SOFFOONIYAASI 3 - Qullaawa Maxaafa

YERUSAALAMENNA ALBILLITTETE NOOSE HEXXO

¹ Cubbunni battaawinohuranna umisi manna shetisannohura haxawarru Yerusaalamete Katamira aanne'e!

² Kuni katami yinoonnita dimacciishshanno; seejjo diadhanno. Kaaliiqa hexxa agurino; kaa'lannosi gedeno isiwa dishiqino.

³ Albisootisi ittananno doobbiyi gedeereeti. Daanyootisino ga'ara gatissukkinni afidhinoha baala itte guddannorinna hudidhino hiyyeeyye hawarrote gedeereeti.

⁴ Himanaanosi boo'natenni bedeedantinoreetinna giddonsa xagarro wo'mitinoreeti. Qeesootisi qullaawoota batteessitanno. Kaaliiqi hajajono uminsara injaannonsa gede shokkishshe tirtanno.

⁵ Keeraanchu Kaaliiqi kayinni, xaano giddosi no. Isi horonta so'ro diassanno; soodo soodontenni mannisira halaalaancho yoo yaanno. Barra tuqa konne coye diaguranno. Kuni baalu ikke hee'reennanni hakkiicho hee'rannohu haxawarru manni saalfatikkinni sao assanno.

⁶ Kaaliiqi, «Dagate gashshoote hunoommo; qiishonsano diigoommo; katammansano gudoommo. Katammansa mitturino hee'rannokkita ona ikkitinohura doogonsa ha'rannohu dihee'ranno.

⁷ Ani konne baala coye asseenna, ‹Manni'ya ayirrisannoe; seejjo'yano macciishshanno; assoommo galata baala dihawanno› yee hedoommo. Manni'ya kayinni bunshete aana bunshe ledino; bushu loosinnino battaawino» yii.

⁸ Kaaliiqi, «Shiima yanna cince; insa aana yoo yeemmo yanna dagganno. Daganna gashshootuwa mitteenni gamba asseemmo; hanqi'ya giira insa aana duneemmo. Hanqi'ya buwani baatto baala giiranno.

⁹ «Hatte yannara, ane magansidhanno gede dagate hedo soorreemmo; insano wole maganna agurte ane calla magansidhanno; baalunku mitteenni anera soqqantanno.

¹⁰ Billaalle noohu manni'ya xeertote gobbanni Itiyophiyu wayibba widiidinni fushshaate haa're daannoe.

¹¹ Boonaleeyyenna naaxxaleeyye mereeri'nenni hooleemmo. Hatte yannara ane aana assitinoonni saora disaalfattinanni. Hakkunni gedensaanni Qullaawu Ilaali'ya aana anera gara digibbinannie.

¹² Mereero'ne umosi heeshshi assinoha jooga manna gatiseemmo. Kuni mannino ane hexxannohanna kaa'lo'ya hasi'rannoha ikkanno.

¹³ Gatinohu Israeelete manni aye aanano busha coye diassanno; dhara dicoyi'ranno; lame arrawono dicoyi'ranno. Kunnira, duroo'me keere hee'ranno; waajjishannonsarino dihee'ranno» yii.

HAGIIRRU FAARSO

¹⁴ Kaaliiqi, «Tsiyooni beetto faarsi! Israeelete manna! Faarse! Ilillisse! Yerusaalamete beetto! Wo'mu wodanikkinni tashshi yoohena, hagiidhi.

¹⁵ Ki'ne aana abboommo qoricha aguroommo; diinna'neno hooloommo. Ani Israeelete moote Kaaliiqi, mereero'ne noommo daafira, kunni ka'a waajjishanno'nehu bushu coyino dihee'ranno» yii.

¹⁶ Hatte yannara wole gosa ate Yerusaalame, «Tsiyooni Katama, waajjitooti! Wolqakkino daaqqoonke.

¹⁷ Maganikki Kaaliiqi ate ledo no; Wolqasinni qeelle haraqi'risiisannohe. Isino atenni hagiidhanno; baxillisinni heeshshokki haaroonse fooliishshiishannohe. Mannu ayyaanu barra hagiidhannonte gede, isino atenni hagiidhanno» yitannohe.

¹⁸ Kaaliiqino, «Kunni ka'a bao iillitannohekki gede asseemmo; saalakkino hooleemmo.

¹⁹ Shetissannohere baala hatte yannara qorichisheemmo; laaffinore baala gatiseemmo. Shorrantinoreno qole gamba asseemmo; shollinyensano ayirrinyeho soorreemmo. Shollitino darga baalaho, ayirradunna galatamino su'mire asseemmonsa.

²⁰ Billaalle hee'rannoha mannakki, hatte yannara qoleemmo. Uullate aana noo daga mereero, egennantinoonnirenna galatantinoonnire asseemmo'ne. Galagale duroonseemmo'ne» yiino. Konne coyi'rinohu Kaaliiqaati.