RUUTI 4 - Qullaawa Maxaafa

BOEEZI RUUTI ADHI

¹ Boeezi katamu xullichira songote darga mare ofolli. Albaanni Boeezi, «Gamba yiino fiixi no» yee coyi'ri manchino hakkiichira dayi. Boeezino iso woshshe, «Rodoo'ya, amo dagge mule'ya ofolli» yiisi. Isino mare mulesi ofolli.

² Hakkunni gedensaanni Boeezi katamu giddonni 10 geerra doore songote darga daye ofollanno gede assi. Geerruno ofollihu gedensaanni,

³ hakkunni fiixisira, «Kuneeti Naoomi Moaabi gobbanni higgino. Fiixinke Elimeleeki baattono hirtara hasidhino.

⁴ Konne coyeno atera kula hasiissannoe gede hedoommo. Baatto hasi'rattoha ikkiro kunni ofollino geerri albaanni gatisi'ri; gatisi'rattokkiha ikkiro kayinni kulie. Ati anenni roore gamba yaatto; ani kayinni atenni aaneeti» yiisi. Manchuno, «Ani gatisi'reemmo» yii.

⁵ Boeezino qole, «Naoomiwiinni baatto adhattoha ikkiro kayinni galte shiidhinota Moaabitte Ruutino mitteenni adha hasiissannohe. Hatto ikkiro baattotenni Elimeleeki su'mi diba"anno» yiisi.

⁶ Aantichuno, «Hatto ikkiro ani didandeemmo. Umi'ya oosora iqqi'reemmori ajannoe daafira didandeemmona ati gatisi'ri» yiisi.

⁷ Hattenne yannara Israeelete jajja woxxinanninna soorri'nanni woyite egenshiishsha ikkanno gede ku'u ku'unnira koattesi fushshe aate rosi no.

⁸ Kunnira, aantichuno Boeezira, «Ati gatisi'ri» yee koattesi fushshe uyi.

⁹ Hakkunni gedensaanni Boeezi geerrahonna hakkiicho noorira baalaho, «Kuneeti Elimeleekinna oososi Kelewooninna Mahilooni jajja wo'manka techo Naoomiwiinni gatisira'yara ki'ne baalunku naqaashshete.

¹⁰ Qoleno ayiddaannase Mahilooni shiidhinota Moaabitte Ruuti galte'ya assi're adhoommo. Kuni coyi jajju reyino manchi mininni fulannokki gede assanno. Su'misino ilamasinna ga'resi giddonni hawamikkinni hee'ranno. Kunni duuchunkura techo ki'ne naqaashshete» yii.

¹¹ Songote darga ofolle noo geerrinna wolu manni, «Ee, ninke kunni coyira naqaashshete. Kaaliiqi tenne galtekki Yaiqoobira lowo ooso ilinori Raaheelinna Liya gedeeta assohe. Kaaliiqi Efiraataho duroonsohe; Beetelihemete maccaha assohe.

¹² Kaaliiqi tenne aja beettonni aannohe ooso maassi'rohe; maatekkino Taamaari Yihudira iltinohu Faareesi maate gedeeta assohe» yiisi.

BOEEZINNI DAAWITI GEESHSHA NOO ILAMA

¹³ Kunni garinni Boeezi Ruuti galtesi assi're minisira adhe ha'ri. Iseno Kaaliiqi kaa'leennase godobbe labbaa beetto iltu.

¹⁴ Olluu meentino Naoomi, «Towatannoheha beettu beetto uyinohehura Kaaliiqira galatu iillosi. Kaaliiqi konne beetto Israeelete maccaha assosi.

¹⁵ Beettikki beetto lowo geeshsha baxxannohe; lamala oosonni roortannoho; xa qolte heeshshokki haaroonasannohanna geedhimmakki yannara towatannoheha labbaa beetto iltinohe» yiise.

¹⁶ Naoomino konne qaaqqo ilase assidhe hanqaffe la'misse lossitusi.

¹⁷ Olluu meenti qole, «Naoomira labbaa beetti ilaminose!» yaanni qaaqqoho, «Iyoobeedi» yee su'ma fushshisi. Moote Daawiti anna Isseyi ilinohu Iyoobeedi isooti.

^18-22 Faareesinni kayisse Daawiti geeshsha nooti ilamate kiiro kunninni aante noote: Faareesi Hetsirooni ilino; Hetsirooni Araami ilino; Araami Aminaadaabi ilino; Aminaadaabi Neasooni ilino; Neasooni Salmooni ilino; Salmooni Boeezi ilino; Boeezi Iyoobeedi ilino; Iyoobeedi Isseyi ilino; Isseyi Daawiti ilino.