanna hakkiicho keeshshi. Hakkiichinnino kae Peenueeli Katamano qiisho assi'ri.

^26-27 Iyorbiaami wodanisinni, «Kuni coyi togo ikke hee'reenna ane manni Yerusaalame ha're Qullaawa Mine Kaaliiqira kakkalannoha ikkiro, Yihudu Mootewa Roobiaamiwa hige ane shaannoe. Gashshooteno galagalche Daawiti minira qolanno» yee hedi.

²⁸ Konne coye malihu gedensaanni, 2 siittu misile culkunni seekkisiise mannaho, «Magansi'rate Yerusaalame ha'ra daafursitanno'nena ha'ra agurre. Israeelete manna! Gibitsetenni fushshitu'ne maganna tenneeti» yiinsa.

²⁹ Hakkunni gedensaanni hattenne culkunni seekkinoonni misilla mitte Beeteli, mitte qole Daani masse wori.

³⁰ Mannuno Beetelinna Daani ha're misilla magansi'ratenni cubbo loosi.

³¹ Hattonni Iyorbiaami gaarrate aana magansi'nanniwa qixxeesse Leewi ga're ikkitinokkiri giddonni afiha baala qeese asse wori.

MAGANU MANCHI BEETELI KAPHU MAGANO MAGANSI'NANNIKKI GEDE DANNISI

³² Iyorbiaami Yihudaho assinanninte gede, settikki aganira tonaa ontikki barra ayyaana ayirrinsanni gede assi. Beeteli nootera culkunni seekkinoonni misillara kakkalo shiqishi. Hakkiichono magansi'nara seekkisiisino gaarrara soqqantanno qeesoota wori.

³³ Ayirrinsanni gede isi umisi hirqino aganira tonaa ontikki barra Beeteli ha're, Israeelete mannira kulino garinni kakkalo shiqishi.