TIITO 3 - Qullaawa Maxaafa

AMMANINO MANNI ASSA HASIISSANNO COYE

¹ Mannu baalu gashshaanotenna roorrootaho owaate hajajamanno gede, dancha looso baala loosate qixxaawanno gede,

² ayirano busha coyi'rannokki gede qaagiissi. Mannu ledo giwantannokkirenna arshoota, mannaho joongille leellishshannore ikkito.

³ Ninke alba hawanyootaho; hajajammeemmokki so'ranyootaati; yortotenna addi addi qawaaxxora borojje ikkinoommoreeti; bunshenna dhiibbe noonkereeti; giwamaasinete; mimmito gimbeemmoreeti.

⁴ Gatisaanchinke Maganu shooshanqenna manna baxasi leeltu yannara kayinni,

⁵ ninke keeraanchimmanni ikkikkinni, isi maarosinni gatisinonke. Gatisinonkehuno haaro ilama hayishshi'ranninna Qullaawu Ayyaani widoonni afi'noommo haaroo'manniiti.

⁶ Maganu shooshanqesinni Gatisaanchinke Yesuusi Kiristoosi widoonni qole Ayyaanasi halashshe duninonke.

⁷ Hatto assinohu, eltosinni keeraa'mine hexxotenni agadhineemmota hegere heeshsho ragi'neemmo gedeeti.

⁸ Kuni hawaqi'nanni qaaleeti. Magano amma'nino manni danchu loosira jawaatanno gede, konne coye baala seekkite huwachishattora hasi'reemmo. Kuni coyi danchahonna mittu mittunku manchira kaa'lannoho.

⁹ Ikkollana hawanyootu moronsho, ilama kiiratenni, coyi'ranshonna Seeru daafira kaansanni gibbo xooqi. Hattoo coyi guma diafi'rino; kaa'lannorino dino.

¹⁰ Babbadooshshe kalaqanno mancho, mitte woy lame higge seejjittohu gedensaanni isiwiinni xooqi.

¹¹ Hattoo manchi shokkashshohonna cubbaataamoho. Isi umisi aana yoo yii'rinoha ikkinota afi.

JEEFOTE SEEJJO

¹² Arxemaasi woy Tikiqoosi atewa soyemmo yannara, ati rakke anewa Niqophiliyoni amo. Ani hawado hakko keeshshammora hasi'roommo.

¹³ Seeru egennaami Zenaasinna Aphiloosi hadhanno gede assi. Hasiisannonsa coye baala kaa'linsa.

¹⁴ Ninke mannino gumiweele gatannokki gedenna heeshshote qarra tidha dandaanno gede, dancha looso loosa rosona.

¹⁵ Ane ledo noori baalu keere dhaantino'ne. Ammanatenni ninke ledore ikkitino roduuwi baalaho keere iillishinke. Maganu elto ki'ne baalunku ledo heedho.